剝青口工人第九~十二日

之前已經俾人叫過我開青口唔夠快，呢個星期我都唯有努力叫自己開快d，由星期初得一個鐘大約六百幾隻，去到星期尾已經去到接近最低標準嘅八百尾隻，老實講我已經覺得我已經安全啦，唔會再收口頭warning啦啩？

先解釋吓先，我哋每日要係運輸帶上面嘅位置都要換，因為企前d 後d，其實會影響開嘅速度，你諗吓你企前面都會選d 最靚最好開嘅嚟開先，所以換位係為咗公平。

星期四因為我企咗係條line 嘅隊頭，做隊頭其實最著數，一來d 青口啱啱出閘，有d 易開嘅青口可以選擇，二來有d 青口啱啱蒸完出嚟，基本上刀都唔洗，就咁拗開已經得啦，所以會更舒服同快。果日最快果兩個鐘，我差唔多開咗一千隻一個鐘。

星期五，本來又係另一日超輕鬆嘅一日，因為做完隊頭就輪到隊尾，隊尾最正係因為佢個counter 係壞嘅，所以冇人會知你做咗幾多。人就係懶㗎啦，明知唔count，咪龜速咁開，諗住輕輕鬆鬆就可以過個happy friday。

好景不常，開到第二round 果陣，個manager 入嚟唔知望乜。初初我冇諗過條友會望我，正常佢一日都唔會入嚟一次，就算佢望都應該係望其他嘢啦，所以我都冇理過佢，繼續hea 做。做做吓，supervisor 突然行過嚟，叫我同隔嚟啊姨換位，個心已經諗，「shit，無啦啦換乜春啊，又要我衝數？」

好啦，換完位，仲要俾個仆街肥佬manager 叫我出去講嘢。對話內容大約係：「你條友太慢，我要你之後每日開六千隻俾我，如果唔係就要你走。」六千隻即係幾多？大約係一個鐘八百隻以上。咦乜我唔係已經夠數啦咩？佢話我企係d 隊頭開夠數，但宜家要我隊尾都夠數。

當時我真係嬲到唔識講，好彩我把刀係放低咗先同佢傾計，如果唔係我應該嬲到當場插咗佢一刀。大我？乜料？同事之中有個女仔同我嘅進步情況差唔多，但佢從來都冇俾人警告過，我就前後俾人warn 過三次，今次仲要warn 要炒我，真心覺得超唔公平。

其實我唔係話好鐘意份工，我本身都係想打多三個星期就會走，但宜家你突然話炒我，我之後d 計劃就會亂哂，同埋本來應該會儲到嘅旅費就冇咗，其實真係幾煩。特別係下星期，因為呢邊公眾假期係需要出holiday pay俾我哋，唔知佢係咪想唔出俾我，所以就想係假期前就炒咗我，如果佢賤到咁我都無話可說。

之後我同個華人supervisor 傾，佢叫我繼續俾心機努力啦，唔好真係咁放係心到，盡自己力就ok。其實真係好矛盾，我唔知係個死肥佬係認真定係純粹想俾壓力我要我開快d。

辛苦五日過後，真係身心都好累，仲要happy friday先俾壓力我嘆。星期六日我都係食同瞓。本身今日星期日天氣好好，partner 約咗兩個朋友可以一齊行山，但我都係有d 唔舒服所以唔去。冇得去玩，唯有屋企食吓飯仔啦。

利申: 親手炒，好味㗎。

四個月的旅程，有感而發

其實你問我鐘唔鐘意紐西蘭，我會答你：鐘意。呢到風景靚，空氣好又乾淨，kiwi 人普遍都親切有禮，作為一個居住嘅地方，呢到絕對比香港好好多。起碼，你唔需要做一生屋勞去供樓，唔洗成皮港紙一個月先養得起架車，更加唔需要俾一個濕鳩到冇得再濕鳩嘅政府日日係玩殘。每日嘅生活就係簡簡單單，自給自足，得閒放假就揸車出去玩吓，其實真係幾寫意。

但點解我宜家又會係呢邊咁唔開心？之前架車壞，當時個人真係接近崩潰，因為之前一個月辛辛苦苦做cherry 儲果少少錢，架車一炮過就輸凸哂不突止，仲要係我想用佢接朋友環島之前先出事，我真係灰到頂唔順想逃走番屋企。

