求職中伏事件

過咗兩日悶到抽筋嘅聖誕，今日開始從新努力搵工。今日一朝早就出去，諗住睇下有冇機會過左聖誕就有工番。最後，都係食白果。

當人睇唔清自己前路嘅時候，你個腦就會有好多諗法同打算。今日食完白果之後番到屋企，就開始落手send email出去Queenstown果邊問下d 工請唔請我。之後咁啱得咁蹺台灣backpacker論壇又見到有精品店請人，仲要話請兩個，所以我send個sms去問吓。

之後我就forward咗個post俾個住Queenstown嘅朋友。我等左一輪sms，又試下call 咗去，結果都係唔覆我。再等左一輪，終於覆番我，佢話唔可以電話傾到d 乜，要我親身去Queenstown先得，咁我就同佢講我一陣過幾個鐘就會揸車出去見佢，我仲要講咗佢知我係係第二個鎮揸出去。之後我就call 咗我個frd 同佢講個情況，但原來佢已經快過我去咗問，人哋叫佢今晚去試工。我聽到之後當然就衝去Queenstown啦。

去到Queenstown，入到鋪頭，我就話我兩個鐘前同你哋傾左話會嚟見工。點知個死八婆老闆話：「無啦我哋請咗啦。」我：「吓我明明話一陣會嚟㗎喎。」佢：「有個男仔快過你嚟，我哋叫咗佢今晚試工啦。」我：「果個我朋友嚟，佢同我講今晚試工我先衝過嚟喳。」佢：「人哋快過你嚟，機會咪俾佢先囉，走罷啦你。」

我果吓真係條氣頂到上心口，我千里迢迢揸架車出嚟，俾哂誠意你，你老味一嘢就叫我番屋企，真係頂到上心口。再講，點解唔俾我同果個frd 都試過再二選一，而係一嘢就叫我番歸？哂咗我時間同車費，換來嘅就係得個吉。

係香港，我識得好多真心會幫我嘅好朋友，但嚟到呢邊之後，朋友真係識咗好多，但真心朋友又有幾個呢？有，有真心幫我嘅朋友，但同樣有d 過橋抽板嘅賤人。

咁大個仔第一次過一個夏天嘅聖誕

話咁快就嚟咗紐西蘭一個月。回想呢一個月，無無聊聊就過一日，錢又搵唔到幾多蚊，仲要係咁洗錢。諗番其實時間過得好似好快咁，但感覺上又好似已經離開咗香港好耐，真係好矛盾。

係香港咁耐，腦海中自己過咗廿幾年嘅(lonely)聖誕，真係冇幾年係暖嘅。今年，係我過得最熱嘅聖誕，同樣係最冇聖誕氣氛嘅聖誕。

聖誕節總覺得係要凍冰冰先似聖誕，但呢邊真係好得意，十一月尾已經講緊"Christmas is coming"，但到正日反而個個都會番屋企做節，條街水靜鵝飛，可能佢地嘅團員節日就係咁掛。

尋日無聊冇嘢做，俾個friend 突然叫咗我出去一個叫Lake Wanaka 嘅地方玩。嚟到之後食咗個lunch 就去左個湖望下，嚟咗咁耐我都係第一次見人游水。天氣好熱，個湖又鬼咁靚，如果我有帶泳褲我都想游吓。

睇完湖我哋去左個叫Puzzle World嘅地方玩。呢個係咩地方？其實佢sell 幾樣嘢：一. 賣d 玩具puzzle，二. 有個真人版迷宮，三. show d illusion 嘢，但主要係3D 嘅illusion。

先講個迷宮，個迷宮看似就容易同唔係好大，但其實真係會蕩失路。佢個任務目標係要搵到路上去四角嘅塔頂。我仲要行條難d 嘅路線，就係跟佢request 個順序咁行，明明第一座塔我都好順利，但最好笑就係我搵極都搵唔到回頭路番第二座塔，結果就兜左十幾個圈先搵到路。

之後到個3D illusion room，諗番最恐怖都係個斜房。個房大約有十幾度嘅slope，但裝飾到好似平嘅房咁。當你入個間房，你就會有種好強烈俾人拉落斜嘅感覺，再耐d 個人就會有d 暈暈哋。如果大家有機會真係要試試，因為呢種感覺真係講你都唔明

