北島環島遊 (day 10) 環島遊暫告一段落，開始換宿一星期

早上離開Hamilton 之前，路過呢邊嘅其中一個旅遊景點─Hamilton Garden，所以就入咗去睇吓。呢個花園入面其實係由好多唔同風情嘅花園係入面，好似係中國式、意大利式、日本式等等。佢每一部分都講清楚佢個主題，雖然唔係話好大，但慢慢行其實都可以行成粒幾鐘。

其實個人覺得個花園其實唔錯，本身我都幾享受係個花園到遊覽，但多得d 尊貴嘅大陸遊客，真係乜嘢mood都冇哂。當中最乞人憎就係有個女人對住同行朋友大聲係到話：「你為什麼都帶我們去這些免費地方，什麼特色都沒有！」雖然佢講嘅可能冇錯，北島呢邊好多活動都係要俾錢嚟玩，但個人覺得佢心態只係錢多所以出去旅行搵地方fing 錢，其實去邊到玩對佢嚟講都冇分別啦。

之後我哋去咗Hobbiton，就係電影”Hobbit”嘅拍攝場地。同行三個人入面只係我只中一個朋友有俾錢入去睇，我同另一個朋友都冇入去，係到等佢入去玩。唔去因為一來貴，二來我哋都冇睇套戲所以唔太想入去。聽番去咗嘅朋友講番導遊講番好多有關”Hobbit” 拍攝嘅嘢，呢個場地為咗套戲用咗兩年時間去整，但拍攝只係用咗十二日，所以話呢個場景製作其實好認真。

好啦，我哋嘅環島遊暫時又告一段落啦，因為聽日開始一星期我哋會開始為期一星期嘅換宿生活。今晚我哋已經搬咗入去人哋屋企到，聽日要做d 乜暫時仲未知道。主人家係一個五十左右嘅婦人，感覺都幾親切都幾講得笑。好啦之後會發生咩事我過兩日再講啦。

北島環島遊 (day 9) 北島第三大的城市─Hamilton

離開Taupo 果陣天氣好差，一起身已經落雨，所以都係早d 離開Taupo 繼續行。

今日去到呢到係北島第三大、紐西蘭第四大嘅城市，但可能係因為今日係公眾假期嘅原因，所以街上都唔覺得有咩人。

其實呢到我哋都只係途經呢到逗留一下，我哋都今日係呢到都冇乜特別活動行程可以做，加上天氣唔好，所以都係去博物館行個圈。呢邊個博物館真係冇乜嘢好睇，行咗一陣已經發覺冇乜展品可言，唯一值得講吓就係佢呢邊又有特別展覽係講番今日公眾假期嘅事─Anzec day。雖然佢唔似之前係Wellington 咁有好多好靚好精美嘅展品去講World War 嘅嘢，但佢都會有免費tour 去帶d 人去了解戰爭嘅事，都算幾有誠意嘅。

到底Anzec day 係咩？其實係澳、紐對世界大戰果陣犧牲嘅士兵所設嘅紀念日，特別係今年係100 週年，所以今年嘅Anzec day 會係特別重視嘅一年。

之後下晝入宿後，天氣開始好番d，就出咗去行兩個圈番嚟。Hamilton 成個雖然係大城市，但感覺都唔似以前基督城咁多shopping mall 同埋咁多鋪，亦都唔似Wellington 果種又大又靚嘅城市，所以都有d 失望。

北島環島遊 (day 8) 到達北島有名的湖─Taupo

係南島有好多好靚好出名嘅湖，Tekapo、Wanaka、Pukaki，都係好靚好多人去欣賞嘅湖。而北島，最有名嘅湖就應該係呢個Lake Taupo 啦。

佢有名唔係因為佢靚，個人覺得風景只可以叫做普通，但由於佢係一個好大嘅湖，人居住嘅地方又係成日靠水而活㗎啦，所以呢邊就變咗好多人居住。

由於尋日大家都行到成身散哂，今日都冇乜體力去係呢邊做乜，所以行程上今日真係冇特別去計劃玩乜。

先先我哋去咗呢邊唔同嘅風景點去睇吓個個湖。湖水唔係特別藍，加上睇果陣天氣又唔係好，所以都冇乜特別大感覺。之後我哋就去咗睇Huka falls，一個d 水由Taupo 流走嘅急流到睇。個急流d 水係粉藍色嘅，應該係因為太多氣泡，白色嘅泡就攪到d 藍色嘅水變成粉藍色。
之後佢仲有個唔係好高但好猛水嘅瀑布，正正就係呢條fall 嘅招牌，仲要有人係果到玩jetboat 㖭。

