為半年的旅程作結

半年的工作假期完結，回到香港後遲遲都未能下筆，是因為要回顧這半年真的需要靜下來慢慢思考。回到家的幾天都在預備去日本玩的狀態，都沒有靜靜思考的空間。

作為一個完全沒有文筆又不習慣寫日記的人，堅持半年去寫這blog 真的是一個很大的挑戰。雖然未去到每天一篇的地步，但最少我都能堅持幾天寫一篇。這一篇作結文，是第八十二篇文，其實我都沒有想過自己能如此堅持地寫到這麼多。

一直以來我都是以口語模式去寫，就像我在你面前用廣東話說故事，原因跟我寫blog 的初衷有關。那時我寫blog 原因一，是香港的朋友雖未能跟我一起去，但都想跟他們分享自己生活的事，好讓關心我的朋友知道自己還健在和在做什麼。原因二是，今年都廿多歲了，一直都沒有機會自己一個離家出外闖一下，一直都活在幸福的環境。我知道這一次的旅程會是一個一生都不會再有和很特別的經歷，所以我都好希望用文字紀錄下來，好等自己五年後十年後再看，會有另一番體會。去工作假期跟去旅行很不多，心態上、行動上都會有有很大的不同，所以比起旅行我覺得更值得去用文字記下來。

回想這半年，心境變化真的很大。在出發前，抱住很大的期望，希望在是次旅程得到很多、享受很多，希望自己可以在回家的時候會學會很多不同的東西，識到很多很多很好的朋友。那時真的有很多憧憬，所以初初到步的時間其實是挺舒暢的。那時自覺有很多錢很多時間，沒有什麼需要去擔心，所以那時是挺享受那個新鮮的環境。

但當開始離開大城市去做櫻桃，去到一個什麼都沒有的小鎮，住在環境很差的地方，農場的工作又和自己想像中不同，做過才明白原來是這麼沒趣又辛苦的工作。加上聖誕節前夕自己又很白癡地放棄原來那麼難找的工作，完全沒有想像到後果。到做完櫻桃工作後回到基督城，連自己的車子都壞掉。那個時候我心情真的進了谷底，完全沒想像到自己會有那麼多不幸和挫折。我真的怕了，好想逃回家，逃回一個自己最舒適的地方。

再次回到基督城工作，身邊多了一個可以和自己分享生活問題的拍檔。慢慢在基督城穩家下來，認識了新的家人，那時其實心情已經漸漸變好了。但那時對工作依然厭倦，已經不想再做那些無聊的勞工工作了，加上又有朋友會北上離開紐西蘭，又另外有朋友叫我去其他地方玩，所以就決定離開。但離開的時候，我捨不得了，不捨得那裡的人和事，不捨得在紐西蘭打發時間的空閒感。真的很矛盾，走又是自己一直想走，走的一刻又不捨得了。或者就是因此要走了，才發現自己曾經在這快樂過。

回想自己經歷這麼多，我又得到了什麼？其中最重要的是比以前更了解自己。從前的自己真的是一個自命不凡的人，從來都覺得自己比人聰明，什麼都好容易很很簡單。但來到這我知道原來有多自己不懂的事和自己的缺點。原來自己真的是一個生活常識不足的人，對身邊的人和事都很不細心，還有自己的EQ 有多麼差有多麼不懂得去面對逆境和失敗、多麼的幼稚等等。在這，我自卑了。

另一件事就是我開始學會用另一個角度去看事物。在香港大家都好像在跟著一條路去走，小時努力讀書，進了大學就會有份好工作，繼而儲到錢就可以供樓養家結婚生小孩，其他時間就是去炒電話、炒鈔票、炒股票，賺到了外快就是去日本玩或者去吃個瘋。但去到紐西蘭，認識了不同的人，原來他們對生活的看法可以很簡單。工作賺到錢，用光就好了；居住的，買到就買，買不到就租吧；放假，去行山看風景好了。活在城市裏就像一隻雀活在一個很大的籠，你以為自己很自由，但其實你依然是籠中鳥。