果件事其實都係導火線，令我發現自己一直係紐西蘭其實都係唔開心，直到今日我可以話其實真正令我唔開心唔係呢邊嘅生活，係呢邊嘅工作。呢樣真係期望與失望嘅問題，初初嚟之前，我仲諗住體驗吓唔同嘅工作，摘吓車厘子，搬吓箱啫，應該幾過癮啩？好多嘢你做兩日就過癮，但當佢變成你嘅職業，就唔係咁講。

摘車厘子，第一日真係幾好玩，第二日都仲過癮，第三日我就開始覺得悶到爆廠；sort 車厘子都係，頭兩日做都仲覺得輕鬆，第三日開始已經覺得企成日真係幾辛苦；開青口，開兩日隻手都仲係叫痺痺地但唔悶，但我宜家已經手又痛，日日開到想企係到瞓覺。令我更擔心其實係驚做得耐會有後遺症，驚整親扭親真係醫都有排醫。

辛苦都算啦，大佬我咁想落去，唔止係悶咁簡單，我真係覺得腦唔知係到諗緊乜。有時都想話放空個腦乜都唔諗，但真係唔得，咁樣你反而仲會諗埋d 九唔搭八嘢。呢吓其實係比勞動身體更辛苦，再落去個人真係會變蠢。

仲記得出發前，屋企人聽到我話嚟，一句就質埋嚟：喂，大學生去做咕喱？當日我真係好理想化咗，其實說穿了呢邊俾人嚟做working holiday 其實都係想你哋嚟做勞工，呢個係不爭嘅現實。雖然好辛苦，但經過呢幾個月我又有冇得到d 咩？其實絕對有。經過呢幾個月，我知道自己喜歡嘅工作始終係developer，同埋比起之前更有決心去攪創業嘅嘢。

每個人都有自己嘅睇法，同埋自己嘅感受，有d 人真係好享受backpacker 呢種嘅生活，但我就應該唔係呢類人啦。留得唔開心，我都唔想迫自己留太耐，總之自己想做嘅想玩嘅，完成咗就夠啦。

咁我到底幾時番？暫時我都係唔同大家講住，但如果我係呢邊始終搵唔到份正正常常嘅工，可能我就好快就會番。倒番轉講，如果俾我好好彩搵到份office 工，我可能就會留耐d，但機會真係唔大。

剝青口工人第六~八日，週末當然係要輕鬆㗎啦

每日神咁早起身，又凍又累個身又痛，為咗錢都係要出去做嘢，所以更辛苦都要死番工。當我已經做到隻狗咁果陣，最唔想見到嘅情況終於出現啦─上星期五朝早，我俾supervisor 話我開得太慢，佢話連新嚟嘅都比我快。其實講真要達到佢要求嘅minimum pay 嘅數量係需要九百隻一粒鐘，我之前因為成日左右手交換開，所以得大約五百幾六百隻。俾人warn完，迫於無奈咪爆seed 開番兩round 囉，結果我發現自己最快都係得大約七百幾隻，始終都唔達佢要求。

今日星期一，我又俾另一個supervisor 講話佢知道我上個星期唔達標，所以今個星期要加速，我問佢係咪要我開九百先得？佢冇答我，只係叫我盡量開快d。我話我宜家最快都係七百幾，佢都冇特別講乜，叫我努力啦咁話。

又去番以前摘車厘子果陣咁，大佬啊我真係盡哂力啦，唔知我做多一年半載會唔會加速到，但最少宜家我真係去到limit 都唔到你要求，我可以點？我唯有盡自己力做自己最快啦，如果仲係投訴我做唔夠數，一係我自己走，一係等俾人炒或者轉pack house㗎啫。到時再諗啦。

好啦我weekend 做咗乜？星期五晚去咗casino，其實我真係冇乜錢可以賭，但我同d 朋友都係去等抽獎：星期五晚每個鐘都會抽兩個number，如果你條手帶係果個number你就可以得到1000蚊獎金。雖然同抽六合彩差唔多，但入場抽吓獎又唔洗俾錢，何樂而不為？

當然唔係啦！入得賭場，邊忍到？結果我都係忍唔到，係俄羅斯輪盤落手賭咗廿蚊咁大把。明明我都已經贏咗一個double，結果都係繼續玩輸番哂俾佢。是但啦，都係玩吓啫。

星期六，兩個傻仔朋友無啦啦話去海邊落水，真心睬佢哋都傻，呢邊卅度大陽曬住，d 水都可以凍到抽筋，呢排仲要越嚟越凍，落水仲唔變雪條？結果，佢兩條傻仔真係落咗水，d 風吹埋嚟真係凍，佢哋都仲可以話d 水好暖，真係服咗佢哋。

