車厘子包裝廠第十九~廿二日，重回「摘」男的日子

呢排由於番工番到好累，講嘅嘢都係講番工又冇乜相，所以少咗寫個blog。過兩日開始環島玩十幾日，將會連續寫番一堆出嚟，仲應該會有圖有真相，大家期待吓啦。

早幾日星期日番工，嗰日無啦啦又話後面pack house搬箱果邊忙需要我去搬箱。明明之前都表示我唔太想搬，但算啦都係搬啦。之後搬到收工前夕，今次真係feel到我隻手可能真係唔太頂得順有d 痛，真心驚再搬落去會扭親，所以收工果陣都係同佢再講話唔想再搬啦。

好彩之後兩日風平浪靜冇再叫我去搬箱，雖然feel到佢有d 唔想我留係到sort果，成日借d 機會嚟話我sort得差，但為咗果雞碎咁多錢，都係死死氣做到完季先算。

之後星期二晚收工，突然聽到另一間大cherry廠話請d 臨時工話想趕埋最後兩日完季，所以就果晚即刻打去問係咪有工開(其實就係之前話同宿好多人去做搵錢比較多果間，詳情可以睇番第八~十日果篇)。之後打去，佢話佢需要人摘果，果下聽到即刻就話去玩兩日。同舊東家周旋之後，最後都係放行可以轉工。

其實我從來唔討厭做摘果嘅工作，係就係辛苦d 同有d 危險性，但其實幾好玩。今次再番去摘果係一來因為錢啦，起碼摘得快可以錢多d，二來都係想再挑戰多次，睇吓自己係咪真係咁慢。結果，第一日係少正常工時個幾鐘嘅情況吓摘咗廿五，第二日係八個鐘入面摘咗三十。正常minimum pay就要求你三桶一粒鐘，我計番就摘咗三桶幾一個鐘，完全合格仲要賺凸。但點解我會摘得快過以前？其實唔止係因為我真係摘得快咗，另一個原因係季初果陣d 果唔及宜家靚。點都好啦，

辛辛苦苦終於完咗個季啦，雖然儲唔夠成個環島要嘅錢，但幫到一大半已經算係咁。正所謂Working holiday，working 完咗咪holiday囉，冇銀兩咪再番去work 過。

早兩日收工，無聊冇嘢做又去咗河邊玩rope swing，今次做足哂準備，預備好哂幾時會落水，發覺原來真係好好玩，哈哈！唔怪得河邊咁多條俾人玩啦！

車厘子包裝廠第十六~十八日，重遊Lake Wanaka

做咗兩日搬箱工，到星期三起身已經feel到個人已經好累，唔係好頂得順。結果星期三開工，又係要做搬箱。哎冇計頂硬上啦。辛辛苦苦捱過咗星期三，好彩星期四day off，可以休息一吓。

到咗星期五再開工，我問supervisor今日去邊，結果又話要我去雪房搬箱。我真係迫於無奈同supervisor講，可唔可以轉番去之前做，因為日日做真係好累頂唔順啊。當時佢講咗句："You are a young boy!"就叫我收嗲入雪房。無奈到爆，一來我真係做唔慣，二來我都係人嚟㗎，男仔就唔會累㗎咩，雖然真係嬲嬲地，但都係疊埋心水番入雪房啦。但入到雪房，做咗唔夠五分鐘，我同事行埋嚟同我講話如果我真係想番出去做就番啦，因為呢邊已經冇之前咁忙，我唔留係到幫手都得。

之後我終於番番出去原位做啦。但冷靜d 去諗吓，自己都有d 唔啱，人哋請我番嚟就係想我幫佢手，佢又冇講明我只係做選果，如果佢request我去邊幫手，講真我都唔應該多嗲。但我同佢講嘅原因係主要覺得除咗我太累，另一個原因就係有d 唔fair啫，因為packhouse又唔止我係男仔，點解一定要長期捉我去雪房，搵第二個人同我輪流又唔得？結果我收工都係同supervisor講咗句sorry，佢都話佢理解我難處，和平解決咗件事。