但我依然是我，我不覺得我回到家會有什麼很大的改變，才半年你不會覺得一個人會有180度的改變吧？雖然性格和特質不變，但自己對身邊的事會有微妙的不同，這是真的。有人跟我說我回到家後好像開心了，或者就是因為對事物的看法改變了，懷抱放開了一點，自然人都會比以前寬容吧。

又有人跟我說你剛剛回來當然有改變，但你再次回到香港生活，你骨子裏香港人的本性又會跑出來。也許是吧，很快我又要重投社會的洪流中，為三餐為錢包再一次勞碌半生，這一刻的心情也許很快又會被淹沒變回那個以前忙於上班的自己吧。忘了都沒辦法，但希望我幾年後再看這個blog 寫的東西時，還會有一絲回憶吧。

15.6.2015 書

北島環島遊 (day 13─14) 紐西蘭最後的旅遊─殺上北島北

呢篇應該係我呢個blog 最後一篇遊記，因為玩埋最後呢兩日，我呢係紐西蘭嘅Working Holiday 都去到尾聲啦，因為最後兩日都只係會係Auckland 行吓買少少嘢帶番香港。

星期一，我同朋友由奧克蘭出發，向北方出發，去北島最北嘅地方玩。雖然Auckland 已經算係北島北邊，但其實比佢更北嘅地方都仲有唔少。果日我哋朝早揸車出發，主要睇咗兩個景點。第一個景點係一個名叫Kawakawa嘅鎮仔，當地將呢個鎮打造成一個藝術小鎮，鎮入面有唔少有自己特色嘅建築同藝術品。而呢個鎮最特別、最有特色嘅嘢係咩？居然係廁所！呢到佢有個自稱world famous 嘅廁所，佢哋將佢整到好有藝術氣息，有d 爛玻璃樽整咗幅牆，入面仲有d 雕像仔咁。靚唔靚呢就見人見智啦，但廁所都攪咁多花樣，真係服咗佢哋。

之後我哋去咗另一個鎮仔Keri Keri，另一個渡假特色嘅鎮仔。果日呢到到本來係想睇Rainbow fall，一個聽講成日會見到彩虹嘅瀑布。但好可惜，天氣唔好，加上時間可能唔啱，所以都見唔到彩虹。雖然睇唔到彩虹，但其實呢條瀑布算係係我係紐西蘭睇過咁多條瀑布嚟講最有氣勢嘅一條，一來因為夠高二來水流都夠，雖然未係最完美嘅景但都不算太差啦。

第二日我哋報咗團去玩呢個北島北一圈，因為自己揸車太多路太辛苦啦，另一個原因我一陣再解釋啦。今日有三大重要活動，第一個就係嚟北島北最重要一定要睇嘅景點─Cape Reinga。有咩咁特別？因為呢個地方就係北島同時都係紐西蘭最北最頂嘅地方。如果你Google紐西蘭嘅景點，相信你都可能會見到呢個地方嘅相，因為呢到嘅燈塔係其中一個好重要嘅景點。呢個地方另一個特別嘅地方係佢其實位於太平洋同Tasman Sea 嘅交界，所以你會見到d 海浪亂哂大龍係到打交。果日我見到d 海浪一邊就向東南一邊就向西南，好鬼過癮。

第二個景點，應該話係活動，就係滑沙啦。北島北其中一個特色就係呢到嘅沙係超滑超靚，因為呢到嘅沙係世上釸成份最高嘅沙，所以好多地方都會同紐西蘭買沙嚟提煉玻璃。嚟到呢到嘅沙丘，辛辛苦苦爬上頂，趴係板塊上面，就一嘢衝咗落去，爽啊。我仲要冇剎制，由得塊板衝，衝到落低果陣因為有d 水，咁就變濕身！哈哈，超好玩，有機會真係想再玩多次。

最後一個景點係90 miles beach。有名你叫，90 miles即係百九幾公里，長到喊出嚟嘅沙灘，你見過未。頭先話唔自己揸車嘅原因，係因為如果自己揸其實你揸住架車係沙灘上面行其實好危險，因為俾d 海水打中其實有機會整壞架車，所以正常你自駕頂多都係落去睇兩眼，而跟團嘅話佢會揸住架車係海灘上面行，人哋專業嘅當然可以係上面行啦。果日最特別嘅事係無啦啦係沙灘上面發現海獅BB！嚟咗咁耐，海豹就見得多，但估唔到呢到係野生海獅！

