黑氣未散，曙光初現

呢幾日買咗車之後，我就去到葡萄園做嘢。為生計，真係唔做嘢唔得。食飯要錢，住宿要錢，咩都係錢。雖然我已經唔想做再呢d 工作，但事實係我已經發覺再咁落去d 錢真係唔係頂得好耐。呢一刻停手唔做嘢，下個月真係交租都成問題。

早幾日我send 出去求職想試吓做吓cafe或者餐廳待應工作，但十幾廿封信都冇一封有回覆。今日終於有一封回覆啦，但佢嘅回應就係：「我哋已經有太多applicant，你收皮啦。」唔係話完全冇，有d 中餐廳都有叫我去試工，但都係d 廚房洗碗工仲要係parttime，咁我寧可做番葡萄園啦。

咁我係葡萄園做乜？其實工作好簡單，佢有d 網用黎笠住d 葡萄樹，係用嚟防止d 雀仔飛入去咬佢d 葡萄。但佢仲需要有d 人clip 實d 網，一來令個網唔會飛走，二來等d 雀仔唔會係d 空位入到去。工作唔算太辛苦，起碼都唔洗太用咩氣力，但係就要不停企起身同踎低，所以係就會有d 累。

之後黑仔事一，先先就係無啦啦收到email，就係之前租車公司話我知我之前超咗速，要罰錢。果吓真係好無奈，完全唔知咩事，張單就話我係個鎮入面限速50但我行咗61，如果係真我應該真係唔小心快咗dd 咁多，但應該我之後都會slow番，可惜...

黑仔事二，今日係個雙線迴旋處到，我行錯線所以就諗住入番內線，本身我已經俾哂signal，以為附近d 車知，但後面有架車殺出嚟，可能係因為迴旋處睇鏡睇唔到所以就hi咗落佢到。慶幸就係對方架車唔算嚴重，應該都係錢嘅問題，但暫時都仲未知要賠幾多，要等佢搵人估咗價先知。

講真我已經黑到貼哂地，好似命運就係要我搵幾多錢就要倒番幾多錢。呢幾日做咗幾日嘢，搵得果少少，真係賠都賠番哂出去。講真啦，之前堅持想留係到，都係希望之後會慢慢轉運，但黑氣始終都唔肯散，一直都係咁黑仔，我真係去到心灰已冷嘅地步。

宜家曙光就係今日有份ios developer 嘅工搵我interview。見我果個係一個搵工agent嚟，見面之後佢都覺得我都幾ok，會安排我下星期再去見真係請人嘅公司老闆。如果見得成，成件事就會改變哂，我應該就唔洗再煩錢嘅問題，因為會有份幾好pay又穩定嘅糧，但我嘅working holiday係某程度上可以話係叫完咗，因為我唔會再過d 飄泊生活，唔會再走嚟走去搵d 勞動力工，可能連visa 都要再申請過做work visa。另一面嚟睇，我只係用另一個方式去過我嘅working holiday，但始終好過日日叫苦諗住番香港啦。

地獄黑仔王，一買架車就出問題

話說今日神早就出咗去見工，就係份葡萄園工啦。其實去之前就已經覺得請嘅機會幾大，但問題比較大就係地方有d 遠，每日番工車程單程已經二十分鐘，來回油費都唔係平。暫時我會陪partner做住幾日先，但其實我自己已經搵緊其他係城入面番嘅工，特別係做cafe或者待應嘅工。

之後因為我哋已經借咗同宿朋友架車幾日，所以已經借到唔好意思再借。本身仲煩緊車嘅問題，仲諗住今日拎架前兩日睇中嘅車去俾師傅做買前嘅檢查，但個賣家話有另一個買家出價好仲要爽快，所以決定賣俾佢唔賣俾我哋。

咁冇計啦，俾人放飛機，唯有寄望今日約睇嘅車。下晝三點幾賣家嚟到，係個韓國妹嚟嘅，斯斯文文咁，所以已經對佢有d 信心。之後試架車，比想像中唔信，係唯一問題就係個波箱有d chok，所以當時都係有d 保留。

之後試完我哋決定拎俾師傅睇，因為約咗師傅，所以唔好哂咗個appointment。之後我哋揸咗十幾分鐘，去到師傅到仲要等咗一大輪，其實感覺到韓妹都有d 唔爽我哋。但冇計，點都要俾d 專業人士睇睇先安心。

之後睇完，師傅都係話個波箱老化，所以係有d chok。我就問咁樣問題大唔大？佢就話如果用一年半載，其實都唔係咩大問題，所以叫我哋壓吓價，架車都仲值得買。之後我哋壓咗少少，同師傅建議個價差唔多，所以就決定買咗佢啦。

當時一路都好順利，仲慶幸終於買到車唔洗煩啦，點知一出去行咗一輪，諗住送賣家番屋企，去咗打個油，就發覺個速度錶...唔識郁嘅喂？！明明頭先試一大輪都冇事，一俾錢買咗就出事，有冇咁黑仔啊！我哋問韓妹有冇見過，佢都有d 愕然，話冇見過。打番俾師傅，佢都話頭先明明冇事。

落車果陣，韓妹都話佢都有d 擔心，但都冇計，車已經俾咗我哋，我哋都好難話即刻叫佢回水。雖然架車不至於好似我上次咁報廢，但始終都仲未知有幾嚴重要整幾多錢。但都係果句啦，假設韓妹唔係存心呃我，我都真係算絕對黑仔啦。