星期日本身想去行山，結果因為天氣太差，被迫番屋企又開檯。比起係香港，係紐西蘭d 麻雀運仲要差多兩皮，完全唔明點解下一隻就可以自模九番，偏偏就係俾對家早我一隻食先，或者我下家明明兩選一打一隻，偏偏係打咗食俾我上家食係唔俾我食。都係果句，雖然唔係打錢，不過面對自己d 黑氣，真係無奈到極點。

剝青口工人第三~五日

呢幾日都冇哂時間寫blog，因為呢幾日都神咁早起身，仲要做到隻狗咁，番到屋企都已經快快手手食飯瞓教。

啱啱果個星期日，有兩個朋友嚟咗我屋企探我，計埋我partner 四條友，有咩好做？哈哈就係開檯啦！真心好耐冇打，真係手痕到爆，雖然冇打錢，但起碼過吓手癮。不過唔打錢都好，因為我d 手氣真係超級臭，應該我紐西蘭d 黑氣都係唔散。

又開咗三日青口，隻手開始真係開到痛，日日重複同一個動作，隻手真係開到痛，特別係d 手指手掌。好彩我應該唔係最嚴重果d，有個女同事早我幾日開始開，佢有兩隻手指我見佢已經腫咗。所以為咗等隻手冇咁辛苦，宜家努力練緊左右開弓，兩邊手交替揸刀。當然啦，用左手真係會慢d，但我發覺佢其實唔係真係咁介意我速度，佢見到我有努力開，慢d 佢都唔會理我。

話說我有個同事，係薩摩亞人嚟，同時都係在場開得最快嘅人嚟。有次佢lunch time同人吹水，佢問個中國啊叔識唔識詠春，個啊叔唔明佢問乜，我咪當佢翻譯，之後我仲up 話我其實識，薩摩亞同事就超有興趣問我超多詠春d 嘢。話說原來佢超鐘意睇葉問，所以覺得詠春好正，仲有佢自己係打boxing，所以對中國功夫超有興趣。佢仲好想我教佢詠春，仲叫我教佢點盤手，先唔講我得半桶水識少少，我學咗成年幾，詠春有咁多理論同基本嘢，邊有得速成教佢咁多嘢㗎！

俾佢講講吓，真係想搵人陪我黐手啊！@siusai 快d 過嚟同我黐手，哈哈！

剝青口工人第一~二日，求人不如求己，自己架車自己整

真係唔知中文叫咩，總之英文叫Mussel Shucker。Mussel即係青口，Shucker即係剝殼，簡單d 講即係開青口。

話說我之前放棄葡萄園份工，開住貧窮mode咁去搵餐廳類工作，點解宜家又番番去做工廠類工呢？其實當然係一來因為錢啦，做餐廳類工作最大問題係唔穩定，搵咗咁耐，基本上全部都係請part time，就算係full time，好似之前餃子鋪咁，都係大約得三十個鐘。本身我有得打兩份part time令到自己有四十幾個鐘，但可惜因為間餃子鋪咁賤，攪到我個如意算盤打唔響就放棄咗啦。唔緊要啦，體驗過玩過就算啦，起碼我都做過，短就短d 咁解。

講番開青口，暫時我做咗兩日。比起以前做車厘子，其實係更加辛苦，同埋需要更高技巧。辛苦，因為一來要超早開工，朝早最遲五點到就要起身，仲有做呢d 肉廠海鮮廠真係會好大陣味，索得耐真係會有d 作嘔。本身我唔抗拒陣味，因為我不嬲都唔怕腥味，但你唔夠瞓仲要索住咁大陣味，就唔同講法啦，我尋日真係做到有d 頭暈暈同埋作嘔。另外，由於要揸刀仔，所以全日手掌都要用力，所以做完成日隻手掌真係會酸痛，有d 朋友話初頭d 手頭做到腫哂，好彩我暫時都冇乜特別，係酸痛d 啫。

做呢d 開青口係有技巧，因為你落刀要快狠準，先可以好靚咁開到，如果唔係就會整爛隻青口。成功你就可以留番半邊殼，失敗你就會成隻起肉，所以你要快就一定要起得靚。我開到第一日都整爛咗幾十隻先成功開第一隻靚嘅，直到宜家先叫做有咁上下成功率。