玩完呢日，夜晚就揸車番奧克蘭，係一個又黑又落雨嘅情況揸番去真係幾考你技術。好啦，遊記就到此為止啦，下一篇我會行呢次行程作個結，就正式同呢個blog 講bye bye啦。

在奧克蘭的停留的時光 (二)

經過上星期嘅weekend 洗禮之後，我都冇再咁癲，郁d 就一日行成日咁周圍去。

星期一我同我兩位一齊環北島嘅朋友去咗動物園到玩，亦都係我係紐西蘭最後機會見佢佢哋啦，因為佢比我仲要早多兩日就番去馬來西亞。之前係基督城都好想去動物園，但因天氣放棄咗，所以最後都係嚟到紐西蘭俾人話係最好嘅動物園。

奧克蘭動物園嘅園區唔算大，動物嘅種類同數量都只算係普普通通叫合格，基本嘅獅子老虎果d 都有，所以唔係果d 會令你好驚喜但都算值得一去嘅動物園。動物園其中一個特點就係每日有幾個特定時間都會有event 俾你去睇，多數就係果個時間去餵某種動物，同時工作人員就會對果種動物作一下介紹，講吓佢嘅生活習慣之類嘅資訊俾你。果日睇咁多動物，最令我睇得開心嘅係大象！點解？因為果日雖然冇餵象嘅event，但果日咁啱見到佢有餵象同埋有帶隻象出嚟散步。令我驚奇係，估唔到老鏈咁大隻嘢，靠個象鼻係可以做到d 好靈巧嘅動作！好似係佢食樹葉果陣，佢可以用隻腳踩住d 樹枝，再用個鼻一捋，佢d 葉就會拖哂出嚟，超勁！之後仲見到有俾d 蘿蔔，同埋有d 泥土形狀嘅嘢佢，都可以靠個象鼻卷起嚟食到，真係超勁！

不過果日都有d 失望嘅，一來就係最重要嘅紐西蘭國寶kiwi 雀，明明都已經係到，但因為佢怕醜長期都匿埋我哋睇唔到。我哋已經係到等到超耐等佢出嚟，但只有我個朋友好好彩見到佢出咗嚟幾秒，而我就只係係個好黑嘅環境見到佢個嘴郁郁吓咁大把。第二失望就係佢明明有長頸鹿、班馬同鴕鳥，但因為佢果個區域要做維修，所以都收起哂冇得睇，同埋冇咗餵長頸鹿囉。Anyway啦，我覺得有得睇吓動物已經好好，但係我兩個朋友好介意睇唔到kiwi 雀唔開心多d。

之後到夜晚，我同朋友去咗Sky Tower，即係城市嘅觀光塔。我朋友就西利去咗玩Sky Walk，即係行出去塔外面行一圈，我當然就冇陪佢癲啦，上咗塔頂全程睇住佢玩。上到塔頂，360度睇哂奧克蘭嘅黃昏、夜晚嘅景，雖不及香港五光十色，但都幾靚嘅，亦同時代表我要係奧克蘭要玩要睇嘅都完成了。

呢幾日都係半休息狀態，因為天氣麻麻，加上都冇咩想去，所以都係屋企休息吓，同埋見吓d 朋友食吓嘢咁。最特別係星期三晚，同咗個朋友見面，去咗附近嘅夜市食嘢同行吓，見到超多亞洲食物，真係覺得超miss！雖然都就快番去，但都忍唔到要買嚟食。同埋最嚇親我就係，佢突然同我講佢第二日就飛機走番馬來西亞，所以果晚約佢見個面真係啱啱好！

在奧克蘭的九萬八千里長征 (一)

前兩日終於番到奧克蘭，未來應該會有差不多十日時間會係呢到，未必係連續，但十日都唔係短嘅時間，所以冇理由乜都唔做㗎嘛。但要係呢邊玩，最大問題係交通，因為宜家冇車，真係超唔方便，呢邊d 巴士又慢又貴，郁d 都成三十蚊以上港紙一程，真係痴痴地線。