最恐怖但又最驚奇嘅賣豬仔經歷

今日到底發生咩事？等我由尋日講起啦。

話說尋日我哋上網亂咁搵問到有間叫"乜乜乜 Labour Contract Ltd"嘅公司話需要人。當時我哋問佢份工做乜，佢淨係話係戶外工，冇講清楚到底我哋要做d 乜，加上佢嘅英文音似係印度人，所以更加覺得可疑。之後佢就叫咗我哋六點半去某地址啦，上網查過之後發覺個地址係住宅區嚟，應該就係聽電話果個疑似印度人屋企。講真，俾你敢唔敢去？

結果我partner 太想番工，所以膽粗粗都衝去睇吓乜料啦。一去到，有個東南亞嘅阿叔出嚟見我哋，但佢好似唔多識講英文，所以應該唔係電話果個人。一入屋，叫我哋坐底，就要我哋俾passport同visa佢。我哋第一吓唔想俾佢，就問佢我哋工作做乜，佢唔識應，就繼續要我哋passport。我哋果吓就唯有俾佢，佢就拎咗入房影印，仲驚死佢會對我哋d passport做乜，所以靜雞雞去望吓佢做緊乜。講真去到呢到，我哋已經想拎番passport就逃走。

影完啦，佢就俾份嘢我哋簽。當時我哋reject佢話我哋真係想知道工作做乜先簽，佢見我哋唔肯簽就叫我哋"wait,wait"。等咗一輪，終於見到門口有d 人出現，初初係兩個印度人，之後就出現黑人同鬼佬鬼婆。佢哋有人入嚟借廁所，就乘機問吓到底呢到攪乜鬼。佢話呢到其實日日工作都有d 唔同，試過餵牛、剪草、種嘢等等，最後同我哋講話呢到人工足有糧出算幾好做，我partner 就開始定番d。

等到最後，屋企兼老細出現了。佢同我哋解釋之後，我終於知佢葫蘆裏賣緊咩藥啦。

話說其實佢哋係labour公司，佢有好多唔同嘅client，但唔係個個都長期需要大量人手，所以佢就係提供人手服務，等某d farm或者公司需要人手做勞動工作就可以出動。所以其實佢係一間有註冊同合法嘅工作。不過係佢自己攪到自己好可疑咁，真吹漲。

咁今日我哋做乜？今日我去咗幫一間seed company剪洋蔥花。d 花入面有好多籽，整哂d 籽出嚟就可以拎出賣，聽講話仲好值錢㖭。

同老細傾計後，結果真係幾出人意表，原來佢係柬甫寨人，仲要原本係個受過高等教育嘅人，係一個土木工程師。之後自己狗衝呢到紐西蘭定居之後，就一直係到打散工同呢d 農場工啦。之後慢慢儲到錢就將d 錢送番去柬甫寨買地，宜家d 地升值咗幾百倍，所以佢其實係超級有錢佬嚟。

不過我都係貪玩去睇吓玩一日，咁耐冇番工，辛苦番一日拎少少錢都好，當幫補吓啦。之後我就應該會陪partner星期一去見葡萄園工，到時可能就會做住再搵吓其他工啩。

好車難尋、荀工難搵

呢幾日由於真係努力搵工同搵車，連寫blog嘅心機都冇乜，宜家就update番呢幾日攪乜啦。

話說我嘅travel partner終於係北島落嚟搵我，係到我介紹一係佢啦。佢係馬來西亞華人嚟嘅，本身就係係奧克蘭識佢，嚟緊都會同佢夾份買車同行動，起碼遲d 食飯買食材都可以兩份分，又唔洗我自己搵工搵車一腳踢咁慘。不過同佢最大嘅磨擦位就係佢需要做農業工嚟幫佢嘅visa 延簽，而我嘅要求就係想留番係大城市，同埋都唔太想做d 工廠或者戶外工。所以宜家就係暫時留係基督城睇吓佢會唔會搵到啱佢嘅工，如果搵到嘅話，我再搵其他工都仲可以。

星期二係我哋試得最多車嘅日子，一日之內我哋約咗五架車試，但最後我哋覺得好嘅就只係得一架，但可惜比預算貴咗少少所以決定hold起唔買住。

到星期三，我哋又睇咗幾架車，其中有三幾架係d ex-rental car，即係d 租車公司本身租出去嘅車但已經舊咗所以賣。之後一去到，最好果架已經俾人早我一個鐘買咗，另外嘅車係冇咗best choice嘅情況下，我哋都想買另一架。架車好好揸，但最大問題係里數過大，我哋矛盾咗好耐最後同佢哋講話買。但冷靜落嚟再同d 識車嘅朋友傾過之後，我第二朝就打番去話決定唔要架車。由於我哋又冇訂金，所以佢都係吹我哋唔漲。

到咗尋日，借咗同宿朋友嘅車嚟用，順便當試佢哋架車，其實都係另一架好揸嘅車，但可惜太食油同埋朋友嘅建議下都係唔會諗呢架。另外夜晚我哋試咗一個我朋友嘅印度同事嘅車，架車試落唔算好揸但勝在里數超低。我朋友幫手睇過架車其實冇乜問題，但個印度佬開價比我哋預算高咗成千蚊，所以我哋都話唔買住。