宜家個季節都就完啦，應該做到下星期五就會冇工番。原來我不經不覺都做咗咁耐，同時睇吓日歷，原來我嚟咗紐西蘭都兩個月。

好啦轉話題講吓我休息做過乜啦。星期四係我連續番工十日後第一日真正休息日。其實我都冇預過佢無啦啦會休息，因為都以為都就完季啦，休嚟做乜。咁無嘢做就重遊Lake Wanaka啦(有興趣睇我上次去發生咩事，可以睇番聖誕節果篇)。上次去就做埋d 消費活動，今次去就做番d 健康活動─行山。今次行呢條其實比較短，山都唔算高，45分鐘就上到山頂，山大約500m高。冇計啦，已經做埋d 累工，所以行條短嘅有風景嘅就算。雖然唔算高，但上到頂都見到Lake同個鎮，已經夠哂唔錯。

車厘子包裝廠第十四~十五日(苦力篇)，好靚嘅南半球星空

尋日，我開工咗廿分鐘左右，主管又叫我個名。都成日唔明點解咁鐘意叫我個名，攪到成場人都知我叫咩名。心諗，今次又乜料。佢突然問我，有冇帶厚衫，我話有係車，佢就叫我跑番去拎。

原來，佢雪房入面少咗個搬箱佬，sorter入面得兩男仔，可能覺得我好似有氣有力d，所以就捉咗我去搬箱。雪房入面大約只有幾度，我要做嘅嘢就係要幫佢不停入箱同搬箱。主要我係要不停接d 2kg嘅箱仔，之後將d 細箱入落個大箱，一個大箱可以裝6個細箱即係淨重12kg，之後就要搬同推走佢。有時同事唔夠手，我仲要幫佢將d 12kg 箱疊起佢，呢吓係最累最重嘅。另外有時又要搬d 5kg 箱，呢個size唔洗入大箱，但又係要疊起佢。仲有時係對面d 入箱同事太多入唔切，我都要幫佢哋將d 細箱車厘子包裝好同上蓋。

講真呢邊job有好有唔好啦。好就係其實冇咁悶，因為唔係企死係到有得郁嚟郁去咁，d 時間會易過d。唔好就係，搬箱真係累到喊出嚟，做咗兩日，成個背脊同手臂都酸痛到喊出嚟。不過凍就唔算好凍，因為不停咁郁個人都唔會話乾企冇熱量。

呢個時間，如果屋企人見到，又會講句：「唉，讀飽哂書，堂堂大學生，做乜千里迢迢就去做人咕喱！」

「天將降大任於斯人也，必先苦其心志，勞其筋骨」

我由細到大，都覺得個天待我不簿。自問個天俾咗個唔錯嘅腦俾我，學業事業其實都幾順利。我一直都覺得自己絕非池中物，能力上絕對可以創一番事業。但當一個人太幸福太順利，又點會識得去面對逆境？呢一年嘅working holiday，做呢d 苦力，就當係當自己嘅磨練，我覺得唔會話係冇meaning嘅。

好啦，講d 開心嘢啦，前幾日我撻係張床果陣，無啦啦外面d 同宿朋友係到哇哇聲叫，原來係到睇星。出去一睇，超正，好靚啊！之後佢哋就叫我教佢哋認吓星，我鬼認到咁多咩，都係認到d 香港都見到嘅冬季星。

嚟咗呢邊咁耐，一路都冇乜機會專登行出去睇星。尋日見天氣好，我又走咗出去認吓星，對住個星圖app 係到認星，真係有d 懷念以前大學同中天去睇星嘅日子。
(由於冇相機，所以d 相係由宿友提供)

車厘子包裝廠第十一~十三日，凍冰冰去浸水

呢幾日番工時間好唔穩定，真係俾佢玩死。本來又話尋日星期六會番得耐，今日星期日就番半日，點知尋日無啦啦話唔夠果半日就收左皮，轉做今日full day。好啦到今日，又話今日會做到好夜，點知突然三點半又收左皮，真係神又係佢鬼又係佢。大家都係到抱怨d 工時太唔穩定，所以今日係到隨手數數原來同第一日比我哋都走咗一半亞洲人。呢邊錢已經少，工時又時長時短咁，死啦真係有少少後悔做乜唔博一鋪轉第二間果園。