星期五冇嘢做又未出去買巴士卡，加埋天氣又差，所以一朝早起身無聊咗一陣就跟咗屋主爸爸出去。屋主爸爸係做d 機電嘢嘅維修，叫做半退休生活，但佢日日都會揸車出去，所以我冇嘢做就跟咗佢出去啦。其實佢出去幾粒鐘，我見佢都係做個零鐘嘢，其餘時間都係搵朋友吹吓水飲吓茶食吓飯咁，生活都幾寫意嘅。跟住佢車，兜咗幾個Auckland 嘅區，佢都簡介咗各區嘅事我知，所以落雨有得遊吓車河都算係咁。

尋日，終於第一次坐巴士出去，開始咗第一日係奧克蘭嘅大長征。先先坐巴士出去呢到最大嘅Auckland War Memorial Museum，本身遊客係要25 紐紙入場費，但因為太無聊又唔知去邊玩嘅原因所以都係去。去到之後，同counter 嘅大陸姐姐打咗兩句牙骹，咁啱我又爆響口話我自己係有work visa，所以可以免咗入場費，好彩！奧克蘭貴為最大城市，最大城市嘅museum 當然都同首都嘅有得比。頂樓主要係講番戰爭果陣d 嘢，又係同Anzec day 果d 有關啦，底層中層主要都係大洋洲起源、毛利人嘅嘢、紐西蘭動植物、同埋火山地質學等等，同埋今期最特別就係佢有Minecraft 特別展出，有Oculus X Minecraft俾你試玩！我玩咗一分鐘，暈到喊出嚟，唉老啦都係唔啱玩呢d 科技嘢啦。

之後行完館，我又行咗去市中心嘅大街到逛。嚟大城市當然要行吓佢最重要嘅街─Queens Street。呢條街係奧克蘭最繁忙嘅街，同埋我都相信係全紐西蘭最多人同時行嘅街，因為除咗新年Queenstown 倒數果日我都未見過咁多人係街(可能加埋星期六)。好多重要商店都集中咗係呢條街，就好似旺角西洋菜街咁。來來回回係呢到行由三點幾行到日落天黑，連附近d 分支街都睇埋。最後坐巴士番到屋企，隻腳已經酸到爆，計計吓呢日真係有行咗六粒鐘。

到今日，又係天氣好好，所以去咗奧克蘭其中一個重要景點One Tree Hill。One Tree Hill 係呢到市中心附近嘅一個小山，山頂有一座紀念牌，但都唔係重點，因為大家上嚟係為咗睇360度奧克蘭全景！雖然呢到有SkyTower 作為觀光塔，但果個通常都係去睇夜景。

行完之後，落番山，食吓嘢，又要行一大段路去搵巴士。點解要行一大段？因為巴士貴，行遠d 去第二個站平d 啊嘛！坐車去咗屋企附近嘅一個叫Botany 嘅town centre 逛逛，順便去超市買d 嘢番屋企。呢個centre 其實幾有特色同味道，個人係幾鐘意佢個樣㗎，但可惜賣嘅都係d 連鎖點嘢，有有特別都變到冇特色。之後逛完又行路番屋企，數數吓又行咗四粒鐘。嚟到城市，行仲多過乜，真係痴線。

北島環島遊 (day 12) 經過小鎮Thames，回到奧克蘭

如果講Thames，你應該會諗起英國倫敦泰晤士河？其實係紐西蘭都有Thames，但唔係河，而係一個係Coromandel 半島嘅小鎮。

其實我哋都唔係話專登嚟呢到，但因為今日要番到Auckland 所以會經過呢個小鎮就去睇吓。呢個鎮仔本身唔係咩旅遊景點，但本身都有d 好靚嘅瀑布睇，但係需要俾錢入個唔知咩花園到所以放棄咗。