之後突然佢sms我話減500，我已經有d o嘴，之後又sms我話減多500，仲專登打俾我話我要個價ok，叫我拎架車走。但當時我老實同佢講話佢架車冷氣有d 問題所以都係唔買，佢屌完我幾句就cut 我線。點知再過咗一陣，佢再同我講話叫我俾500蚊佢，架車就可以拎走，然後自己去整個冷氣。我果吓真心嚇親，500蚊？！全世界都同我講印度人不可信，講真我真係覺得有好可疑，有乜理由3000蚊變到500蚊，仲要自己壓自己價。最後我當然唔買啦，曾經有人試過買架車但其實好多負債，俾罰款都俾咗千幾二千蚊。

咁工呢？尋尋覓覓之後，今日終於叫有d 消息。有一份好可疑嘅工，聽日叫我哋朝早六點半去見佢，但連工作地點同做乜都唔講清楚，淨係叫我哋聽朝去director 屋企。所以我哋聽日都係去睇吓乜料，唔對路就走人。另一份就係葡萄園工，我朋友就好鐘意好想做，星期一叫我哋見見工，但講真佢請嘅機會好大。

其實最重要係佢係呢到有工，又可以幫佢延簽，之後我唔想陪佢做我自己再搵工算，但起碼我都唔洗再去住d 小鎮仔嘅垃圾住宿啦。

沒車的日子，都可以過得開心

前晚我送走咗d 朋友之後，還咗車，就要去新屋企暫住。由於租車公司同新屋企話遠唔遠話近又唔近，最後就決定行路去新屋企算。當時我已經叫做盡量執最少嘢嚟暫住，但由於d 行李加埋d 食材，身上都成十幾kg嘢，本身廿分鐘嘅路程攪攪吓邊變咗四十分鐘先到。第二日就係因為咁，兩個膀頭都痛到喊出嚟。

之後果晚有朋友話出嚟食飯，所以就跟咗佢哋出去食。話就話台灣菜，但其實叫完d 嘢都好廣東菜。紅燒豆腐、一隻走地雞、梅葉扣肉、椒鹽九肚魚，講真真係好耐都冇咁樣出嚟中餐館叫餸食飯。

到第二朝佢哋又話去食點心，因為冇嘢做所以又跟佢哋出咗去。四條友，叫咗十幾碟點心，食就食得哂，但飽到喊出嚟。雖然同香港比d 質素就麻麻哋，但係呢邊都唔好要求咁多啦。

講真我本身諗住嚟呢邊都預咗冇機會食呢d 家鄉嘢，以前好易有得食有得玩嘅嘢，係呢邊變得好遙遠好難得。冇人話呢邊冇，可能係會好貴同唔夠香港咁好。

食完點心就去咗行吓海邊散步吹水，之後就去咗cafe坐一陣，不經不覺就去到七點。好悠閒嘅一個星期日，但呢邊唔係就係應該咁樣㗎咩？

今日下晝冇嘢做，就諗住出去超市，順便去郵局問問劏車公司到底有冇幫我報銷架車。結果係呢十幾日都冇幫我報銷，我就問佢要去邊到攪，佢叫我去城中心某個位攪。我由屋企行到超市已經行咗大個半鐘，再行去佢講果到，我又要行多成粒鐘。結果我整整行咗十幾公里，用咗我接近兩個鐘先到。如果我有車？十分鐘都唔洗。

頂，我仲要行多兩個鐘番屋企。講真我仲係到諗會唔會咁好彩有朋友車我番屋企呢？真係天有眼，一入商場真係見到朋友！正，唔洗行路番屋企，仲可以順便去超市買吓嘢！

習慣咗有車，一時三刻真係唔係好慣冇咗架車。宜家已經努力搵緊車㗎啦，經一事長一智，我唔會再咁易信人。下一架買我寧可俾多d 錢d 師傅幫手檢查我都唔會再買架垃圾車。

南島環島遊 (day 12) 尋找海豹，旅程結束

Kaikoura其實個名本身係來自毛利語，解"meal of crayfish"。Crayfish即係淡水龍蝦，其實呢個鎮本身係一個食龍蝦出名嘅地方。通常嚟呢邊玩主要有兩個目的，一係睇野生海豹，二係食龍蝦。

今日又係神咁早就起咗身，預備出去尋找海豹。本身個個都話食海邊行出去就已經有，唔洗特別搵，點知完全唔係。係個鎮嘅海邊，跟本一隻都冇。我地先先去咗鎮入面一個睇海豹嘅熱點睇，結果有發現...但得一隻咁大把。隻嘢懶到隻狗咁自己一隻係石上面瞓，都唔明點解會得佢自己一隻，令我哋強烈覺得佢呢隻係有d 問題先會咁樣自己離群。

之後我哋再去另一個離鎮遠d 嘅熱點，但今次我哋有發現啦。見到海邊岩石上面有幾十隻海豹，最正係仲有d 小海豹勁活潑咁係到打交同玩水，今次連我都想講都覺得幾cute。我哋再落去海邊d 石，行近d 去睇佢哋，最後保持大約3-4米距離去睇。講真，唔係驚佢咬我，我係覺得佢哋真係好臭。雖然d 書話要保持10米以上，但當地人話其實有1米已經夠，因為佢哋其實唔會主動咬你，加埋佢哋動作好慢，你一定縮得切。咁大個仔，第一次咁近睇海豹，同埋都冇諗過可以近成咁，今次真心覺得好滿足。

離開Kaikorua前都係要食番餐好嘅，皆因呢餐都係我班朋友係紐西蘭走前最後一餐。我哋去咗食燒海鮮餐，真心唔平，因為只係隻龍蝦都食咗幾百蚊港紙。不過算啦，佢哋都走啦，值得食。

完結旅程真係有d 唏噓，因為又代表我又要諗吓之後條路點行。買咩車？搵咩工？下站去邊？Well, I get no fucking idea.