雖然有d 唔同，但大約就係好似似呢段片咁樣開青口。
https://www.youtube.com/watch?v=e13gM-CqTpM

今日星期六，趁放假得閒，就去咗劏車場拆車搵咪錶，試吓自己換咗佢自己整。老老實實，我呢d 老爺車，真係幾難有人會幫你整呢d 咪錶嘢，一來d 廠都唔會再有呢d 車嘅新零件，有都會貴到喊，二來就算有人整，收費都唔會平。

所以呢邊有d 呢d 劏車場就會回收d 車番嚟，俾你哋自己帶工具入去拆你要嘅零件出嚟自己修理。係呢邊車零件跟本就唔值咩錢，好似話上次我架舊車壞engine，成個引擎換真係好貴？唔係，其實佢話一手engine就可能二、三千紐紙，二手engine只係值650紐幣，但佢人工費足足收我1300紐幣，真心痴孖根，同搶係冇分別，所以我先最後放棄整番架車。要人工費低，最好就係搵華人師傅。

煩咗好耐，d 華人師傅一係就唔肯幫我攪，一係就唔得閒，一係就人間蒸法。之後把幾火，咪上網search 吓點換個錶點換，咦原來唔係咁難㗎喳？就把心一橫自己去拆自己去換。本身最煩就係個里數問題，因為如果換咗個咪錶同本身架車個里數差太遠都係一個問題，但好彩搵到啱嘅咪錶仲要連里數都match。幾十蚊紐紙，解決咗個煩咗超耐嘅問題，真係爽。

首遇黑心老細，係中餐廳試玩半日

話說之前講果間餃子店，仲諗住之後會長做，點知正式開工左一日就砍炮唔撈，真係快。

星期一開工前五分鐘，我早到咗，個死肥佬老細就趁未開工同我講埋d 懶好聽懶有道理嘅說話，大約內容就係：話說呢你仲未熟手，所以我哋宜家仲未可以將你轉做正式員工，暫時你係培訓員工。你知㗎啦，我哋要專登搵多個人手幫你，所以成本高咗，所以培訓員工就會係有培訓員工工資。

我當時已經即刻質佢，乜唔係最低工資14.25咩？佢答我，新西蘭其實有培訓員工工資係11.4，係合法嘅。我當時冇辦法查証，所以都冇得即時大番佢話冇可能之類。之後佢就話俾時間我考慮，我已經知道自己塊面已經黑過包公，火過火屎，我已經好想當場屌鑊佢甘然後而走。但我都係決定忍住，起碼做完今日先算，諗住可以同個女仔經理私下再傾傾。

結果，佢話俾d 時間我考慮，係得果30秒。30秒後，佢就好唔禮貌咁話：「考慮完未？考慮完就開工啦！」好，我忍你，忍你一日，做完呢日再算。頂住條氣頂咗成日，到收工我私吓同個女經理講，話我真係需要生活，你得果11.4，仲要工時又短，我交租都成問題啦，你叫我點做落去？個女仔係台灣妹嘅，仲要細過我幾歲，仲以為會有計傾，點知佢都係幫個老細講說話。我心淡啦，一嘢就收佢皮話唔do 啦，出番果9粒鐘糧就算啦。

之後到夜晚，個死肥佬唔係良心發現定係驚我告q佢，無啦啦話出番14.25嘅人工俾我呢9粒鐘。老實講，我真係查緊有咩途徑可以告佢，但佢真係出番14.25俾我我真係變咗冇証據投訴佢。

雖然我係呢邊真係越嚟越窮同缺錢，但我真係唔可以為錢出賣自己嘅原則。我可以為錢幫你洗廁所、抹地、抹檯、洗碗、搬重嘢，但我唔可以接受你咁樣壓揸我嘅努力。我寧可窮到瞓車，都唔要為你份不知所謂嘅糧做牛做馬。

到星期二，又係去試工，今次試果間中餐廳老闆娘係出名嘅好人，唔怕佢呃我。每個嚟試工前夕都要嚟見一見老闆娘先，做個最簡單嘅training。星期一晚我同另一個男仔收工後去咗做training，一嚟就俾咗個floor plan我哋去記檯號。我用咗兩三分鐘就記熟咗個floor plan，老闆娘就考我啦，我睇都冇再睇張嘢就可以即刻背番哂d 檯號出嚟。我望住另一個男仔，同第二日另一個女仔，我都有d 慶幸自己個腦仲未生銹得哂。