。

今日聖誕節正日，千里迢迢嚟到紐西蘭，都係做個毒男毒留在家中冇嘢做，真係慘。但比我慘就係隔離屋個女人，受屋主所托過咗嚟幫佢餵雞淋花(因為屋主唔知去左邊，要幾日後先番)，點知佢唔小心拗左柴，隻腳腫到乜咁。叫左佢屋企人過嚟幫手，佢d 仔女仲要好唔care咁唔係咁想理佢。望住佢真係諗番起自己兩個幾月前都係咁，攪到有種同病相憐嘅感覺。聖誕節先嚟整親，希望佢早日康復啦。

漂泊的搵工、等工生活

辭咗職，連住地獄宿舍都要俾人趕走，但點都要解決後者問題先。

好好彩，咁啱我朋友住緊個sharehouse 有房，二人房佢哋兩個人包咗，所以我就去咗打地鋪啦。係就係迫夾d，但總好過冇地方瞓都冇要瞓車瞓街啦，起碼有地方煮食、沖涼同瞓啦叫做。

解決咗住嘅問題，就到工作嘅問題啦。之前我仲幫朋友去搵工，車佢哋去walk-in，當時我就un un腳等番工睇住佢哋係到煩冇工番，但風水輪流轉，家陣佢哋有哂工番，我就...sosad。

宜家正值最難搵工嘅時間，基本上問咗好多間嘅答覆都一樣：等一月你再嚟問啦。因為宜家係聖誕節，大家都收緊爐，同埋cherry 預計最多應該係around 1月，所以大家都唔敢貿貿然請人住。

冇計，可以做嘅就係等啦。但我覺得其實我有經驗(雖然係幾日) 同有車，會比較上易俾人請d。我可以做嘅暫時都做咗啦，真係唯有祝自己好運。

摘車厘子嘅第四、五日 (一四年十二月二十一日 午)

尋日day 4 成績11桶，今日day 5 成績11桶，同埋今日就係我last day啦。 

尋日番到去，睇番noticeboard day3嘅成績，我係包艇果個，老實講我已經超冇癮。一開工我已經冇哂心機，摘得超慢。之後一路摘一路諗，都係決定走啦。呢邊人工又少又刻薄，要求又高，加埋超差嘅住宿，我真係已經頂唔順啦。結果呢日因為d 樹太差嘅關係，我比人差咗成幾桶。 

到今日，本來我已經唔想做，但合約問題我一定要做埋今日。今日d 樹好好，但天氣問題我哋摘咗半日就收工。d 同事仲話，今日d 樹咁好，再摘落去30桶都得啦，哂咗，但我自己已經完全入唔到狀態，hea 摘咗11桶就算數。比較nice嘅supervisor 今日仲問我做乜唔做，佢覺得好可惜，見到我其實好努力，覺得我態度同人品其實好好。所以我開始明白其實佢哋本身係冇意思想炒我，果日話咩last 4 要走之類嘅說話就係想俾d 壓力我哋去加速。 

家陣冇咗份工，連住宿都一定要quit，宜家都要煩吓之後去向啦。不過做得working holiday，就係要學吓點樣去適應呢d 漂泊嘅生活。

摘車厘子嘅第二、三日 (一四年十二月十八日 午)

真係好辛苦，終於捱過咗第三日番工，聽日終於可以休息番一日。

經過連日嘅洗禮，由第一日嘅11桶，到尋日嘅12桶，再到今日嘅19桶。其實尋日比前日工時少左，所以如果尋日做番正常工時可能都會有番13-14左右。老實講，雖然仲未達標，我真係盡哂力㗎啦，你叫我快d 我都唔知再點快，遲d 如果佢唔滿意要炒我我都冇乜所謂，反正我問心無愧啦。

尋日我哋一開工，工頭就俾咗個下馬威我哋。摘咗都唔夠一個鐘，就周圍係到話”You are supposed to be picking the third bucket”，但當其時我連第一桶都未摘完。之後仲要得閒就係到巡視大家，問吓你幾多桶，叫你快d 之類啦。 

今日，未開工之前，就話今日最慢果4個可以執包袱，講真我有哂心理準備，自己知自己事。不過今日其實摘多咗，原因除咗隻手快咗，好大原因係d 樹好咗，起碼冇咁高同埋多d 係熟果。前兩日摘果d 好多都仲係生嘅，仲要差不多5m高，今日果d 明顯都係around 3.5 - 4m高。 

咁最快嘅有幾多？40幾桶。初初我都好奇，正常人盡哂力我估都應該廿幾，點解佢可以快到咁？今日偷睇到，簡單d 講，就係用埋d 嗱喳手段囉。正常我地pick都係逐粒逐粒摘，但果條大陸狗一手就嗱一大喳，望兩眼就放哂落桶，咁你話點會唔快？Packer house果邊d 朋友講番，佢果d bucket入到去做QC果陣，全部都係爛果。 