南島環島遊 (day 11) 初見草泥馬，達陣Kaikoura

今日朝早我哋去咗Tekapo 山頂天文台嘅Astro Cafe食早餐。呢一餐係我哋食得最貴嘅早餐，同時都係我哋第一次唔係宿舍食早餐。雖然d 嘢食都幾好食，但重點唔係在於好唔好食，係在於可以係山頂，望住個Lake同town 嚟食嘢，其實真係幾爽皮。

食完早餐就出發去我哋旅程最後嘅一次長途車。我哋目的地係Christchurch北邊嘅一個海邊小鎮，最出名就係有好多野生海豹睇。

中途我哋經過一個小鎮，裏面有幾隻草泥馬俾人免費睇。嚟咗咁耐，我都係第一次叫近距離睇草泥馬，之前幾次都係係車上面路過見到。親身見過，真係覺得佢個樣好鬼低能，d 動作仲要成個傻仔咁。同行有人仲話佢可愛，真係唔識欣賞。

係基督城攪咗一大輪，一來係朋友要買手信，二來係撞正放工時間塞車塞到喊出嚟，結果去到目的地已經傍晚，所以都仲未見到個鎮係咩樣。

去到呢到，即係代表我旅程就快完結，同埋要重新面對係紐西蘭嘅生活。

南島環島遊 (day 10) walking track@Mt. Cook，最靚的南半球星空

今日朝早，食完個早餐就出去咗行Mt. Cook。由於同行朋友d 體力有限，我哋都係行咗條最輕鬆嘅平路track。沿路我哋都唔算話有咩特別景色睇，主要我哋都係沿住條冰川水流落嘅急流去行，所以中間都需要過三條吊橋。雖然就話冇乜特別景睇，但其實一路望住d 山同水，其實已經算幾靚。

我哋終點係一條半溶嘅冰川，似我尋日講果條灰色嘅水嘅地方。但估唔到我哋去到呢個終點站我哋玩咗幾耐吓先走。唔係因為d 咩，只係我哋係到白白痴痴咁玩冰。就咁睇都知其實d 水好凍，因為d 冰仲浮緊係水面，間唔中仲會有d 冰會俾d 水推上岸。之後我哋就係到執嚟玩，大果d係到鑿同掟爆佢，細果d 就係到玩片水，雖然係低能d 但又幾鬼好玩。在場仲有d 鬼佬跳咗落去游水，見到都覺得攞膽。

行完之後，食個飯就衝咗去Lake Tekapo，一個南半球超出名睇星嘅地方。

去到check-in之後，第一次發現宿舍有足球、藍球、網球等等嘅運動用品。原來宿舍後面係有呢d 運動場地俾人玩仲要唔洗錢㗎。之後就狗衝去打咗幾板網球。幾年冇玩，打到一pet屎咁，番香港有時間都真係應該重新學吓tennis。

係呢到我食咗呢邊最出名嘅日本Kohan餐廳作為晚餐，而呢間嘢又係傳說紐西蘭日本嘢最好食嘅餐廳。我哋其實一早就book咗，因為聽講要係呢到食係要提早好多去book。食完雖然有d 失望，因為其實真係冇傳說之中咁好味，但最少佢個dessert係堅好食。可能係因為我哋係香港嘅日本嘢真係太好啦，拎嚟比較真係覺得唔太公平。

夜晚我哋出咗去睇星，但我哋就冇俾錢跟呢邊有個好出名嘅觀星團叫Earth&Sky，但收費就一d 都唔平，所以我哋就放棄咗。咁啱夜晚有個德國嘅男仔帶咗我哋hostel嘅人出咗去睇星，仲要唔洗錢，真係幾好彩。呢邊嘅星空真係好好，加上附近冇乜山擋住，睇星更加正，所以唔怪得呢到俾人話呢到睇星係最靚啦。

南島環島遊 (day 9) 超藍的湖Lake Pukaki，達陣Mt. Cook

今日係Oamaru遲咗少少起身，食完個早餐，就去咗攪張死人牛肉乾。發生咩事？就係尋日係Dunedin泊車過咗鐘俾人罰錢，點知連張肉乾都唔見埋，要去差館同去District court攪一輪再俾人老點咗一輪先攪得番交錢個方法。

攪完之後，我哋就出發去Mt. Cook─紐西蘭最高的嘅白帽山。日本嘅象徵山係富士山，而呢邊就係呢座Mt. Cook。

先先我哋途經一個超細鎮仔名叫Twizel。其實完全冇乜特別，只係我有個朋友嚟咗呢到打工做收銀，咁啱我哋又會經過呢到所以去咗同佢傾吓計吹吓水。見佢好似肥咗又黑咗，但又過得幾好咁我都覺得幾欣慰，因為某程度上係我游說佢今年嚟紐西蘭。但俾著我係個咁細嘅鎮過真會喊出嚟，真心悶都悶死。