之後我哋就去咗睇人地跳bungy。同行朋友已經坐過，所以冇人想去跳多次。跳bungy 嘅地方其實景色幾靚，未跳過都幾值得跳㗎。講真我自己真係對bungy冇乜興趣，反而skydive 就幾有興趣。本身都諗住係呢個湖跳，但發覺旅費唔太夠洗都係唔跳住，但我覺得未來好快都會再嚟澳紐，所以大把機會跳啦。



頭先路過條街見到戲院，終於有Avengers 2上映啦。係呢邊咁耐都冇去過戲院睇戲，特別係呢套大片點可以唔入戲院睇呢。雖然都唔係咁聽得明，但唔入戲院邊有3D 睇，所以唯有遲d 睇番中文版dvd 啦。

北島環島遊 (day 7) 艱難的登山之路─Tongariro

好啦，今日終於挑戰咗Tongariro，一個係北島算幾出名難又長嘅National park track。今日沿路係到行，都起碼有過百人挑戰，所以呢邊都算係一個幾熱門嘅地方。嚟咗紐西蘭咁耐，呢條都算係我行過最難嘅track啦。

七點半鐘上旅遊巴，到達山腳果陣差不多七點九個字開始行。啱啱起步果陣已經都幾辛苦，因為天氣凍嘅關係，大約只有四、五度左右，加上個人未熱身，所以個人一開始超辛苦。大約行咗大半個鐘之後，太陽開始越嚟越暖，加上個人又熱咗身，所以開始冇咁辛苦。

上山沿途嘅景主要都係旁邊嘅火山，同埋鄰近嘅山。由於呢邊又係火山地帶，所以d 岩石外形都一忽忽咁，應該係來自火山噴出嚟嘅岩漿形成。另外呢邊都唔會有咩植物生長，所以d 山都係冇乜綠色，雖然唔係話咁靚，但都感受果種山脈嘅氣勢。

到上山頂前嘅個零鐘嘅路係最辛苦，d 路係勁斜，就算有樓梯都唔係易行，加上好多碎石，令呢段路難上加難。捱完呢段路後，上到山頂，見到幾個山頂嘅湖，三個鐘上到海拔一千九百米嘅地方，果吓真係從心叫咗句：「哇我得咗啦！」

從山頂開始落番山果一段短短地嘅路，先係呢條track 最恐怖最危險嘅一段路。因為呢段路斜得嚟地下仲要係d 好鬆散嘅沙土同碎石，你真係一步一驚心，碌落去都唔知點算。聽講每年都有唔少人係呢到跌斷手腳，真係唔係講笑。

離開山頂之後嘅好大段路，沿路嘅景都冇乜得別好睇，先先係一段係山邊走嘅路，全部都係雲霧，所以你連對面山都見到。之後走到最後果後係入咗樹林，所以更加冇乜好睇。雖然落山比上心輕鬆，但景就冇上山咁好。

完成果吓去到停車場，心情真係好爽。雖然身體好累，但七個鐘行二十公里又上又落山咁，好慶幸自己完成到都冇乜意外。

北島環島遊 (day 6) 洞穴之地─Waitomo

話說今日去到Waitomo，一個係北島出名好多洞穴嘅地方。聽導遊講，呢個地區大大小小有差唔多300幾個洞穴，而每個嘅形成都會有d 出入，所以都有自己獨有嘅形態。而其中今日我哋去嘅洞穴係呢到最重要嘅洞穴，因為每個人都會冒名而來睇洞穴螢火蟲。

先先入到個洞穴，第一感覺真係好似睇緊盜墓迷城咁，入到個唔知乜嘅窿探險，幾有feel吓。之後導遊帶我哋入去個洞睇，同我哋講呢個洞形成原來主要周圍都係石灰岩所形成，同埋周圍都會有d 裂縫會有雨水滲出嚟。如果講充滿石灰岩同水嘅窿你會諗起咩？就係鐘乳石啦。係個洞嘅邊都會見到鐘乳石嘅石柱，而其中我都見到仲係「生緊」嘅鐘乳石，簡單d 講就係仲會繼續變長嘅鐘乳石。導引話呢d 鐘乳石100年先會生長到1cm 咁多，所以以前d 人唔知整斷佢其實係好愚蠢嘅行為，因為你每破壞少少其實已經需要好耐好耐嘅時間先會生長到。

離開洞穴之前當然要睇最重要嘅螢火蟲啦。呢一種螢火蟲曾經我都係南島Hokitika 見過介紹過，但果陣睇嘅量就唔係好多。初初未上船果陣，望去遠遠本應該黑暗嘅地方已經見到有唔少光，仲以為係人造光嚟。之後係黑暗嘅洞穴入面坐上船仔，望上去洞穴頂度，一點點綠綠地色嘅，真係好似滿天嘅繁星。老實講果吓真係幾浪漫㗎，只可惜我就冇機會搵人陪我好浪漫咁睇啦。