不過我覺得我已經好快就做唔落去。你可能又會諗：「你個少爺仔，一早睇死你都係玩幾日㗎啦」。我唔係怕辛苦，日曬同熱、腰痛手痛我頂得順，但我接受唔到呢到嘅做法同俾壓力方法。佢呢兩日明顯就係要俾d 壓力等你不停咁摘，你一停多1、2分鐘，佢就已經要push你快d 開工。自問心態上，我真係比唔上果d 嚟淘金心態嘅大陸狗。為左個桶數，班大陸狗點cheap 嘅手段都做得出，唔如意思我真係比唔上佢哋。點都好啦，做得一日得一日，遲d 再係咁，如果等俾佢炒我倒不如自己走。

摘車厘子嘅第一日 (一四年十二月十六日 晚)

推遲咗幾日，今日終於正經開工做cherry picker啦。總括今日嘅事就係：救命，份工真係又難又辛苦。 

呢份工，講就簡單，就係不停咁摘，不停放落個桶。最辛苦就係日囇但唔洗雨淋，同埋要不停拎全條老鏈咁重嘅梯周圍走。同埋，我地嘅壓力就係每日係要fulfill 個minimum requirement，就係廿二桶。Fulfill 咗啦，再多嘅話，就係你嘅bonus。所以年年都有相信自己能力嘅人嚟呢到「淘金」。 

初初仲覺得，d 人郁d 都話年年最勁有人摘幾十桶，咁睇廿桶唔係好難㗎啫。結果，今日我摘到手都爛，全身都痛，都係得果十一桶，身邊嘅新手同事都差唔多咁上下。 

老實講，我已經盡哂自己力㗎啦，但我發覺其實唔好話bonus，要fulfill嗰廿二桶都已經唔係易，仲要加埋唔係粒粒都摘得，要小心唔好摘d 未熟果d。頭幾日佢都唔會咁嚴要你追到quota，但之後如果大家都進步咗追到quota之後你都仲未捉到你就會俾人炒㗎啦。 

摘咗一日，成身都散哂，手指頭又痛，仲要冇乜信心之後可以再加速幾多。都係果句，祝自己好運，希望自己遲d 會習慣就冇事啦。再唔得，大不了咪早d 番Christchurch。

重遊皇后鎮登山之旅 (一四年十二月十五日 午)

之前同房一直都話好想去Queenstown，但又搵唔到腳，攪攪吓尋日終於有齊腳機會去多次Queenstown。本身我去嘅目的都係買吓嘢，而我同房都係想食個burger，但攪攪吓同行嘅朋友又想登山，成團人出發目的都唔同。再攪攪吓，全部團友都話想上山，我本身都係想係車坐幾粒鐘等佢哋算，但被迫之下就連我都跟咗佢哋上山。

Queenstown呢邊有兩座山，一座係俾人坐纜車上，另一座係俾人行walking track 上。本身都仲係想坐纜車算，但講講吓變咗要用腳行上山。

名就叫”walking”，但未到條track，行車路上斜行到條track入口已經腳都痺。(補充：因為條track 嘅門口本身已經係山上面，同埋可以揸車上去個track入口。)辛辛苦苦行到個入口，先發覺原來可以泊架車係個入口，我哋仲要戇居居泊咗係市中心再行斜路上去，仲要俾錢泊車，真係戇居到極點。

辛辛苦苦行到個入口，諗住入到track冇咁辛苦啦，諗住"walking"㗎啫，fake 哂。基本上，佢似hiking 多過似walking，d 路鬼死咁斜，我仲要有部電腦揹住上山。初初行因為太耐冇做運動嘅關係真係好辛苦，但行行吓條氣順咗就開始ok 好多。一路行，本身係腳果陣冇乜景睇都幾悶吓，上到接近頂果陣已經睇到唔少靚嘅景色。上到頂果吓，望番哂成個Queenstown，其實抵番哂。

好彩今日又pospone咗開工日期，今日隻腳酸痛到嘔，算啦，當係做picker嘅賽前熱血啦。

近況+感想 (一四年十二月十三 晚)

嚟咗呢邊之後都好苦悶吓，開工時間一推在推，本身就話今日期六開工，點知又再推遲，要到星期一先開始。工又冇得開，係宿又冇wifi，dry到開花。但點都好啦，起碼我都叫有份工，有得住，都唔好再怨咁多啦。

老實講，宜家我發覺我其實搬都冇得搬，原因一係公司同呢間垃圾宿舍book好哂位，所以點都要填滿呢到先得；原因二，就係因為我要係呢到收屋企人包裹，如果我走左我都唔知會點對待我d 包裹。遲下宿舍滿咗仲要開工之後我真係幻想唔到會點，幾十人住得果兩間廁所，起身個個一定爭崩頭，廚房又細到嘔，唔理啦，後日開左工先算。