中途我哋路過Lake Pukaki，一個我覺得係呢邊最藍最靚嘅湖之一。我一早都同d 朋友提過呢個湖，今日終於路過，佢咃都睇到o哂嘴。

最後達陣Mt. Cook，但check-in 之後已經五點。所以就去咗行咗條短track就番屋企煮飯。條短track其實都有d 失望，得d 灰色嘅冰川水同埋一個綠色嘅Blue lake，完全唔覺得靚。食完飯本來仲話聽旅舍d 人講去睇"sunset"，點知搵唔到佢講果條路。最後發現完來佢講嘅係座山變色，攪到仲以為真係有夕陽睇。

聽日朝早我哋會神早就出去行長track，今晚唔寫咁長早d 瞓算啦。

南島環島遊 (day 8) 速遊但尼丁，參觀朱古力工廠，達陣Oamaru

尋日由於掛住去尋覓企鵝，都冇機會睇下但尼丁到底係咩樣。

今日朝早第一站就係去咗但尼丁嘅吉百利朱古力工廠。咁大個仔都好似冇幾多次去呢d 食物工廠參觀，仲要係我最愛嘅朱古力廠。一開個工廠門，已經有好大陣朱古力味撲鼻咁嚟。我哋一路參觀，導遊都會塞d 朱古力俾你，呢d 就係所謂呢個tour 嘅「戰利品」。最後參觀完，見到門口賣嘅吉百利，都忍唔住再帶多幾排走。

參觀完之後就去咗遊城市。但尼丁保留咗唔少英式風格，聽講佢曾經係蘇格蘭嘅地方，佢d 建築都仲好有英國特色。我嚟到果陣，見到d 車站、教堂，以為自己去咗歐洲。之後去咗參觀個車站，入面仲有個小型展覽室去show d 油畫俾人睇。不過當然啦，就比唔上歐洲㗎啦，因為呢邊始終都冇乜歷史可言。諗番起以前係歐洲玩，日日都係睇呢油畫石像，雖然我唔多識睇，但我都睇得出真係唔同級數。

但尼丁呢邊有一條最世界最斜嘅馬路，好多人都慕名嚟睇。老實講，條路真係冇乜特別，但整到條路咁死斜，真係玩嘢。

睇完斜路我哋就出發離開但尼丁。中途路過一個有d 好圓嘅石頭嘅沙灘。點解會咁圓？指示牌話應該係因為唔知幾多萬年前有d 古代甲殼類生物死咗之後，d 岩石沈澱同包住d 化石，變成今日沙灘邊一個個圓石。

去到Oamaru 之後，其實呢邊又係一個睇企鵝嘅地方，仲要係有兩種你睇。大嘅企鵝就係七、八點左右，尋日係Dunedin 睇過嘅小企鵝就係天黑之後先出現，好似話仲會過馬路。可惜今日大企鵝我哋miss咗時間，小企鵝我哋又睇過所以都係唔想等到太夜，最後就提早完結今日行程。

南島環島遊 (day 7) 達陣但尼丁，捕捉野生小企鵝

今日朝早係皇后鎮離開，本身仲想係果到玩多d 嘢先走，點知一來自己又白痴仔book錯咗時間二來又撞正壞天氣，所以都係決定早d 走番過嚟東岸呢邊。

中途路過經過之前番工嘅鎮Alexandra，所以順便番去探吓以前住嘅地方嘅屋主。當時冇乜嘢送俾佢，唯有買排啤酒送俾佢，中國人思想啊嘛，兩手空空唔係咁好嘅。之後我d 朋友見到d 羊啊馬啊，都好開心咁同d 動物玩，起碼俾佢哋有機會近距離玩餵吓羊摸吓馬，都算係一舉兩得啦。

之後一路就再衝到但尼丁─紐西蘭南島第二大城鎮。呢邊其實係一個番學城鎮，聽講七成人住係呢到都係學生同青少年人，但我觀察覺得最多唔止係學生咁簡單，仲有好多亞洲人係到。嚟到果陣已經係傍晚時份，本身仲去咗超市，諗住煮d 好嘢食完就出去睇企鵝，點知攪攪吓發覺原來唔夠時間，所以咬咗個subway就衝咗出去。

之後揸完條鬼死咁難揸嘅海邊路，終於去到Dunedin呢另一嘅海岸。呢邊有超多海鷗，同埋另一種巨型海鳥，聽講係南半球最大嘅島類─信天翁。本身嚟睇信天翁又係需要俾錢，但好好彩我哋係到見佢哋有幾隻係到飛，雖然冇近距離睇佢哋，但起碼都叫睇過佢嘅一眼。

之後我哋係海邊係到等d 世上最細品種嘅企鵝番巢，佢哋每日都朝早出門口唔知去邊，日落時份就會番屋企，而我哋就係捕捉佢哋番屋企果一刻。當時個個係個海邊都吹到彊哂，就係為咗見佢哋一面。結果我地企咗半個鐘，終於見到佢哋。近距離睇到佢哋，真係超細隻，應該只係得30cm左右咁大隻。雖然真係好凍，但起碼見到佢哋都叫做有番d 欣慰。