今日lunch time之後，我嚴重飯氣攻心，我對住d 車厘子我眼瞓到喊出嚟，之後死撐咁撐開隻眼。但我一路做，我直頭眼瞓到係連想對焦都對唔到，前面一堆cherry，我真係淨係見到d 紅色影。睇唔到嘢咪是但將d 果推哂去運輸帶ok 果邊，反正後面都有人幫我check㗎啦。雖然係就係衰d，但我都唔想㗎，我真係眼瞓到盲咗，又唔可以話自行去休息。

尋日無啦啦變咗short day，番到宿舍，同宿有另外一個朋友今日都short day，無無聊聊就捉咗佢出去個saturday market。出到去，冇嘢睇就諗住去超市買嘢番屋企啦。

去到超市，無啦啦我同事打俾我，問我得唔得閒有冇地方去。我話冇啊，佢哋就話見面先再講。見面之後苦惱咗好耐去邊，終於有人話不如去游水啦，去佢之前去過一個溪邊游水，咁大家就去預備d 嘢。但搵咗好耐，都搵唔到佢講果個地方，左兜右兜，仲要去錯咗個唔係俾人游水嘅河邊track，唔俾游係因為條河水流都好急好深吓。

個河邊有d 俾人用嚟係河上面蕩嘅繩，係連住棵樹同埋一條木條仔，唔知係俾人坐上去定係揸住黎玩。之後我好勇咁揸住條木條蕩咗出去一吓，已經feel到好似好易會跌咁，但第一下都安全番番上岸，之後我雖然淆淆地但又再蕩出去，今次就仆咗落水。落到水，好彩岸邊d 水流唔算太急，我感覺到d 水其實好深吓，就算我算幾熟水性我都覺得幾危險吓。
(唔明可以google 圖片搵搵 rope swing 你就大約會明)

濕住身番上車繼續搵游水地方，之後千辛萬苦終於到啦。其實果條係一條好淺嘅河，去到已經見到一家大細嘅鬼妹鬼仔係到游水。老實講，d 水真係凍到喊出嚟，同埋又太淺其實游唔到咁多所以想游暖個身都唔得，所以我都好快就上番岸。雖然有d 戇居搵咁耐都係游得一陣，但咁大個仔都係第一次係呢d 地方游水都算幾特別。

夜晚為咗拎個包裹，番咗去之前個鎮仔，順便同d 朋友見吓面。大家見面嘅話題都不外乎講搵咗幾多錢啊做得幾快啊等等。點都好啦，見吓朋友總算係過日日番工嘅日子中嘅娛樂嚟㗎啦。

車厘子包裝廠第八~十日，反思自己

番左工十日，身體都好似開始適應咗d，冇之前收工咁累咁辛苦，但間中收工番到屋企都好似有d 覺得自己好似有d 發熱咁，可能係成日係間凍房嘅原因啩。

尋日我同宿有朋友收到個另一間pack house嘅offer，果邊問佢仲有冇朋友想要工作，佢二話不說就質咗個電話俾我叫我accept埋個offer。當時我都呆咗，之後accept咗，但掙扎咗一輪都係決定turn down唔轉工。

點解我要掙扎？原因咪又係錢。我呢邊拎就係拎min pay，工時唔太穩定，講真真係要錢我呢邊唔係咁好。咁果邊呢？工作長，有bonus制，你真係快手嘅話，隨時一星期賺到我宜家呢邊一個半甚至係兩星期嘅錢。但同樣地，你真係要俾人罵，要承受壓力，同宿嘅朋友做緊，佢哋話你真係會望住前後左右d 人好q 快，但你又追唔上人地，不其然咁俾壓力自己。

講真點都會有少少唔甘心，但我問自己，我嚟呢到我根本就唔係為咗錢，呢d 快錢人哋咪又係搵得一頭半個月，同你係香港炒iphone 嘅情況差唔多。講真我要錢，我留番係香港都有可觀收入啦，況且我係呢到搵錢我都係為咗之後用嚟去玩啫，何必咁著緊呢？暫時我宜家呢份工計過做完呢個月，起碼夠幫補我下個月同朋友去玩，已經夠啦。仲有我自問自己根本就做唔到咁快，呢d 錢真心冇能力去搵。

係呢邊我都真係有時都會變得思緒混亂，連初衷都唔記得。我尋日心情唔太好果陣，望住前面成堆車厘子，我係到問自己，我到底係到做緊乜？我做乜係到做乜d 唔用腦嘅工，而係到荒廢咗個腦？