睇完螢火蟲，我哋就出發去宿舍，預備聽日要行呢邊出名難行嘅山Tongariro。聽日需要行成八個鐘，仲要聽講唔易行，所以聽日嘅下篇再繼續啦。

北島環島遊 (day 5) Rotorua的第三天

今日一朝早就出咗去玩咗個好特別嘅活動，英文叫Zorb ball，上網查中文翻譯叫悠波球。係咩嚟㗎呢？其實就係你瞓咗係個好大嘅波裏面，同埋入面會有d 水，等你係裏面自己浪。之後個大波波就會係個山上面碌落嚟，你就會係個波入面自己滾嚟滾去。

初初仲以為會成個人俾佢卷到成個人反嚟反去，仲以為會好刺激，玩之前仲有d 驚驚哋；但玩完之後，發覺完全都唔刺激，個感覺就好似坐緊一條水滑梯咁，但你只係係個波入面滑緊咁解，我覺得只可以叫做普通。不過因為半價後唔貴，玩吓都無妨嘅。

之後我哋就去咗Lake Rotorua 去睇吓。雖然個湖唔係話特別靚，都唔係話對岸有咩特別山景，但最吸引我係佢海邊有d 呢邊我一直都冇見到嘅鳥類─一種係普通嘅鵝，另一種係黑天鵝。我哋初初一去到果陣，見到一大堆類似鴨嘅雀係草地上面食草。初初仲話，咦點解d 鴨咁大隻嘅，行近d 睇，唔似喎，鴨邊有咁大隻仲要有牙仔，仲要係食草！上網睇清楚先知呢隻係鵝嚟㗎。

望住d 鵝，之後朋友問我：「鵝定係天鵝啊？」我就指向另一邊話，果隻咪係天鵝囉。咦唔係喎，隻天鵝黑色嘅？！係啊係黑天鵝啊！我第一次見實物啊！話說黑天鵝係澳洲一帶嘅鳥類，正常係北半球係見唔到。最得意係d 黑天鵝係完全唔驚人，我企咗係到，佢仲要衰到走過嚟想我餵佢，真係吹漲咗。

今晚去終於去咗毛利村，去睇同感受吓毛利文化係點嘅樣。條村其實都已經唔係真正土著嘅村落，只係為咗俾遊客見識吓所以先重新整條村出嚟俾大家睇吓。最先先到步果陣，佢就表演咗佢哋獨有嘅歡迎儀式，個儀式主要都係係你面前跳吓舞同唱吓歌，但因為係好莊嚴嘅所以叫我哋在場嘅人都唔好笑。儀式過後，我哋就入去佢哋條村到參觀。村入面有幾間唔同嘅屋，每人間門口都有毛利人講d 唔同嘅東西講俾我哋聽，好似話俾我哋聽點做衫、跳舞、用武器等等。

之後就睇show 啦，佢哋表演番d 毛利獨嘅歌舞表演，雖然唔知佢哋唱乜同跳緊乜，但我都覺得比相像中好睇。之後就係晚餐buffet 時間，本身仲聽講餐飯唔多好食，會好毛利style，但其實都唔係，當中除咗幾味係用毛利方法煮之外其他都係好普通嘅煮法，所以成餐飯都唔係話特別口味。

雖然毛利村之遊價錢唔平，但個人覺得真係好值得去。比起去睇museum同睇片，親身見到毛利人、毛利村同佢哋嘅歌舞，真係對佢哋嘅文化有更深嘅認識。

北島環島遊 (day 4) Rotorua的第二天

其實本身係諗住今日就會離開呢到去第二個城市，但因為d 行程同天氣問題，加埋尋晚冇去到毛利村，最後決定會係呢到玩多兩日先走。

今日朝早去咗睇一個地熱噴泉，其實就係係地底d 水煲到滾咗，之後每到一定嘅時間d 水就會噴出嚟。聽介紹講，d 水可以噴到廿米咁高㗎！本身仲覺得好神奇，點解會每日準時十點十五分就會噴一次，之後個介紹嘅人行出嚟，講一堆嘢之後就放d 嘢落個噴泉到，就開始噴水啦。唓！原來係落藥嘅，唔怪得咁準時啦！