南島環島遊 (day 6) 騎馬遊魔境、激流快艇氹氹轉、皇后鎮必食餐廳

雖然我一嚟過Queenstown 唔止一次，但一直以嚟都係窮鬼遊乜錢都唔洗。今日真係我係呢到洗得最多錢玩得最多嘅一日。

先先係朝早，神咁早爬起身就去咗一個叫Glenochy 嘅地方，同Queenstown大約係一小時車程，但我唔洗自己揸車因為有人車埋我入去。呢到又係因作為魔戒場景面有名氣，令唔少人專登嚟到呢到騎馬。

其實對上一次騎馬都係大學時代去蒙古嘅事，但比起上次，今次好玩好多。點解？一來係因為d 景真係靚十倍，果陣係蒙古係行d 沙同草嘅爛地，而紐西蘭就唔洗解釋啦。二來，上次騎d 馬根本就唔係聽你講，今次騎嘅馬雖然都係一條line咁跟前面行，但起碼你踢佢佢都會行，你叫佢向左向右佢都會睬你。三來，今次最正就係d 馬係要行好多唔同嘅路，有石路、草地、泥地，仲有d 位要過河㖭，真心有騎馬感覺。雖然係苦咗d 馬仔，但可以係個靚景下騎馬仔堅係好玩。

下晝果陣，我哋就去咗玩呢邊一樣出名嘅刺激活動─jetboat。佢自稱係世上最刺激嘅jetboat，因為佢係係條好窄好急嘅河上面開到勁快仲要大玩飄移，去到有d 位佢仲要專登掟360度實行大大地轉到你暈。玩之前真係以為會fing到你嘔，但原來其實都冇你想像中咁chok，叫做比較過癮我覺得其實係轉大圈果吓。雖然冇想像中咁刺激咁飄咁刺激，但overall我都覺得算好玩嘅。

夜晚，我哋食咗傳說中皇后鎮必食兩樣嘅其中一樣：Flame bar and grill。另一樣我神早食咗就係Fred burgar，但Flame真係一直都冇機會食。呢間嘢令好多人都慕名而來食佢個ribs，通常要食佢都要提早最少一兩日book佢先食到。今日食過之後，我可以話出名真係有原因，因為我係香港真係一d 都唔鐘意食ribs，但我第一次食ribs 食到成條骨拎嚟啜，死未。今餐係我係嚟紐西蘭之後出街食最貴嘅一次，對香港人嘅你嚟講二百蚊港紙一餐就濕濕碎啦，但我嚟咗咁耐先第一次食到咁貴，你話我嘅生活有幾窮苦。

特別事件：話說今晚冇乜好玩，就想捉d 朋友陪我玩呢邊我一路都好想玩嘅鬼屋。本來捉佢哋捉咗好耐都唔肯玩，攪咗好耐終於捉到佢哋行上間鬼屋嘅入口。本身都仲ok，連飛都買埋，但當有其他人係exit出嚟，大叫咗幾聲，入面又傳咗幾聲巨響，佢哋就真係喊咗出嚟唔敢入去啦。結果到最後都係退飛冇玩到，希望下次仲有機會搵到人嚟陪我挑戰啦。

南島環島遊 (day 5) 掏金鎮Arrowtown、皇后鎮山頂遊

今日朝早仲係Lake Wanaka，本身仲諗緊去邊到玩好。本來之前宿友們係Wanaka仲諗住可以join埋一齊玩吓，但最後都係夾唔埋自己玩算。係Wanaka 睇完個湖之後，朋友們都冇乜想係到玩，所以都係決定早d 向Queenstown方向出發。

之後向Queenstown方向出發，中間會經過一個小鎮叫Arrowtown。呢個鎮仔以前係一個掏金之地，曾經出產過好多黃金，但宜家已經冇哂。呢個鎮出名係又係因為佢係魔戒拍攝場地之一，好似話係條掏金河拍過d 騎兵係河上面跑嘅一幕。呢個鎮保留咗唔少古舊嘅建築物，可能係想保留番佢仲係係掏金潮好多人果陣嘅感覺啩。

雖然有d 走馬看花，不過我地都係決定睇完個鎮仔就早d 過去Queenstown。去到Queenstown 因為有d 唔舒服所以我番咗宿休息一陣，朋友們就自己出咗去行陣街，夜晚再同d 朋友出去玩。傍晚時份，我哋終於去咗玩我一路都好想嘅纜車同luge。嚟紐西蘭之前睇片見人玩已經好想玩，一路都未有機會去玩，今次終於玩到啦。咪睇少佢車仔細細，衝落嚟其實都幾快幾刺激，同埋真係好鬼易抄車！今次玩咗幾round，朋友同我都抄過車，特別係你越想過人就越易抄車。如果你冇揸過車又想試吓同感受吓車落坡嘅速度感，其實呢架嘢都俾到少少你㗎。

玩完之後係skyline 呢邊欣賞Queenstown嘅全景，真係幾鬼死靚，比起上次我係另一座山去欣賞Queenstown真係更加靚。唔怪得之d 人專登要係呢座山起纜車啦，真係識搵錢。

南島環島遊 (day 3,4) 冰川歷險記

尋晚冇寫blog，唔係因為我懶寫，係因為真係冇嘢可以寫。因為西岸天氣唔好，原訂計劃係尋日會去玩冰川，今日就可以輕輕鬆鬆落Wanaka順便可以睇吓中間d 風景。但事與願違，有時天氣真係唔係你控制，天氣唔俾你出發就唔俾，所以尋日出唔到發就嘗試改今朝。冰川呢家嘢真係好睇彩數，唔係你有錢就去得，我聽有人係呢到已經等咗三日都落雨冇得玩。所以尋日係冇選擇情況下留咗係宿舍到食同瞓。