我甚至係到諗，係咪要提早快d 番香港呢。其實，會令我提早番香港，除咗身體真係病到不行鳥同埋香港有d 我唔番唔得嘅事發生之外，我真係唔想咁快就番去。呢排胃痛發作幾次，我真係擔心會唔會再落去嚴重到要香港攪攪佢。宜家我可以做就係自己小心飲食同埋食番d 胃藥幫幫佢啦。

慢慢我都開始認清自己，到底我係一個咩人。有d 嘢你唔試過、做過，你根本就唔知邊樣係啱你多d。唔試過一d 其他嘅工作，我有點知到底點樣嘅工作更啱自己呢？

呢排比較多感想文，冇乜相好貼，唯有係呢到貼張大大粒車厘子相啦。呢粒嘢係直徑32+級嘅，我唔算太鐘意車厘子，但呢隻真係好大好甜好多汁，好啦，大家望"車"止渴啦。

車厘子包裝廠第六、七日

前日第六日朝早一開工，就見到有個女同事無啦啦摸住個肚攣住個人，面都青哂咁同supervisor講話要休息一吓。之後見佢好似十分鐘之後就番嚟繼續開工，以為佢女人痛啫。佢係香港人嚟，之前都冇同佢特別傾過計，但見佢break果陣好辛苦咁，所以咪問吓佢咩事。原來佢係胃痛，我問佢係咪第一次，佢話佢之前都間中有，聽到之後我好身到感受。

我同佢講話如果真係唔舒服不如早退啦，另外又同佢話聽日可能放假啊，你可以休息吓啦。但佢都係俾同樣嘅答案我：「唔得啊我要搵錢！」咁又唔怪得佢，佢得果廿歲，邊識諗咁多啦。

其實嚟working holiday啫，洗咩咁博啊。對佢嚟講可能真係唔同諗法，但始終我都係覺得錢啫，呢邊搵得幾多啊，真係要錢番香港搵啦。呢邊先得個min pay，捱壞咗個身體，為咩啫？

今日第七日，番工途中見到一隻超肥大嘅黑貓，已經心諗，唔通今日會超黑仔？果然，八點到公司，乜人都冇，我就問個男supervisor，乜今日唔係開八點咩？佢話今日開十一點啊。"shit!"我好自然咁講咗出口。

故事仲未完，個死八公捉住我同我講，佢話我哋supervior同佢投訴話我做得好乸西，成日龍爪手拎一大堆cherry上手，但又唔係真係睇d cherry，又話我成日係運輸帶上面將d cherry推嚟推去，都唔係真係做嘢，如果我今日唔做番好，今日就係我last day。

真心燥咗。我成日企尾位，通常企運輸帶前面d 人都sort 咗，運到落我前面都係"supposed to be sorted"㗎啦，所以我都係recheck佢哋，同埋通常都係一大堆咁嚟，你仲叫我一兩粒咁拎上手check，點check？本身我企頭位，我真係會幾粒幾粒好細心咁check，但企尾位我點睇到咁多？

結果，今日我都係做下戲，逐粒逐粒卒佢睇。雖然過咗骨，但因為呢邊工時不穩定，加埋今日呢單嘢始終頂住條氣，我都係睇下會唔會轉其他廠做算啦。

其實尋日我放假，第一次煮日式咖哩俾d 宿舍d 人食，報答佢哋幾個之前幫過我。第一次煮，好彩有人幫吓我買吓餸同研究吓點煮。煮完之後，冇失敗到，大家都話好食，都算幾欣慰，哈哈。