今次我做嘅係正式中餐廳嘅服務生，由於我係男仔，所以主要係做傳菜。午市果陣，主要d 落單叫點心，工作好似好簡單，就係見到咩號碼就送去邊張檯，但其實做咗幾個鐘就明咗兩個道理：一係我其實真係性格上係唔啱做待應，因為我唔係果d 好叻multitasking嘅人，但人叫多兩叫就會做到亂哂大龍，二係做待應真係比你想像中辛苦，忙起上嚟真係水都冇時間飲。收爐之後，仲要幫手收檯同吸塵，先可以收工食飯。經過今次試工其實我都唔打算再做落去，一來係工作時間唔穩定又短，二來就係太遲食飯啦，我個胃唔太頂得順。

今日好好彩，終於搵到份開青口嘅海鮮廠工，起碼收入會穩定好多又唔係係戶外，但就應該悶同臭d。如果再搵唔到穩定工作，就可能要提早離開基督城搵出路。到底份工係做乜？聽日做完話你知。

第一次做餐廳工作@餃子快餐店

話說辭咗葡萄園嘅工作之後，一直都努力搵d 餐廳飲食類嘅工作。之後一直搵咗幾日，終於拉搵到呢份係餃子店做嘅工作。餃子店座落係Christchurch 最大最多人嘅Westfield mall入面，平時客唔算話好多，主要都係忙係d lunch time或者係dinner time時段。

星期五我去咗試咗三個鐘工，冇糧出純試吓幫手。呢邊真係好興請人做嘢都係叫人"試工"，其實都係藉口想你幫佢免費做嘢，有良心d 果d 就會照俾錢你，冇良心果d 真係聽過有人做咗成個星期唔做之後，用試工做藉口走你數唔出糧。

初初埋位我連個餐牌有乜都未知，聽佢係到up 都聽到我成頭煙。佢大約講番成個流程係點，等我試吓一邊記程序一邊試吓做咁。最後係三個鐘入面我其實係倒米多過幫手，但好彩我大約個程序都記得。到咗今日星期日，番咗六粒鐘，頭三粒繼續當試工，後三個鐘叫正式工作有糧出。今日開始我學識埋點落單之後，基本上成間餃子店嘅流程都知道八八九九啦。

講咗咁耐，到底我係店要幫手做乜？大約就係聽客人要乜就落單收錢，之後後面就開始睇單煎餃子同煮嘢，之後仲要傳菜、執檯、抹檯，最後後面仲要洗碗洗碟，基本上我都唔會固定做邊個位，總之就係有嘢就做啦。唔好問我，包餃子呢？你自己估吓點解唔洗包啦。

暫時可能因為我係新人啩，佢暫時編我嘅工時比之前話請我講果陣少咗，本身話一星期有三十個鐘，但嚟緊個星期我只係得廿三個鐘。呢期已經唔係好夠錢，工時唔夠就更煩，所以已經係到努力搵緊多份parttime。宜家我係大包圍乜工都問，waiter啦、清潔工啦、木工啦，但求sip哂我冇工開嘅時間。

另外星期五晚其實去咗另一邊試工，但果間嘢就唔係好對路。果間係一間未正式開張嘅東北菜餐廳，主要係接待d 大陸遊行團，但果日得果一檯，但有幾條友去試工。個經理自己都唔知要做乜咁，又唔講清楚d 程序，攪到我哋幾個一頭煙。所以，呢份之後再叫我去我都廢事去啦。

努力尋找服務業工作，加d 近期有感

今日開始我又變番做無業遊民啦。之前好努力咁搵waiter 工，但全無音訊，因為一來我冇經驗，二來d 洋鬼子餐廳同cafe 都係想請番洋鬼子做，我呢d 短期仲要亞洲人佢哋諗都唔會諗。

之後係朋友嘅告知下，原來除咗呢d 洋人cafe，仲有一個論壇係俾d 華人登廣告尋人開工，所以咁樣變咗機會大好多。前日同尋日放工都試咗去見一見工，一份就仲未有消息，另一份就因為工時太唔穩定所以放棄了。