之後我哋就去i-site 打探呢個鎮有咩睇，之後佢就叫咗我哋揸好耐車入去一個visitor centre到問。係半信半疑嘅情況去，入到深山，終於見到佢講果個visitor centre。原來呢邊係有廿幾條唔同難度、長度嘅track，真係多到嚇親。

因為都冇乜話行track 嘅打算，所以就選擇咗最短嘅一條track 去睇瀑布，行咗廿分鐘左右就到咗目的地。但，有少少中伏，因為揸咁耐車入到嚟但個瀑布係係個好遠嘅地方睇，因為初初仲諗住個會行到比較近嘅地方睇。

之後番番出鎮，其實個鎮係幾有特色，個人覺得幾有西部牛仔片d 景嘅味道。呢到其實有佢特色嘅嘢食，名叫Thames Pie，因為呢到有d 好食嘅pie。雖然唔係d 第二d 地方食唔到嘅批，但因為呢到有幾間cafe 都有賣d 好食嘅pie 所以先變成呢到嘅出名食物。

食埋個pie，就預備要番去Auckland 啦。Working holiday係呢到開始，重回呢個地方，即係代表我嘅Working holiday 真係到咗尾聲啦。仲有最後兩星期，真係有d 感慨，曾經覺得係呢到留到半年都好耐，但半年過後其實又覺得好似好短咁。但要走嘅始終都要走，所以只好係最後嘅光陰，係冇車嘅情況下係呢到盡量玩吓、去吓、睇吓啦。

北島環島遊 (day 11) 完成換宿生活，看北島陽光與海灘Coromandel

距離換宿地點兩個幾鐘車程，北島東北海岸，呢到有個叫Coromandel 嘅半島，係一個有海光與海灘嘅地方。雖然呢到風景唔錯，但因為地方算係有d 太邊所以唔算話好多人會嚟玩。

今日一朝早同屋主同埋佢d 豬啊牛啊羊啊告別之後，就揸車嚟到呢邊入宿。早d 入宿主要係因為要換定衫褲同埋借定工具，等一陣可以用。咩工具？唔洗咁心急，睇埋落去會講㗎啦。

呢個地方主要有兩大景點，一就係個被海水侵蝕咗嘅大石洞Cathedral Cove，二係一個有地下熱水嘅Hot Water Beach。因為要係退潮時間去，所以要去呢兩個地方係需要時先睇定潮夕時間，而唔係話睇就睇到。

先先我哋去咗Cathedral Cove，本身仲以為只係係沙灘到睇，所以只會係由停車場行平嘅沙灘路過去，點知嚴重中伏，原來係要行track 過去！當時我換哂T-shirt波褲，踢住隻拖鞋係到行山路，真係超白痴！辛辛苦苦去到，終於見到個山窿，真係好鬼靚，唔怪得呢個半島用呢個景點做招牌啦，但可惜就係我哋用電話影真係影唔番果個效果。睇番呢個窿嘅形成，其實佢本身只係一個小裂縫，但長期俾d 海水蝕吓蝕吓就變成今日咁大個窿，所以再過多若干年，呢個窿隨時會成個倒榻冇咗都唔奇。

之後下個地點就係Hot Water Beach 啦。呢個沙灘就咁睇就平平無奇，但其實兩公里下面係有地熱傳上嚟，所以呢到嘅賣點就係你可以自己係到挖沙窿浸"溫泉"。頭先我咪話要借工具嘅？就係鐵鏟啦！一去到，見到有班人已經係到挖緊同浸緊，仲以為好多好易有啦，我頂，挖咗幾個窿，d 水都係凍嘅。之後見到有班鬼仔鬼妹挖咗個大窿浸得好開心，咪過去問吓同試吓囉，真係熱㗎喎吹漲。後來發覺，原來熱水只係得佢哋大窿中間某個位先有，其他附近都冇，佢哋又成班人霸住d 熱水，所以最後都係浸唔到就走咗，超可惜。其實有人話呢到唔止一個熱水嘅spot，但今日真係冇人搵到第二個，就好似尋寶咁，尋唔到就尋唔到㗎啦。