係呢到簡單同大家講吓冰川係乜。冰川唔係一堆雪同冰咁簡單，其實係d 巨大冰塊底下有水係到流動緊，令到d 冰塊每年都逐少逐少咁郁，所以其實係冰川上面其實都有一定風險，因為佢其實有雪崩嘅風險。今日我都好好彩有目睹輕微嘅雪崩。

結果，我哋都算好彩，第二朝個天萬里無雲，可以出發啦。朝早十點零我哋去到check-in，裝備好自己之後，就預備去上直升機啦。咁大個仔第一次坐直升機，估唔到會係係咁嘅情況下坐，真係好鬼興奮。初初仲以為直升機會好chok好大離心力，但原來個感覺又唔係咁差。

短短五分鐘嘅時間，直升機就將我哋由城市送到上山頂附近嘅冰川。上到雪山，裝備好雪靴我哋就開始跟住領隊向山上面行。成個冰川之旅大約係兩個幾鐘，其實真係要不停行不停爬，真係幾累㗎。仲有冰川有好多大窿同裂開嘅冰坑，真係一個唔小心真係會跌落去。我其中一個朋友就係旅程尾聲果陣仆親，差d 跌落個大窿，真係嚇鬼死我哋。成個旅程中，我哋唔單止係d 冰上面行，有d 位我哋仲要係d 冰㙤或者冰洞中間穿過。雖然係辛苦同有d 危險，但又真係幾刺激好玩。

行完冰川之後，我哋就番到城浸吓「溫泉」。其實佢純粹係拎咗d 冰川水加熱俾你浸吓咁，講真如果你浸開日本溫泉呢d 就真係冇乜吸引力。

總括今日嘅冰川之旅，真係幾特別同難忘。係香港唔好話冰川，我連大杯d 嘅刨冰都未見過。呢d 經歷真係幾難有下次。

之後攪完冰川行嘅嘢，都已經下晝四點幾。為咗趕番嚟Wanaka，足足揸咗4粒幾鐘車到夜晚十點先到，真係揸到嘔出嚟咁濟。

南島環島遊 (day 2) 大雨中從Christchurch到達Hokitika

今日朝早出發，由南島嘅東岸衝到西岸一個叫Hokitita嘅小鎮，順便欣賞一係沿途嘅風景。

第一個到嘅地方叫做Castle hill，據說又係一個拍魔戒好重要嘅場景。呢到最得意嘅地方就係有好多一舊舊嘅石灰岩排哂係到，而個排列方式又好騎呢，當地嘅介紹牌話專家都唔知係人為定係自然攪成咁，但話以前d 古人的確係住過係到。

離開Castle hill果陣，明明本來係烈日當空，但無啦啦feel有d 雨點。之後一路揸天氣就越差，當去到另一個中途站Arthur's pass前，d 雨已經大到痴咗線，攪到我要係條勁多彎嘅山路仲要大雨揸車。到咗Arthur's pass之後，勁多旅客都係停咗係到休息食吓嘢咁。本來仲諗住好天嘅話仲會係附近行吓track，但天氣咁就算罷啦。

之後一路衝到目的地Hokitika，好得意地天氣越嚟越好，所以就見時間仲早就去咗附近行吓。呢個鎮仔本身係出產玉石，town centre好多鋪都係賣玉石。另外佢係海邊，所以我哋就順便去咗睇海。係海邊d 人將d 枯木同石頭排成藝術品咁，攪到好似個海邊博物館咁，真係幾得意。

之後再去咗個叫Hokitika gorge嘅地方，係鎮揸三十分鐘左右就去到嘅地方嚟，係一條本身話好藍好靚嘅河嚟。可惜就應該係因為落雨嘅關係，d 水變哂泥水急流，撞唔啱時間嚟睇真係哂咗。

最後番咗屋企食完飯之後，就去咗鎮附近睇glowworms。其實佢有d 似我哋成日講嘅螢火蟲唔同，螢火蟲係成年識飛嘅，而我地睇嘅glowworm係幼蟲嚟嘅，基本上係黐住係d 石壁上面唔郁，一點點咁其實好似星星咁真係好靚。聽講紐西蘭另外仲有d 收錢嘅地方可以睇，應該會成個洞都係，大約幻想到d 蟲真係會變到星空咁。

南島環島遊 (day 1) 迎接香港朋友

今日神咁早就爬咗起身就執定d 行裝，準備出門口去迎接從香港嚟到嘅朋友。出門口果陣，好耐都冇試過連車匙都冇帶就離開家門嘅感覺。唔知點解，冇咗條匙，反而有種仲輕鬆嘅感覺。好耐都冇試過係呢到坐巴士，我真係冇諗過除咗番香港前夕我仲有需要係呢到坐巴士。

由於真係太早到機場，係機場真係坐咗成粒幾鐘先等到d 朋友。大家到步後，千辛萬苦搵到租車公司，終於可以出發番入城。由於大家都啱啱坐咗好耐飛機，其實都好累，所以今日行程真係接近零。