其實如果佢唔落嘢，佢話其實大約兩三日左右就會自然咁噴一次，但可能因為要做遊客生意，點都要令佢噴嘅時間係控制到啩。落咗嘢之後，佢就開始嘔白泡，之後就開始噴水。根據目測其實佢真係吹大咗，頂多都係得十四、五米高，一定冇廿米咁多。噴之前，在場觀眾超期待咁等，到佢噴咗啦去到最高點之後，大家就已經冇興趣再睇同嗱嗱聲散水。

之後睇完我哋又去咗搵地方行吓track 睇吓景咁。最先睇嘅景係兩個湖，一個叫Blue Lake，一個叫Green Lake。我哋就係企咗係兩個湖之間，一次過哂兩個湖。最得意嘅係藍嘅就會有track 圍住個湖行一圈，綠嘅就冇，點解？因為個Green Lake 係一個毛利人私有嘅，所以政府唔可以攪個湖附近d 地。成個湖都可以私有化，真有霸氣。

之後揸車轉個地方再行，行上山睇唔同嘅lookout point。第一個係望到Rotorua 嘅全景，第二個就係望番我哋尋日去嘅地熱公園。雖然中間嘅景唔算特別，沿途中間經過一個樹林，d 樹係排得超整齊咁一行一行咁沿山上面生，果吓真係覺得超有電景場景feel。

行完之後我哋就去咗睇紅樹林。d 紅樹好多都生得好密同好高，聽講最粗嘅係需要六個人以上都抱得到成條樹幹。由於d 紅榭咁粗，所以好多人都會走嚟抱住碌粗樹嚟影相。當然我都唔例外，但算啦我唔貼出嚟啦。

北島環島遊 (day 3) 達陣地熱之境─Rotorua

今日朝早就出發離開Napier 再向北出發。離開之前，都係要上山頂望吓Napier 個景先走。上到山頂望出海先知，原來Napier 係呢邊有一個出入口碼頭，雖然比較起香港仲差好遠，但都見到唔少出口嘅貨櫃，當中仲有唔少物流公司嘅名都係我哋識嘅㖭。

之後我哋就向北走，目的地係一個叫Rotorua 嘅旅遊重鎮。雖然呢個鎮地方唔大，但由於呢邊係一個好重要嘅地熱公園，同時又係以前土著毛利人嘅居住地方，所以就變成咗發展旅遊嘅地方。

未到達目的地果陣，已經遠遠見到好多好高嘅煙柱係地下標出嚟，再近d 望就會見到d 煙其實係係d 岩石嘅罅隙走出嚟，攪到唔講你以為果邊有山火。

一去到地熱公園Wai-O-Tapu，一落車第一反應就係：「Shit！好臭！」係啊，真係好臭，因為地熱公園都有好大量嘅硫磺味。仲記唔記得你讀Chem 果陣有做過實驗聞過果陣臭蛋味？就係果陣味啦，只係呢邊因為量多濃度高，行得個公園耐真係臭到你會想作嘔同埋鼻都有d 刺痛。

咁個公園係咩嚟？其實就係因為呢邊係個溶岩接近地面嘅地方，所以會有大量地熱係呢到滲出嚟，同事呢到都有大量嘅礦物質，令到呢到有好多地方都會有煮熱水同泥漿嘅現象。

雖然好多地方都主要係黃黃綠綠色，主要係因為硫磺同硫化物，但都有d 唔同嘅色。其中最大最重要嘅池如果睇到嘅話，係可以搵到超過五種顏色㗎。雖然個國家公園唔可以用靚去形容，但都算一個好特別嘅體驗，起碼你係世界上都唔會搵到咁多地方有呢d 地熱嘢睇啦。

本身夜晚係book 去咗去毛利村參觀，但由於果到唔知做乜放咗我哋飛機，所以行程就取消咗，所以唯有再打算吓幾時再去啦。

北島環島遊 (day 2) 向東北出發，到達Hasting、Napier

離開北島南邊嘅大城市Wellington，我哋就開始向北邊出發。

今日朝早揸咗幾粒鐘向北出發，目的地係北島東邊邊嘅兩個鎮，Hasting 同Napier。兩個鎮都唔算話係咩大鎮，但係我哋backpacker 嚟講佢呢區最重要反而係因為呢邊有好多蘋果出產，所以好多人都會係呢邊逗留。

今日嘅長途車雖然我以瞓覺為主，但都有睇過吓呢邊d 風景。比較起南島，北島嘅山冇南島咁高咁有氣勢，同埋土地嘅使用率都比較高。係南島揸車會見到好多地都係未有人用，但呢邊會見到比較多嘅地已經有人用嚟畜牧同種植農作物。