好啦，玩埋今日，聽日我就會番去Auckland 留一星期，之後可能就會去北島遊嘅最後一站，應該會係去Auckland 以北嘅地方玩。

換宿生活 (day 5~7) 換宿不忘去玩

上一篇講完day 5 星期日朝早嘅工作，但其實day 5 嘅下晝我地屋企帶咗我哋出去玩！

果日做完嘢，屋主叫我哋去行山，仲專登車埋我哋去track 入口，叫我哋行完之後搵番佢接我哋。本身佢都想行，但由於腰痛問題所以冇陪我哋去行。座山個名叫Mount Maunganui，算係一個有d 名氣嘅北島旅遊地點，因為呢邊有海岸，山頂又有城市景，仲要有唔少餐廳，所以多人嚟玩都正常嘅。

呢條track 算係比較易同短嘅一條，除咗中間有段比較斜之外，其實都算易行嘅一條。結果我哋用咗一個鐘左右就到咗山頂。呢段山最得意嘅係周不時都有人嚟玩滑翔傘。吓，咁咪會衝咗落山？我初初都以為係好似飛機有翼果種，但原來佢係果種類似降傘咁但你其實係係山頂到飄嚟飄去，所以你唔會離開山頂好遠。果日我哋咁啱見到人玩，等咗大半個鐘，佢升空失敗咗幾次之後，諗住放棄唔等啦，點知佢又成功咗！當時圍觀嘅人都好興奮，真係好正，有機會我都好想玩！

之後屋主接咗我哋，帶咗我哋去咗



Te Puke，一個好多人嚟打奇異果工嘅鎮。其實呢邊冇乜特別玩，但就有個好大嘅奇異果俾人影吓相。屋主見到我哋咁，就講句：「Plastic kiwi！」暗串我哋d 人見到個假嘢咁興奮係到左影右易真係好白痴，佢份人就係咁㗎啦。番屋企之前去咗海邊食個fish and chips，咁就完成咗換宿以嚟去咗最耐街嘅一日啦。

星期一我哋去咗d 辛苦嘢，就係幫佢去牛欄草地除雜草啦。佢果d 雜草唔係普通草而係d 好吉好多刺嘅草。呢d 草一定要清走，一來等佢唔會搶走土地嘅養份，二來唔好阻住d 牛食草。用支叉叉起哂d 草，堆埋佢，一把火燒哂佢，好似玩營火咁。最抵死係d 牛仔見你係到放火都唔理，專登行埋嚟係附近到吃草，真係未死過！

今日最後一日係呢到幫手，屋主唔舒服都冇嘢叫我哋做，成朝唯一做過嘅就係去趕牛。d 牛仔眼甘甘望住你，真係好得意，望住佢佢又望住你，我諗咁樣我可以望成日都唔會悶！

總結一下換宿生活，其實短短一星期嘅時間，同屋主相處同傾計，留意佢生活嘅方式同態度，其實你真係會學到d 嘢，體會到d 嘢。可惜留係呢到嘅日子唔係好多，又要繼續走啦，如果唔係我都想繼續做吓打工換宿！

換宿生活 (day 2~5) 小農場之家打雜的生活

轉眼間就係呢到過咗幾日，嚟紐西蘭之前都已經想試吓做呢d 換宿，感受一下農村d 嘅生活係點嘅樣。其實通常都要幫個host 做半日工，但可能係因為呢排屋主身體唔係咁舒服同埋比較忙，所以都冇咁多嘢要我哋幫佢做。

星期四果日我走咗去幫佢通渠，已經算係暫時呢幾日最辛苦嘅一樣工作。我講嘅渠同你想像中馬路邊d 渠係有d 分別，其實d 渠主要係佢自己屋企出面d 馬路邊d 嘅去水渠，因為有雨嘅關係所以d 去水渠俾d 泥塞住咗，所以我要做嘅就係幫佢挖番走d 泥等佢d 水可以去。果日我幫佢通咗兩個一米深嘅窿，第一個都仲易d，第二個我真係挖到想死，因為工具又唔好個窿又鬼咁深，超難挖。不過辛苦果個零鐘，都成功幫佢挖得乾乾淨淨。