今日去咗見幾份餐廳工，第一間係一間好正式嘅中餐廳，老闆娘超斯文超有禮貌，感覺真係超nice。傾完之後，佢叫佢下星期一夜晚去做個短嘅trainning，之後星期二、三會試試俾我開工，如果ok 就正式請我，唔ok 就會話我知唔需要我。第二間都係一間中餐廳，經理係一個後生嘅男性化女仔嚟，本身想話搵parttime 男仔，但突然又話聽日叫我去試試工，所以聽日會去睇睇咩情況。第三間係一間比較food court 式嘅細餃子店，感覺上會最輕鬆同易做，但有d 衰就係要求我試工兩次仲有唔會磅水，但佢俾我嘅工時係最長，所以點都要去試試。

三月五日，用平時寫日期嘅format(5/3/2015)，睇錯咗就會變成五月三。不經不覺仲有兩個月就再大一歲，開始回想呢一、兩年自己真係唔係特別如意。廿四歲就係活係胃病嘅一年，放棄工作用半年時間去休息，廿五歲嘅前半年都係為咗呢次紐西蘭之旅庸庸碌碌，最後過到嚟都係唔係好知自己呢幾個月做過d 乜。

回顧自己呢幾個月，真係做咗好多樣咁大個仔都唔覺得自己會做嘅嘢。係個果園入面去摘生果、拉網，曬到自己又黑又累；係個工廠入面係到卒d 死人生果、搬箱、俾人冷藏；仲有嚟緊會去搵服務業，作為一個臭脾氣嘅少爺仔，我都唔知可以忍到幾多上司同客嘅屁。仲有會係一個需要成日揸車嘅地方生活，仲要撞過、死過車，呢d 真係唔係我係香港正常會有嘅經歷。

雖然好嘅比唔好嘅經歷多(好似係)，但倒番轉去睇，呢d 都係叫人成長嘅事嚟嘅。唔錯過、唔輸過，邊得嚟叫我對呢d 教訓咁深刻？學我大佬話，錢解決到就唔係問題啦，條命係到，輸哂咪番香港再搵。

祝願自己兩個月後，廿六歲後，會係另一個精彩開心嘅一年啦。

基督城日本祭，曙光不代表希望

星期日，係基督城呢邊有個日本祭(Japan Day)嘅嘢。唔講唔知，宜家係基督城呢到住咗過萬個日本人，所以呢邊有呢個日本、韓國event 絕對唔出奇。咁星期日冇嘢做，留係屋企又係無無聊聊，所以就去睇吓乜料啦，當望吓有冇靚日本妹都好。

成個event最主要都係俾人食吓d 日本嘢食，好似係大坂燒、章魚燒、拉麵、鐵板炒麵之類嘅嘢食，同埋有d 日本嘢賣啊咁。不過講真除咗平d，果d 日本嘢你去亞洲超市其實都有得買。仲有果邊都會有d 日本表演show俾你睇，講真我就唔多識欣賞，我估都係d 民間團體自願去表演，我有睇到嘅就係d 小朋友上去跳舞同d 啊嬸上去唔知表演d 咩舞蹈。

最後我當然有食我最愛嘅燒章魚丸啦，雖然就真係普普通通，但都係果句：係呢邊，咪要求咁多啦！有個類似嘅味道已經算係咁啦！

咁interview呢？今日終於去咗interview見果間公司。我做功課果陣去study吓佢哋d products，老實講佢哋d products真係唔合格。佢哋最自豪係US App store咩有幾十萬個download果個app，都係d 極低能app。但為咗錢，都係試吓入去做吓睇吓乜料。

之後今日一去到，見到個老細，已經覺得有d 唔對路。條友個感覺超冇禮貌同超cool，連一開波同我握手都冇，問我一兩條了解我背景嘅問題，就話要捉d developer同我傾計。

換番d developer見我，感覺上好傾d。第一個係一個馬來西亞人，第二個唔知但都係亞洲人嚟，感覺上佢哋都有興趣了解我多d，同我傾得耐d 我之前做過乜。之後前後見咗大半個鐘，個老細都冇再同我傾d 乜。我問佢，係咪話仲有第二個stage嘅interview？因為個agent有話我需要in兩次，佢就叫我等消息。

番到屋企，等咗兩個零鐘，消息係：佢話我英文唔好，理解錯佢d 問題，所以唔請我。老實講，我自問我英文冇問題，加上我哋果行，都唔係話咁需要講好多嘢，但佢態度似係佢由一開始就唔係想請我，interview我只係為咗交差。

係就係有d 唔服氣㗎啦，我係香港做嘅product 品質仲高過佢哋，但到頭嚟唔請我？不過唔緊要啦，呢d 都係命運，可能個天仲未想我穩定係呢到過，想繼續考驗我啩。