到咗Hasting 之後第一樣去做就係食雪糕。呢邊有間家庭式賣雪糕嘅地方，聽講幾出名吓，加埋今日天氣暖笠笠，所以我哋幾條友就買唔同味，每種味都試吓咁。味道上佢真係幾好食，仲要有d 好多特別味，所以真係值得試。

之後我哋就去咗參觀蜜蜂場。果到有的俾人試唔同嘅蜂蜜，試過先知原來唔同花嘅花蜜個味真係有超大分別，唔係隻隻你都咁易接受咁易入口。比較過之後，原來紐西蘭國寶Manuka 蜜個味都幾好味。果到仲有show d 真正嘅蜜蜂窩俾你睇，望住幾百隻蜂係係到郁嚟郁去，我唔怕都有d 心寒，如果你怕蟲你應該嚇死咗。

之後就去咗山上睇景。山上可以睇哂Hasting 同週邊嘅全景，仲要望到吓Napier 同海邊。果然比較起南島，呢邊嘅地形都比較平坦，望過去都比較上一望無際，同埋都比較上青綠色d。

夜晚到達Napier，食咗個飯就出咗去行咗個圈。本身yha 仲話係海邊行夜景唔錯，但紐西蘭始終都唔係咁啱行夜街嘅地方，一來呢邊一入夜就冇哂鋪，二來呢邊人影都唔多隻，冇氣氛有乜好行，所以我哋行咗一圈就番歸啦。

北島環島遊 (day 1) 遊紐西蘭首都威靈頓

話說尋晚到咗北島到咗威靈頓之後，都係出去超市買咗d 嘢就番宿舍煮飯瞓吓。所以嚴格嚟講今日先係我第一日開始遊北島。

威靈頓係紐西蘭首都，同時都係紐西蘭第二大城市。尋日一到步，我哋幾個都忍唔住講句：「哇高樓大廈啊！」攪到好似鄉下佬出城咁。比起香港呢d 濕濕碎啦，但留咗係南島耐，先記得原來大廈係咁嘅樣㗎。

今日一朝早就去咗坐纜車上山頂。4蚊紐紙5分鐘就到山頂，架車仲要有幾分似香港果架㖭。上到山頂，望番落去威靈頓，第一個問題就係：「咦個城市咁白咁嘅？」係啊，就係唔知點解個城市個顏色好白，但同樣都覺得幾靚。之後我哋就係山頂行番落去，沿途經過一個植物公園，所以咁樣行番落山都幾舒服吓。

之後我哋就去咗國會大樓參觀。威靈頓作為首都，國家級嘅重要建築物當然係呢邊。呢邊個國會大樓名叫bumblehive，因為佢個外形堅係圓桶形成個蜂巢咁。話說其他國家我唔知有冇，但呢邊個國會大樓係對人作有限度嘅開放俾人參觀。雖然一個小時嘅tour 就悶悶哋，但可以參觀國會大樓，睇吓真正嘅國家級建築物內部都算幾特別嘅。

最後我哋就去咗呢到嘅博物館參觀。雖然聽講呢個museum 好似未及奧克蘭大，但起碼都有幾層樓高，起碼稱得上國家級嘅。個人覺得入面展品雖然唔少，但成個博物館都幾亂吓，d 展品東一忽西一忽咁，攪到成日都唔知自己睇緊乜。但值得欣賞係，由於最近就嚟到一個叫Anzac day 嘅日子，係同d 世界大戰有關嘅日子，所以佢有個新嘅展覽館係同一戰有關。裏面嘅展品都特別，同埋d 製作都好認真，最令我驚嘆就係佢有d 幾米高嘅超大臘像真係整到超真超細緻，令我不得不停低睇多幾眼。

威靈頓雖然我哋只係短短係到留兩晚玩一日，但俾我個感覺都唔錯，幾有歐洲嘅建築風格同特色，唔怪得唔少人同我講都鏗意呢到。

別離總是會帶點傷感的─離開南島了 (下)

最後我都係想講吓離開南島嘅感覺同感受。離開南島前呢幾日，我其實已經開始有d 唔捨得，可始係到倒番轉諗，原來半年時間真係好快過，初初嚟到就覺得好難過d 時間，但宜家習慣咗，其實已經冇咗果個感覺。

「喂你講哂啦，又係你自己lur 地要提早走！」老實講我從來都冇話紐西蘭唔好，呢到風光明媚，生活簡單、容易，對小朋友同老人家嚟講真係一個好好去成長同養老嘅地方。但我要早走係因為我唔鐘意係呢種做勞工嘅感覺。今日我仲係處於一個事業黃金期，我真係開始覺得我係時候番番去做自己應該要做嘅嘢。今次我嚟只係玩吓體驗吓，呢類工作只係我作為旅費嘅來源，賺夠啦浪費夠時間啦，其實我知道自己應該去面對番自己嘅社會。