星期五我哋主要都係幫佢執屋同清理門口，果日幫佢清嘅藤幫佢爬梯清乾淨之外，順便幫佢掃埋個門口同清理吓屋企一大堆烏蠅屍體。

星期六屋主一朝早就出咗去，所以我哋佢個farm 轉咗個轉，幫手睇睇d 牛羊同埋執吓松果。因為佢叫我哋幫手數數d 牛羊，所以去到個牛仔欄，因為角度問題數唔到，所以想入去個欄入面數。點知我一開個閘，三十隻牛一齊衝埋嚟個閘到！哇真心嚇親我，原來佢哋以為個閘開就可以轉第二個area 食草，所以成班眼甘甘係個閘望住我，果吓真心好壯望，可惜果吓冇手機係手，冇影低到。到我番屋企拎番手機之後，雖然佢哋仲係閘口，但佢哋已經唔再眼甘甘望住我啦。

之後我仲幫手整拖拉車，由於屋企架拖拉車壞咗，所以佢有朋友嚟幫佢整。佢個朋友叫咗我幫佢手，雖然我都唔係幫得幾多，主要都係幫佢搬吓嘢，同埋幫佢扶住d 吊起嘅重物，但第一次見人咁樣整拖拉車都應該冇乜下次機會㗎啦。

呢幾日冇特別嘢做果陣就幫佢處理d 栗子，因為屋主想整成栗子蓉，所以就要幫佢煮同埋挖栗子肉。講真淨係要拎哂d 熟咗嘅栗子肉都超多功夫，仲未做之後嘅處理，所以唔怪得係香港買栗子蓉唔平啦。

換宿生活 (day 1) 執栗子、清雜草、與屋主聊天

今日一朝早其實我哋幾個鐘做咗幾樣唔同嘅工作，一開始就去咗去栗子。咁大個仔食過唔少栗子，但啱啱係樹上面跌落嚟新鮮嘅就第一次見。原來栗子其實應該係核嚟，未拆出嚟果陣外面係有少量果肉同埋超多刺，遠睇係成隻迷你箭豬咁。你要拎粒栗子出嚟係唔可能成粒拎起，因為會吉到你喊出嚟，所以你係先踩爛佢個果，再拎入面d 肉出嚟。不過最核突係佢d 牛會嚟食，所以附近有好多屎poopoo，有時要係d poopoo到執番出嚟，你咪話唔嘔心。

番到屋企之後，我哋幫佢切d 奇怪果實用嚟做果jam。隻果實聞落好香，但完全唔可以用嚟生食，因為d 果肉好似沙咁，所以正常都唔會有人賣。但拎嚟煮果陣會有陣好似蜜糖嘅香味。

我哋今日最後嘅工作就係幫佢剪藤。佢本身屋頂種咗d 藤，應該本身係用嚟裝飾屋企嘅，但由於佢想要多d 陽光同埋d 藤生到完全不受控制，所以佢就叫我哋幫佢剪咗佢。剪咗之後，間屋門口即刻光脫脫，其實講真我自己鐘意佢唔剪多過剪，有feel d 啊嘛。

屋主其實係一個大約五十左右嘅女人，份人好鐘意同人傾計，仲幾鐘意同你講笑，鐘意見到你就搵你不停搵水吹，講好多故事你知咁。佢其實應該係d 好傳統嘅農民，因為佢一d 都唔鐘意科技嘢，佢尋晚同我哋講佢最唔鐘意宜家d 人鐘意係車用餐，但佢覺得食飯係應該正正經經係餐檯食，坐埋圍埋傾計先係人生。

其實佢態度真係幾正確㗎，係短短呢星期我會試吓學吓佢到底係點生活，點樣去睇人生，呢d 先係我嚟換宿學到嘅嘢啊嘛。

北島環島遊 (day 10) 環島遊暫告一段落，開始換宿一星期

早上離開Hamilton 之前，路過呢邊嘅其中一個旅遊景點─Hamilton Garden，所以就入咗去睇吓。呢個花園入面其實係由好多唔同風情嘅花園係入面，好似係中國式、意大利式、日本式等等。佢每一部分都講清楚佢個主題，雖然唔係話好大，但慢慢行其實都可以行成粒幾鐘。

