在基督城過的weekend

嚟咗呢到之後，我對d 日期嘅感覺都冇哂，可能係因為冇番工加埋仲未完全習慣嘅關係啩。

尋日星期六，無無聊聊就跟咗同宿嘅朋友出左去行吓睇吓。出到去之後，我同宿個朋友係frd搭frd嘅原因之下，同幾個朋友再meetup一齊行。世界真係細，出黎到，見番幾個係香港早就識咗嘅香港人，大家見到面之後都笑左。

今日其實主要都係d 女仔想去下d market行下睇下，對我嚟講其實都冇乜好睇，所以我都係志在出去行吓。

第一個去左個market係一個手作仔market，俾d 人show吓賣吓佢哋d 手作仔，例如賣吓d 畫咭、吊飾品、裝飾品等等，令我諗起當年去韓國花梨女子大學果個market差不多。

之後我地又坐車去左另一個special event market，係賣韓國野食嘅market，結果都係抵唔住燒魷魚嘅引誘，係果到買咗d 野食之後就走咗啦。

嚟咗christchurch咁耐，聽就聽得多d 人話咩地震過後好多地方都係重建緊，好多嘢都好破落，今次出到嚟終於知道點解。我地經過市中心一個廢墟，好多大廈已經冇哂人，封哂，同埋好似就黎冧咁。呢個地方本身應該都幾繁華，但攪成咁，真係好慘。

我地去到一個叫Re:START Mall嘅地方，個名係咪好得意呢？點解咁叫？係呢到本身已經變左做廢墟，呢個名就係代表佢要係番呢個地方重新開始。因為仲未重建到，所以d shop都用貨櫃頂住檔都得，吹漲到仲可以同個貨櫃攞錢，死未。

最後去到一個Coca-cola 攪嘅concert，算係呢到一個比較少見又大型嘅音樂會，但我覺得其實大家都志不在個concept，志在一家出嚟吹水打下牙骹野下餐咁。係個大草地上攪concert，d 風大到pk，有太陽都凍到pk，我出去果陣帶唔夠衫，加埋仲要唔太識欣賞個show所以就早走左啦。

可能尋日吹得風多，今日個人都ok 累，所以今日都係係宿發下臭，出左去另一個大shopping mall行一陣就走左啦。

達陣@基督城

留咗係奧克蘭短短兩日，同熱情嘅新朋友同屋主暫別之後，我就嚟咗另一個陌生嘅城市─基督城，一個幾年前地震震爛咗重建中嘅城市。

嚟呢到嘅任務好簡單，就係搵車同練車。所以我上機之前已經開始搵定d 車主。

但其實呢個任務只不過係一個短期任務，我發覺其實我呢一年有三個好重要嘅任務，就係：學煮飯、學普通話、同練oral english。呢邊嘅民宿主人唔似上一間咁nice咁熱情，買嘢啊生活上嘅嘢都唔會俾tips你，所以自然要靠自己。都幾好彩，我住嘅地方有間好大嘅shopping mall係附近，都幾方便下。好得意，我完全冇諗過係Christchurch 都會有咁嘅shopping mall，仲以為呢邊除左一d 大d 嘅supermarket 就乜叉都冇。

今日我終於開始試車，試左兩架，第一架試我真係渣得好差，車主都好似驚我會撞咁，睇得出佢堅驚驚地，第二架我都已經開始拎番個感覺，叫做渣得冇咁樣衰...lol 好彩我都搵左個朋友陪我試順便幫我手試試，佢都係我係呢到新識嘅朋友，佢本身有係屋企地方渣開所以搵佢幫手會好d。暫時我第左第二架好滿意好想買，到時買左再post上黎啦，哈哈。

今晚我終於買齊左d 料，好好彩有個台灣女仔幫我教我，最後終於整左一兜未算難食到盡嘅野出黎，但可惜d 西蘭花硬到乜咁，攪到佢都笑我：「你平時鐘意西蘭花硬食的嗎？」Anyway啦，笑我就宜家d 笑，一年後番黎我會去報名玩master chef㗎啦。


特別插曲：我同房有個內地男仔，我果日一入宿見到佢，我已見到佢褲都唔著行緊去廁所，當其時我已打左個凸。之後我同d 女仔傾計講開，佢哋都同我講：「你幫吓我地同佢講啦！我哋女仔之家點叫佢除褲啊！」原來佢成日係屋入面都會唔著褲周圍走。其實房客宜家得我同佢係男仔，講真就算得男仔，我都唔會唔除著褲周圍走啦，老老柒柒我真係唔明佢諗乜柒，仲有...我都唔知點開口講。唔通真係話：「著褲啦屌你。」

登陸奧克蘭!