經過今次真後我真係有d 怕怕。遲d 摘完車厘子玩完之後，可能我都未會再做呢d 農場工㗎啦，可能都會番番d 大城市做番d 正常工作算。雖然我未知我捱唔捱得到摘車厘子嘅辛苦，但我已經覺得要住宿舍太差真係會好唔開心。其實我都唔係話好高要求，但嚟到呢d 鄉村d 嘅就無何奈何咁接收d 咁嘅住宿同生活環境。之後我未必唔會唔再做農場工，但可能會睇下住宿會唔會差得太過份先再算。所以保守d 番番大城市，起碼都多d 選擇，住都住得舒服dd 啦。

嚟咗之後d 腸胃都硬係有d 怪怪哋咁，尋晚個胃夜晚仲要有d 唔舒服，今日個胃都差差哋咁。求神拜佛，希望唔係舊病復發，希望係普通消化不良啦。

速遊皇后鎮，再發覺住左入地獄 (一四年十二月十號 晚)

前晚check-in 左宿舍之後，尋日朝就去左果園果到報到，順便幫我d 朋友睇下有冇工做。我做果間cherry 園叫Sarita Orchard，算係一間中型規模嘅果園。如傳聞一樣，呢邊d 人都幾nice，老闆娘有講有笑。開工日期要推遲到星期六，因為今年紐西蘭都遲遲都唔變暖，所以d cherry都未熟唔摘得。之後陪左d 朋友去兜黎兜去求工，結果都係食白果。

之後冇嘢做，就走左去Queenstown行下同睇下有冇野買。Queenstown感覺上係一個幾繁華同遊客區嘅市鎮，鎮仔雖少但五臟皆全，想買嘅想要嘅都有。我番工呢邊個鎮仔相比之後就低能到連d 圖書館、i-site都冇free wifi，喊出嚟。不過天氣熱左，冇左d 雪山景，唔緊要啦，我要會嚟嘅。之後我都仲順便食左個burgar，傳說係New Zealand 最好味嘅burgar 喎(好似係)。

夜晚番到宿舍，本身冇人嘅宿舍都陸續有人住入嚟啦，因為大家都係Sarita嘅人，應該都係想group埋大家係同一個地方住。好啦，同大家講下我住嘅呢到有幾仆街。

一. 呢邊乜柒廚具、餐具都冇，有嘅就只有雪櫃、水煲、sink盤、電熱爐同微波爐。本身入黎都仲有d 煲，點知連最後d 煲都收走埋，原因係話驚你哋偷走佢d 煲。大佬啊，我哋backpacker邊可能帶到咁多嘢周圍走，正常都會提供下呢d 工具俾你啦，低能，你叫人自備，有冇病啊？

二. 再講個廚房，個廚房有d cupboard，通常都係俾d 人放d 私人食物或者煮食用具係到，但呢邊佢居然唔俾我地放，要我地拎番自己房。咁d 櫃空哂出黎，俾人做乜？佢話係俾人煮緊果陣時侯暫時放吓嘢。簡直硬膠到極點。

三. 我哋要帶條手帶周圍走，方便佢知道我哋住邊。呢個我接受到，如果你話係個holiday park區域內，但點解條帶係除唔甩？佢幫我帶果陣我以為只係一粒啪鈕，但啪咗之後先發現係除唔甩！呢吓真係想講：「屌你啊？你當我係坐監定病人！」家陣我要帶住呢條核突狗帶去街同番工，佢老味真係痴線。

四. 呢邊收費係130nzd一星期，比起出面homestay或者sharehouse絕對唔平。仲要wifi係一日5nzd 或者一個月 50nzd，簡直癡線。你同我講呢邊收70-80nzd我仲可以接受，但你收我個價同你個service我覺得不可理喻。

呢間嘢係bbh(一個幫人search旅館嘅機構)最差評分嘅一間宿舍，我都冇預過佢好，但都冇諗過佢可以咁乞衣。我宜家見到自己條手帶我就無名火起，再落去我真係會嬲到自己都癡線。宜家我已經諗緊計走，homestay又好sharehouse又好，總之我有方法我都會諗計走。

從基督城衝到Cromwell，等開工 (一四年十二月八號 晚)

話咁快就係Christchurch過左11晚，講真呢十幾日其實諗番都幾無聊，係個城入面d 嘢有咩想行想睇都行哂，之前都話，我係果到主要任務都係買車都練車，但其實我都唔小心做多左個副任務，個任務主題叫「燒錢」。