車厘子包裝廠第二~五日、剪髮趣事

辛辛苦苦番咗幾日工包裝工，終於有d 時間出黎玩wifi同update下個blog啦。

做咗幾日呢份工，總結吓有咩辛苦之處啦：
一. 隻手凍到麻痺：因為d cherry 要雪咗先再處理，你已經係個偏凍嘅pack house做野㗎啦(around 20度)，你隻手仲要長期摸d 得4-5度嘅cherry，真係做到手都凍傷。我做到第三日，已經開始手指頭凍到有d 痕痕痛痛，但見d 人仲係唔帶手套咁直接做，佢哋真係超博。之後呢兩日開始帶手套做，雖然代價係冇咁靈活，情況已經改善咗超多。
二. 長期又熱又凍，體溫失衡：出面有太陽曬就成30度，入面就得20度左右，我開始發覺個人冷熱感覺會攪到有d 怪怪地，break果陣出去曬完太陽，再番入去會覺得個人發緊熱但又好似怕怕哋凍咁，個感覺真係驚，驚真係凍病咗。
三. 企成八、九粒鐘耷底頭，攪到腰背痛：衰d 講句，咁大個仔都未試過要做嘢企咁多個鐘，仲要保持差唔多姿勢成日。可能係唔慣啦，宜家真係好酸痛同好累，希望遲d 習慣咗就ok啦。

總結啦：辛苦就辛苦，預咗，同埋我可以捱幾耐就盡捱啦，因為唔番工，就冇錢，真係好現實。宜家已經開始掛住以前仲可以舒舒服服坐office 仲要有份唔錯嘅糧嘅日子，唉...

好啦講另一件趣事啦。話說嚟咗成個幾月，d 頭髮開始長，所以就諗緊，點算好呢，我又唔想做長毛，但剪又唔知搵邊個剪。

之後我出town問一間理髮店，打個價，同我講35紐紙，果吓我當場「屌」咗聲，好彩佢唔識聽。咁番到屋企，諗住叫d 同宿朋友幫拖，死就死博一鋪啦。

我朋友本身已經幫我剪咗少少，房東路過見到，同我哋講，洗唔洗幫幫手？我問佢，咦你識剪？佢話佢原來正職係理髮師，剪咗十八年，但因為職業勞損冇再做落去。感謝主，我得救了。

之後同宿兩個男仔早幾日互剪完，剪到一岩一忽，房東都好好人咁幫佢哋救番個頭，特別係其中一個，我哋細心睇先發覺個頭完全係一忽忽咁，笑到我哋肚有腹肌。宜家大家都知有理髮師係到，房東有排忙啦，哈哈。

車厘子包裝廠第一日 (一四年一月五日 晚)

經過千辛萬苦，我終於搵到工番啦，仲要係pack house工，唔洗日曬唔洗爬梯，危險性就會低d，但同樣地要企足咁多鐘，同埋長期向下望住d 車厘子(特別係因為佢有個木架俾你企去上塾高你，主要驚d 女仔唔夠高，但對我哋男仔反而又攪到高得濟sosad)，今日番到嚟真係頸背腰都酸痛。

同大家解釋一吓，通常果園請backpacker嘅角色有d 咩啦。一開波，當然係需要d picker去做摘果，一開波摘果陣已經要求你唔好摘d 太差嘅果，未熟唔好摘，爛嘅就掉咗佢。摘完之後，就會送去pack house 雪藏一排，之後再俾d 叫sorter或者grader嘅人做蒒選後，就俾d packer去入箱、出貨。而今日我做嘅就係sorter啦。

每間sorter嘅要求同做法都有d 出入，比較多就係每人會sort自己一桶嘅果，之後每日會盤算你sort咗幾多，做得多嘅話就會有bonus俾你，但同樣哋果園就會知你做得幾快，太慢又可能會會小你。我呢一間就唔係，佢係流水式咁倒一堆果出嚟俾你去sort，幾個人一行咁去做，所以唔會知道你一個人做咗幾多，揹鑊機會就細好多，但同樣哋你唔會有bonus。不過唔緊要啦，我都係但求hea做有min pay逗，啱哂我心態。

第一日都大家都各自為政自己做自己，做緊嘢果陣完全唔同人傾計，但好彩都仲可以聽吓歌，如果唔係真係悶死。暫時break同lunch果陣都係自己圍內咁傾計，最慘仲要冇朋友同我一齊入嚟做。今日都冇識到朋友，所以遲吓除非同人傾到計，如果唔係都有排悶。

暫時第一日感覺都良好，我諗除非之後慢得濟或者乸西太俾人炒，應該今次我唔會做五日閃人㗎啦。

在外地過的一個new year@Queenstown

既然都搵唔到工，留係屋企都係無無聊聊，所以倒不如出去d 城市地方行吓睇吓，感受人哋過節嘅氣氛。

前日神咁早就出咗去，好黑仔地今日呢邊天氣超差，揸車途中已經落毛毛雨，同feel 到有d 凍。因為時間早嘅關係，人都未算太多，同冇咩好做，出到去都係亂行亂兜哂吓時間。