尋日終於到左奧克蘭，但聽日就要走啦。原本唔係打算留係呢到咁短嘅，但可惜因為之前改左機票嘅關係，所以點都要早少少落christchurch去預備買車、練車同番工d 嘢。

落到機場，皆因自己低能嘅問題，攪左好耐我終於搵到接應我嘅屋主。入到民宿之後，由於一d 特別清況，民宿暫時冇房俾我(本身我有另外一個選擇，但算罷啦)，所以我最後選擇左瞓sofa，而屋主都變左冇收我呢晚錢。

一入宿，就見到幾個女仔係到打牙骹吹水，但好彩都見到香港人，可以同聲同氣d 。慢慢發覺其實馬來西亞華人其實都幾nice，同埋都識廣東話。估你唔到馬來西亞華人語文真係好勁，郁d 都識四、五種語言。有一個女仔唔識廣東話，我被迫要同佢講吓普通話，但基本上我一開口佢哋已經忍唔住笑柒我。

佢哋個個都問我，你識唔識煮嘢食㗎？我當然唔識啦，除左煮頹面。之後佢地就話啦，呢到唔識煮，生存唔到㗎喎！我住左兩日，我已深深感受到，我再唔學識煮吓簡單野，我真係會係呢到成為第一個有錢但餓死嘅香港人。

今晚我去到屋主另一間屋到過，終於有番自己一間房，真係舒服番哂。

到新屋之後，終於有番d 時間同體力，所以就出左去散步，行左去海邊。感覺真係好舒服好悠閑，我終於可以慢慢放慢番個步伐，係到行下、坐下、玩下千鞦韆、望下人地放狗，真正去嘗試下感受到呢到嘅環境同空氣。

黎左兩日，從各位得知左幾個事實：一. 黎working holiday 原來係女比男多超級多；二. 搵工男仔著數過女仔超多；三. 係呢到冇車真係會死，唔止係行死，你基本上工都未必請你。

那夜清晨，我坐上星航開往奧克蘭的A-380

第一次坐星航，仲要係第一次坐A380，真係坐完真係覺得佢地排名高都係有原因嘅。

上飛機個第一感覺就係...大，同真係好很大，冇啦，總之就係好大隻。

星航有咩正？飛機餐佢地唔算特別好食，但勝在會預先俾menu你睇同埋連雪糕都有；好多新戲睇，最新連Lucy、Transformer 4 果d 都有；座位比較上大d，同都起碼唔頂腳；空姐唔算靚女，但起碼都幾好身裁，總之overall感覺都幾好。

唯一最黑仔就係第一程機前後都有d 細路仔係到，唔係係到大叫"daddy"、"媽咪"，就係係到爆喊，好彩第二程機冇再遇到，如果唔係真係死俾你睇。

飛機降地果吓，我打左個冷震，從心同自己講左句：「到啦，呢到就係我嚟緊一年生活嘅國家。」雖然身體好累，但我從心有種莫名嘅興奮。

好啦，我宜家到左奧克蘭民宿，舒舒服服係到打緊字同打緊牙骹，之後先再講下係奧克蘭咩料啦。

出發前有感

終於出發啦，個鐘行多圈，就出發啦。講左一年，終於到啦。

衰d 講句，呢次嘅旅程都真係幾好笑，本身神早就應該已經去左，但無啦啦又會整親腳要遲d 出發，連本應有嘅旅伴都冇埋，落地可以靠吓嘅人都冇，真陰公。但養傷期間，百無聊賴，諗番成件事，倒番轉去睇，話唔定係個天想要我真真正正靠自己，又或者如果我如期出發其實會有意外，所以要我遲d 出發都唔定。有時咁諗個人都會開心d ，起碼唔人連個天都唔鐘意我啩。

呢排，真係好忙，一來係因為出發前要諗好多嘢、準備好多嘢，例如諗下有d 咩要做、有d 咩要買、有d 咩朋友未見等等。二來，就係承蒙各位嘅厚愛定錯愛，結果就足足成個半星期都冇番過屋企食dinner。腳都未好得番哂，呢個幾星期就行到我腳都斷，哈哈。

同大家講番心底說話，其實呢排我真係百感交集，係我好忙嘅呢排都係到失緊眠，第二朝眼訓到喊出黎都要繼續chur自己，仲要出發前幾日先病病地，好彩都唔算嚴重。可能係因為太多嘢要諗要做，加埋到出發前先發覺自己其實心底裹有d 恐懼呢個陌生嘅環境，唔知去到會發生咩事，會唔會有意外，會唔會撞車等等。我把口就係咁臭，詛自己撞車死，但我嘅歡容背後收埋嘅，你又知唔知我其實係驚緊自己真係出事呢？就算我更大膽更沙pok，我諗正常都會有d 淆啩？

話明百感交集，除左驚，當然仲有喜。其實我都會有d 期待自己嚟緊一年會點呢？一年後，我會有咩改變？識到咩朋友？見到識d 咩？呢d 興奮嘢就正正係支持自己去嘅動力。

另一面，我都要係到真心向各位講聲：謝謝大家嘅祝福，大家咁關心我、支持我。大家送嘢俾我，陪我食飯，我從心其實覺得自己好有幸有咁多人錫住我，大家每一句問侯關心我嘅說話，每一件送我嘅嘢，都俾我嘅勇氣。作為一個麻甩佬，我唔係果d 好識從把臭口講番呢d 說話出黎，總之，感激大家。

嚟緊一年，我得閒就會寫吓呢個blog，呢個moment我唔保證我會有動力一路狂寫㗎，你知㗎啦，我又冇文筆又冇靚相機，頂多拎部iphone 影下cheap雞相，所以如果大家仲想我之後寫嘢就唔該俾d support我pish下我啦。(其實我原意係想寫俾自己十年廿年後睇番，如果大家唔睇我會private番㗎)