如果有一日我真係有錢，我可能會選擇呢到作為我渡假同休息嘅地方，或者我會係係到投資移民拎番個戶籍，買番間屋同車，得閒無事就過嚟fing 吓。但事實我真係接受唔到係到呢到作為我長住嘅地方。

初初嚟到真係有太多黑仔事，令我自認自己做地獄黑仔王，但慢慢我開始我已經冇咁黑，冇咁失落，好可能要多謝我嘅partner。其實本身係係北島識佢好短時間，初初佢嚟搵我其實都有好多磨擦，我地嘅生活習慣都有唔少落差，例如我哋煮飯嘅方式啦，食飯嘅口味啦，對工作同住嘅要求之類。但慢慢我哋都學識互相遷就對方。

曾經我都試過激到佢嬲到爆，攪到我都唔知點氹番佢好。曾經試過我都嬲到唔睬佢幾日，但最後係解決咗。我哋性格上係有d 衝突嘅地方，兩個都係d 唔細心、任性嘅人，鐘意點就點，亦都唔係好識睇人心情講應該講嘅說話，但過兩個月其實我哋都開始知道對方其實諗d 咩同需要咩。

到我走咗我先漸漸發覺我已經習慣咗佢係到陪我吹水、陪我食飯、陪我分享工作嘅樂與憂、陪我講吓d 三姑六婆嘢…離開佢過後先發覺比我想像中更唔捨得。

最經典試過一次係佢果日無啦啦放工時間等咗好耐都未番屋企，全屋人都問我佢去咗邊，但問題係我都唔知，因為佢電話又唔通，又冇講低咩事。我一路煮飯，一路個人都好焦急唔知佢去咗邊，終於天黑果陣同個朋友揸車沿佢番工嘅路去搵佢。結果係佢OT o到八點幾，果一刻我真係有d 嬲嬲地，但比起嬲，其實我係放心咗落嚟多d，因為起碼知佢冇咩事。果次先知原來自己真係比想像中緊張佢。

真心多謝佢係呢段日子陪咗去對面唔少生活上嘅問題，陪我搵工、陪我買車、陪我去玩，同埋帶俾我呢兩個月嘅快樂。

走嘅呢刻，我係的確有d 唏噓，好似突然就得番一個月就番番屋企。呢到發生過唔少事，有好都有唔好，但點都係d 好珍貴嘅回憶，一d 我一生都會唔記得嘅人和事。

別離總是會帶點傷感的─離開南島了 (中)

尋日星期五，終於要出發離開南島、離開基督城啦。因為基督城係係南島東邊中間嘅地方，之後上北島坐渡海輪係需要番番去南島北邊嘅地方，所以就要一個人揸車上去。嚟紐西蘭咁耐揸車嘅日子都唔少，但第一次行長途車六粒鐘都係自己一個人靠聽歌頂住就衝上去。沿途有幾次真係眼瞓到差d 揸揸吓都瞓著，揸長途車其實真係要知道自己太眼瞓就需要搵地方休息吓，特別係你一個人果陣同埋前一晚其實瞓得好少。

由於天氣好好，沿途都有唔少靚景睇，攪到我都忍唔住停咗幾次望吓先走。之前一路係南島太耐，睇景都睇到慣哂，可能因為今次知道自己真係要離開啦，不自覺都會睇多幾眼先走。講真，南島嘅美景我冇辦法用文字去描述，只有親身嚟過你先會講一句：「屌會唔會靚到咁過份。」

最後夜晚就到達咗南島最北嘅大城市Nelson。Nelson 俾人嘅感覺同Christchurch 好唔同，同樣都算係南島嘅大城市，Nelson 個感覺其實比較上有建築風格同有味道d，個人覺得成個城市都靚d，俾到少許歐洲感覺我。可惜行程計劃所限，都冇機會係呢到玩埋先走，希望過幾年仲有機會番嚟就係到玩吓啦。

今日朝早還咗車，就係到等我兩個朋友嚟接我。接咗我之後就衝到坐渡輪嘅地方，正式係今日同南島講聲再見。下晝十二點過d 就上船，一點幾開船，差不多成五點先叫落到船。上船果陣，發覺真係有唔少人都嚟坐車，保守估計真係有五、六十架車上船，有d 仲要係大貨車，可想而知架船到底有幾大。

本身我朋友仲話呢d 大船應該會好定，同我講話好似我坐A380咁大架飛機都特別定啦，船1=都一樣道理㗎啫，點知今日個海超大浪，fing 到架船你企都企唔穩，如果你易暈浪d 果類人你起碼嘔咗幾轉。之後我仲要係超大浪嘅情況去到甲板頂層睇，大風加大浪我想企穩d 都難。雖然個海真係好藍好靚，但真係冇乜景特別可以睇，開到中間果陣真係得兩邊大陸個影睇到。