好啦，過兩日就要開工做cherry picker啦，其實燒咗咁多錢，同埋二月頭又要同幾條友環南島，簡單d 講即係「錢繼續燒」，真係唔俾心機pick都唔得。

今日我同幾個朋友由Christchurch十點幾出發，到呢邊一個目的地小鎮Cromwell，你有興趣可以google map一下，簡單d 講就係由南島右邊揸到左邊，基本上全程都係highway，中間有停下睇下休息下，都攪到成六點幾先到目的地。好彩我同朋友一人一半揸d，如果我一個揸真係揸到腳都軟仲要再遲d 先到。

當然，雖然車程都真係幾悶，但沿路都有唔少景令我地不禁停低睇下影下相，例如雪山景同兩個靚湖：Lake Tekapo 同 Lake Pukaki，特別係後者，真係靚到我不禁講句：「癡線，你唔好再靚d。」

到步之後，入左宿舍先發覺，住homestay真係其實幾舒服。呢邊廚房乜叉都冇，wifi又要錢，感覺上好似變番宿大學時代宿舍咁(or 更差)。好彩同房暫時感覺都幾好傾幾nice(台灣人)，大家遲下仲要係同事可以有個照應。好啦我呢邊冇咁易上到網，同埋遲d 會長期番工變左冇咁多特別事發生，所以可能d blog 唔會咁頻頻update㗎啦，如果大家想搵我就whatsapp/line再搵我啦。

第一次揸中長途車，由Christchurch到Akaroa

今日星期六，宿友都比較得閒，無聊之下倒不如試下去遠d 行下睇下，順便當練下車都好，就去左一個遠少少嘅旅遊小鎮，名叫Akaroa。

今次長途車可以話真係用嚟練車一流，揸完今日真係進步左唔少，前段上咗highway 過左100km/h，後段仲要上斜落斜係d 山路到行，山路d 彎仲要鬼咁急，好似行緊秋名山咁，真係唔好講笑我真係唔敢亂嚟，一直跟指示牌個speed就算，even 後面成面排車feel 到佢地鼓燥想過我我都理得佢哋死。

沿途d 風景真係好靚，同行嘅朋友都係到不停影相話好靚，但我就要專心揸車乜叉都唔得閒睇。我宜家發覺其實買車做司機都真係幾搵自己笨。車又要自己養自己俾錢，稅又要自己交，坐你車果d 夾就係夾果幾蚊油費就有舒服車坐，唉吹漲。

去到目的地，個小鎮其實都幾旅遊區，感覺上大多都唔係當地人，仲有一part 係掛住法國國旗，原來佢係想扮一個法國feel 小鎮，雖然我哋去到係食fish and chips。其實個小鎮真係冇乜特別，但咁多人嚟呢到旅遊，可能係因為有得出海睇海豚同潛水，同埋個景真係一如以往咁靚。妖，廢話，紐西蘭都唔靚邊到仲可以靚？

回程果陣，交左條匙俾個朋友，第一次坐自己車嘅助手位，終於可以到我做乘客欣賞美景。

尋日難得有個男仔入宿，咁岩係香港人，終於有個同聲同氣嘅人傾下計吹吓水。同佢傾咗陣開始熟落左d 之後，抵死位係原來大家係同齡人，更抵死係仲要係中大人，呢個世界真係好很細，咁都可以撞到。雖然條友癡癡哋線，成日一見到人開口埋口就話自己一表人材，但可能係同為中大人嘅關係，大家真係幾好傾，同埋我哋出發原因都差唔多有九成似。難得識到個咁啱key 嘅人但可惜我下星期就要走，希望之後仲有緣再見啦！

今日揸咗去個海邊圖書館，個圖書館真係好很正，除左書我真估你唔到圖書館可以打ps3、玩puzzle、聽歌。個圖書館對住個海，個view 真係一百個屈機，對住個咁藍嘅海嚟睇書都特別爽yy。

個圖書館二樓有個位可以行出去一條橋到，好多人係果到釣魚同散步。個海真係好藍，海風吹埋嚟個feel 真係好正，仲要有好多海鷗，同埋最過癮係，個海真係望出去真係乜叉都冇。係香港你個海望出去點都會有d 嘢，但呢邊先知係明白，咩係一望冇際嘅海景。如果有時間，係個暖暖嘅陽光下，對住個海，打下牙骹食吓嘢，其實真係幾寫意。

今日揸出去可能已經開始慣左d，揸車個感覺都比前兩日好。努力揸好佢啊bbq。