今日唯一叫做觀光過嘅地方就係之前我已經去過嘅Christchurch廢城區，同埋個爛到得番一半嘅教堂。但之前我冇去過就係一個叫「紙教堂」嘅嘢，原來係個爛教堂附近係有一個用紙皮起嘅「過渡性」教堂，俾d 人頂住檔去住先啩可能係。

之前本身仲諗住輕鬆行吓超市，點知大家都俾d 日照時間攪到d 時間觀念錯哂，最後變咗快快手手係超市掃咗d 嘢就衝番宿煮飯食同休息。

p.s. 今日都順便去一去瞻仰一吓架廢車遺容，算係見一見佢最後一面，話哂都叫陪咗我成兩個月，點都希望見一見佢最後一眼啦。

再見櫻桃季的朋友們，最黑的報廢汽車事件

當櫻桃季節過後，大家就各散東西，呢個就話去邊到玩，果個又話去邊到玩。宿舍本身有17人係到住，但星期日過後，大家都全部走哂。當星期六果日我下晝見到個空空嘅雪櫃，真係有種莫名嘅失落感。雖然你問我做櫻桃開唔開心，我會答你唔開心，但走果刻先發覺，原來同大家一齊咁樣生活咗一個月其實真係幾開心。

星期五晚，我仲番咗Cromwell見吓一d 舊朋友，食個飯咁。之後食完飯就嗱嗱聲衝番屋企，點解？因為大家開p 囉！大家好開心嘅飲酒吹水食吓嘢(雖然我冇飲)，大家吹吹吓水咁就吹到三點。講真係香港三點唔瞓有幾咁閒，但係呢邊基本上我都係自然早瞓早起，突然三點瞓真係頂唔到順。可能真係老啦，到第二日我成日都係眼瞓mode，真係死未。

小插曲：果晚我番屋企果陣去接我朋友番屋企，順便都見吓d 舊同事傾吓計。走果陣手多多仲要將條車匙掟咗上屋頂，我當時發茅一野拉住個屋頂邊，想睇吓執唔執到，但一拉就俾d 水管積水倒到成身濕哂。最後好彩有人幫我借到條梯執得番先冇事，但真係柒到爆廠。

星期六因為大家都冇乜食材，宿舍又走咗幾個人，所以就有人發起不如全屋一齊食飯。之後果晚多謝同辛苦幾位大廚煮咗咁多人飯餸，同時都留咗個咁特別嘅回憶俾我。

再見，有緣再聚。

到咗星期日，要出發番基督城，走果刻都有少少唔捨得。之後我九點出發，差唔多四點就到咗城附近。但當架車係highway 仲有幾十公里就到目的地果陣就開始有d 怪聲，當時因為行完條石仔路以為入咗石仔就不以為然，但問題係越行就越覺得太聲同唔妥，但都就到目的地同埋架車仲揸得，就冇理佢唯有繼續行埋佢。

當架車係番到新屋企，發覺d 聲係由引擎傳出黎，果吓我仲未知咩事，就call咗road service d人嚟幫我睇睇，睇完佢話原來我架車冇機油(即係engine油，引擎嘅潤滑油)，佢話有怪聲因為唔夠叫我快d 加加佢睇吓點。之後我衝咗出去買，加完，但d 怪聲仲係到。第一次空歡喜。

第二朝我就神咁早衝咗去驗車，師傅一見到，就話冇得救，救都哂心機。但當時架車仲行得走得，我就問師傅我其實架車仲用唔用得，佢仲話其實唔好去到咁盡架車其實應該仲用得，叫我自己執生。咁我就試吓上一次highway，行幾行睇吓架車點啦。行完一段仔，好似仲ok，但回程果陣落咗highway，d 怪聲好似變左唔同聲，我已經知道架車就打柴啦。當時我已經驚緊番唔番到屋企。結果真係未到屋企門口，架車正式跪低，玩完。

好好彩，我躝吓躝吓，躝到去屋企門口先完全開唔番，仲要有個好熱心嘅kiwi伯伯落車幫我，又幫我車d 嘢番屋企，又幫我同d road service嘅人溝通，仲帶我番屋企幫打我電話問d 劏車佬。

之後佢突然話不如問吓d 劏車佬會唔會有d 二手engine可以搵d 劏車佬幫手換咗個engine佢，咪仲有機會有得救。當時佢幫我打價，本身個價仲acceptable，仲以為有希望唔洗同架車講bye bye，快快手手整得番仲可以用黎環島，咪仲抵。點知狗衝到劏車場後，問個價同整嘅時間，真係完全唔值得整。第二次空歡喜。

最後，車變成廢鐵，俾劏車佬送走咗，拎番就係果少少安慰廢鐵金。接近最壞嘅情況出現了。

唯一可以樂觀就係話我真係好好彩平安送到d 朋友番屋企，去到check車仲要勇到拎架壞車上highway番到屋企先壞，起碼唔洗停係highway中間，起碼自身係安全。我成日都話，個天真係好得意，成日俾條絕頂難行嘅路我行，但又咁好彩成日留番一線俾我咁，都唔知佢係錫我定玩我。

去或留？我仲未清楚，各位嘅聲音係叫我留比較多，但我自己都仲未話好清楚條路點行好，可以做嘅就係開開心心玩完十二日，係呢段期間好好冷靜同諗清楚。

p.s. 岩岩係手機唔小心連架車遺照都洗埋，只能話唔通連個天都唔想我再記得呢段回憶？