別離總是會帶點傷感的─離開南島了 (上)

星期四其實我係專登留呢日出嚟，提早一日唔撈，等自己係基督城最後一日可以做吓其他嘢。執吓行李又好，去玩吓行吓都好。

結果朝早就去咗之前講果個南極館去玩。南極館入面其實都幾細吓，入場價錢都唔係平，初初仲驚會唔會呃錢㗎。但玩完發覺其實都唔錯，細就細d 但勝在d 嘢夠特別。第一特別就係個模擬南極嘅雪房，平時間房就係八度，但佢每個零鐘就會開一次模擬風暴，模擬係南極有大風吹果陣到底有幾凍幾難頂。望住佢寫住d 風速越黎越大，溫度由零下八度變到零下十八度，真係唔好講少其凍到喊出嚟。

第二特別就係個南極車。佢果到有幾架南極探險車，係俾人真係親身去體驗試吓坐既滋味。佢專登整咗個場地去模擬番南極d 地形，好似山丘、地洞同水窪，俾你感受吓架車係呢d 極地行果陣到底係點。你咪講笑，雖然又未到過山車咁誇張，但佢揸住架嘢衝上山丘又衝番落嚟果嘢真係刺激但又幾恐怖吓。

youtube一段人哋錄嘅片：https://www.youtube.com/watch?v=qlHlPDckZJU

第三特別係喂企鵝，係呢個館我最鐘意嘢。先唔講企鵝得唔得意呢個問題，呢堆企鵝其實都係d 有殘缺嘅，話說佢哋每年都會救好多企鵝，9成幾救得番都可以回歸大自然，但係館入面養果d 就全部都係唔可以番番大自然生活果d。今次係第一次咁近見到企鵝食嘢之餘，佢個館d 設計令你可以好近咁見到企鵝們係自己個窿仔(即係佢屋企)做d 乜同埋係水底角度超近見到佢哋游水，堅係睇到幾興奮。

睇完南極館，夜晚全宿嘅人都出哂去一齊食飯，話同我食最後一餐咁話，攪到我變咗主角，真係受寵若驚。雖然生活上係會有磨擦，但呢個家真係一個好好住嘅地方，所以離別一刻其實都真係唔捨得呢個家同呢個家嘅各位。

剝青口工人第廿一~廿三日，成個廠嘅工作都俾我玩哂

話說今個星期做多三日就收檔唔撈，加上星期一係冇counter 嘅日子，所以實行hea 住過呢日算。上次冇counter 就俾人捉到我偷懶，今次我交足哂戲，加上我都就走，就算我俾佢見到hea做佢都應該廢事理我啦。衰咗一次，今次點都要學識蠱惑d 㗎啦。

星期二一開工，supervisor 突然行埋嚟同我講話你就嚟last day，所以想我可能呢兩日去packhouse果邊幫幫手。做完先知，原來packhouse果邊d 人都係人球嚟嘅，不停會俾人踢嚟踢去。入袋啦、grading啦、裝箱啦，有時仲要過番去幫手開青口，總之呢邊其實係不停係幾個岡位換嚟換去。果日最後果round 去幫手開番青口，開完仲要去問supervisor 洗唔洗幫埋backhouse 先走。佢話你自己選擇想唔想，唔想就自己收工先啦。結果我係有幫㗎，因為做多一粒鐘就呃多一粒鐘糧啦！

果日最抵死係走之前仲要跟咗個同事入雪房睇吓乜料，真係凍到嚇死人，係零下十八度啊！當時我係短衫工人服入去，一分鐘後隻手已經開始彊硬麻痺，真係難為兩個男同事仲要日日係呢到出入。佢哋話呢到有兩個雪房，一個係呢個零下十八度，另一個仲癲係零下三十二度，用黎急凍d 青口，不過果個就好少會出入，除左我平時成日見到入面打瀉哂青口要入去執啦。

好啦，星期三，以為今日又要做人球俾人踢嚟踢去，結果今日好平靜咁開咗幾round 青口就放工，好平靜地就last day咗。雖然完全冇唔捨得呢間廠，但點都想影吓門口，等自己記得自己係呢到臭咗廿幾日啦。