開始入夜之後，開始越嚟越多鬼佬，雖然天氣越夜越差，但佢哋d  情緒越嚟越high。之後開始差到又風又雨，我連遮都吹爛埋，凍到要番車拎羽絨，仲要大雨到上番車就唔想落番車。

雖然聽落好似好無聊咁，但去到count down前夕天氣開始好番d。成晚我覺得最happy嘅moment就係睇煙花。一路等到count down完，放煙花，哇好正啊，我好似都係第一次咁近咁睇煙花。望住個煙花真係係頭頂爆開，大到成天都係光，真係第一次見。

睇完煙花，d frd仲話等到再夜d 去睇日出，我就冇咁乜呢個興趣啦，夜晚行highway番屋企算。仲以為好難揸，但原來夜晚行highway都冇你想像咁恐怖。

尋日一月一繼續係假日，又係無嘢做就跟咗同宿幾個朋友去左行walking track。今次本身真係walking嘅本身，但佢哋真係玩到冇嘢好玩，走咗去一短仔爬石，搵路上山頂，攪到我都無奈跟咗佢哋爬，攪到俾d 草刮到我手都損埋。除咗山頂有d 風景睇之外，沿路都係乾曬冇乜景好睇。雖然又係無聊咗d，但唔行都行左，咪當做下運動啦。

隨緣、隨遇而安吧 (一四年十二月三十日 晚)

早兩日朝早係背包客棧(一個好多backpackers係上面討論交流資訊嘅forum) 見到Alexandra有宿舍住，就二話不說衝鬼咗落去住。Alexandra係一個比之前我住緊果個Cromwell 大d 嘅town，都係好多車厘子工嘅地方。眼見Cromwell搵工冇乜希望，加上有住宿嘅關係，就去咗再算啦。

本身宿舍都係好吉嘅，但由於大家見到個post嘅關係，當晚就俾人book滿咗。呢邊環境唔錯，仲要超平，但就係偏僻咗少少。題外話就係我一出門口就有個細草地養咗兩仔馬，應該係隔離屋嘅人養嘅，行埋去佢仲會俾你摸，正。

有地方住，咁工呢？尋日繼續去walk-in，反應都係：新年後好多工㗎啦，你再嚟啦。其實我都已經疊埋心水，諗住等到新年後先再去試，因為感覺到新年後真係會好多工，到時可能變番到我選擇工。

今朝因為同宿有幾個大陸仔出去試，反正冇野做，咪跟佢地去試，咁當然係失敗啦。但最好笑係下晝果陣跟佢哋番咗去Cromwell，佢哋反而話我知，Cromwell有工？！之後我仲要接到個電話，係Alexandra某果園打俾我叫我即刻開工。

真好笑，我move咗去Alexandra住，同我講Cromwell有工；我落咗去Cromwell拎d 嘢，你同我講即刻番Alexandra開工。呢d 就係緣份啦，或者你真係話我超黑仔。

嚟咗咁耐，我真係改變咗唔少諗法，同埋我真係後悔過唔少嘢。我會諗番轉頭，唔係為咗份垃圾offer，我可能就唔會過嚟呢邊做車厘子工，而係留番係Auckland、Christchurch；
如果我一早知我係個最濕濟嘅時間辭工，我就可能唔會咁衝動咁早走，而係做到新年後先走，咁我又可能多三幾百紐紙用。係香港我其實對錢都冇咁著緊，幾百蚊港紙其實唔小心洗咗都冇咁太大感覺，因為我知道自己搵得到；但嚟到呢邊，暫時因為冇乜穩定收入，洗少少錢都開始變得肉痛，對金錢個感覺肉緊咗好多。

越係咁諗個人就越係緊張同焦慮，慢慢我都開始諗通咗就係，有時呢d 嘢真係急都急唔嚟。嚟到做backpacker就係預咗呢種生活㗎啦。諗番轉頭覺得自己做錯乜乜乜選擇，倒不如諗吓之後可以有咩路可以行。今日唔知聽日事，咁咪聽日先算囉。。學識去咁睇個世界。咁樣個人都會開心d。