學徐志摩果句：「輕輕的我走了 正如我輕輕的來」

剝青口工人第十七~二十日，週末當然要出去行吓㗎啦

呢期少咗寫blog，因為呢排真係主要係番工，都冇乜特別要記。

上星期二係放完四日長假後第一日工作，果日真係辛苦到嘔。我發覺，原來做呢重複性工作，休息完之後第一日番工，個人會完全唔入狀態，攪到果日開得慢咗，個人完全冇mood 冇動力去做，超辛苦先捱到收工。

之後幾日都係我開咁耐青口開得最辛苦嘅幾日，點解？因為都唔知做乜鬼d 青口好硬，攪到超難開，我連想拗開隻青口都要用好多力，咪話開得要快，開多幾隻都手痛！星期三果日我一round 兩個鐘比平時開少咗二百隻，但睇番附近d 同事，原來大家都開少咗，我諗大家都樣一樣覺得太難開所以開慢咗。

不過我我已經同manager 講咗下星期做多三日就會辭職唔做。其實我已經決定咗下星期五就會離開南島向北島出發，預備同朋友會去北島行個圈，之後就會開始休息同預備離開紐西蘭，所以嚟緊又需要勤力d 每日寫遊記啦。

最近呢邊天氣都唔係咁好，同埋呢幾日越嚟越凍，感覺上冬天好似就快到咁。其實係基督城走之前都仲有d 地方想去埋先走，一個係動物園，另一個係南極館。前者唯程度上係因為天氣唔穩定所以都冇好大決心去。雖然本身今日星期日天氣出乎意料地幾好，但最後都係因為partner 話唔出去所以放棄咗留係屋企煲吓戲算。後者可能會過幾日走之前自己去，但暫時都仲要睇吓係咪真係有時間去。

尋日星期六，天氣雖然未係話好好，但都唔想百無聊賴咁係屋企，所以都係出去行吓郁吓。今次去咗一個叫Crater Rim 嘅地方行，本身由另一條track 出發行上去，去到想行果條track 已經大約已經用咗一個幾鐘。之後上到去，呢個Crater Rim 其實係圍住個大岩石行，我哋仲搵有冇路可以行上頂，但發覺其實冇路所以放棄咗。今次行track 個景的確唔錯，一邊可以睇到基督個全景，另一邊又可以睇埋佢海果個景。最後我哋來回都行咗三個零鐘左右，但完全唔覺得累，仲有d 想行唔夠㖭。

放假當然就要去玩啦─復活節篇(下)

星期日，平時都冇咁多鋪係唔開門，但今日可能係因為夾咗係兩日公眾假期中間，所以超多鋪同商場都冇開。好耐都冇一個人出去行吓街輕鬆吓，所以今日就一個人自己出去行下。鋪又唔開商場又唔開，去邊好？結果就一個人去咗d museum睇。第一個係Canterbury museum，係基督城最主要嘅museum。本身都唔覺得有咩可以睇，但估唔到細細哋一個館都算幾多嘢可以睇，最正就係有我最鐘意嘅恐龍骨睇。可能你哋唔知，我細個好鬼鐘意恐龍，雖然大個咗但依然都會幾鐘意睇博物館d 恐龍骨。

睇完個館，佢出面有個博物館花園，果日都有唔少人係到行。個花園其實係呢邊基督城其中一個旅遊景點，個感覺其實有d 似一個植物公園，好多唔同嘅花草樹木有哂介紹咁。最得意係佢中間會有幾個植物屋，養住d 唔同品種嘅植物，例如係仙人掌、松樹同亞熱帶植物咁。老實講真係冇諗過會係紐西蘭都會見到呢挺植物。

之後行完就轉場再去另一個空軍博物館。真係唔睇都唔知呢邊都有軍隊，睇番佢介紹嘅歷史原來世界大戰佢哋都有參與。博物館展覽嘅主要係講第一次、第二次世界嘅嘢，好似係德軍、日軍用嘅槍、武器、隨身物品、醫療用品等等。另外最緊要嘅展品當然係飛機啦！裏面展出咗唔少舊時打杖時期嘅飛機、直升機同軍用客機等。我冇深究過呢d 飛機係真定係模型嚟，但我見到其中隻直升機入面係有哂d 控制桿同錶板，所以我相信應該係真嘅機會多。雖然博物館展品幾正，可惜就少咗d，大約行咗半個鐘就睇完哂d 嘢。

星期一，本身以為天氣唔會好，諗住留係屋企毒吓就算，點鬼知天氣又鬼咁好，所以就出去行吓d 短track 順便睇吓風景。其實係Christchurch 有唔少track，但我發覺全部係係果兩座山到，同埋d 入口唔太知係邊，所以就揸車上山兜吓見到邊條就行見邊條。雖然最後只係行咗條好普通嘅walking track，但起碼都遠遠見到Christchurch，總算叫有d 收鑊。