其實個人覺得個花園其實唔錯，本身我都幾享受係個花園到遊覽，但多得d 尊貴嘅大陸遊客，真係乜嘢mood都冇哂。當中最乞人憎就係有個女人對住同行朋友大聲係到話：「你為什麼都帶我們去這些免費地方，什麼特色都沒有！」雖然佢講嘅可能冇錯，北島呢邊好多活動都係要俾錢嚟玩，但個人覺得佢心態只係錢多所以出去旅行搵地方fing 錢，其實去邊到玩對佢嚟講都冇分別啦。

之後我哋去咗Hobbiton，就係電影”Hobbit”嘅拍攝場地。同行三個人入面只係我只中一個朋友有俾錢入去睇，我同另一個朋友都冇入去，係到等佢入去玩。唔去因為一來貴，二來我哋都冇睇套戲所以唔太想入去。聽番去咗嘅朋友講番導遊講番好多有關”Hobbit” 拍攝嘅嘢，呢個場地為咗套戲用咗兩年時間去整，但拍攝只係用咗十二日，所以話呢個場景製作其實好認真。

好啦，我哋嘅環島遊暫時又告一段落啦，因為聽日開始一星期我哋會開始為期一星期嘅換宿生活。今晚我哋已經搬咗入去人哋屋企到，聽日要做d 乜暫時仲未知道。主人家係一個五十左右嘅婦人，感覺都幾親切都幾講得笑。好啦之後會發生咩事我過兩日再講啦。

北島環島遊 (day 9) 北島第三大的城市─Hamilton

離開Taupo 果陣天氣好差，一起身已經落雨，所以都係早d 離開Taupo 繼續行。

今日去到呢到係北島第三大、紐西蘭第四大嘅城市，但可能係因為今日係公眾假期嘅原因，所以街上都唔覺得有咩人。

其實呢到我哋都只係途經呢到逗留一下，我哋都今日係呢到都冇乜特別活動行程可以做，加上天氣唔好，所以都係去博物館行個圈。呢邊個博物館真係冇乜嘢好睇，行咗一陣已經發覺冇乜展品可言，唯一值得講吓就係佢呢邊又有特別展覽係講番今日公眾假期嘅事─Anzec day。雖然佢唔似之前係Wellington 咁有好多好靚好精美嘅展品去講World War 嘅嘢，但佢都會有免費tour 去帶d 人去了解戰爭嘅事，都算幾有誠意嘅。

到底Anzec day 係咩？其實係澳、紐對世界大戰果陣犧牲嘅士兵所設嘅紀念日，特別係今年係100 週年，所以今年嘅Anzec day 會係特別重視嘅一年。

之後下晝入宿後，天氣開始好番d，就出咗去行兩個圈番嚟。Hamilton 成個雖然係大城市，但感覺都唔似以前基督城咁多shopping mall 同埋咁多鋪，亦都唔似Wellington 果種又大又靚嘅城市，所以都有d 失望。

北島環島遊 (day 8) 到達北島有名的湖─Taupo

係南島有好多好靚好出名嘅湖，Tekapo、Wanaka、Pukaki，都係好靚好多人去欣賞嘅湖。而北島，最有名嘅湖就應該係呢個Lake Taupo 啦。

佢有名唔係因為佢靚，個人覺得風景只可以叫做普通，但由於佢係一個好大嘅湖，人居住嘅地方又係成日靠水而活㗎啦，所以呢邊就變咗好多人居住。

由於尋日大家都行到成身散哂，今日都冇乜體力去係呢邊做乜，所以行程上今日真係冇特別去計劃玩乜。

先先我哋去咗呢邊唔同嘅風景點去睇吓個個湖。湖水唔係特別藍，加上睇果陣天氣又唔係好，所以都冇乜特別大感覺。之後我哋就去咗睇Huka falls，一個d 水由Taupo 流走嘅急流到睇。個急流d 水係粉藍色嘅，應該係因為太多氣泡，白色嘅泡就攪到d 藍色嘅水變成粉藍色。
之後佢仲有個唔係好高但好猛水嘅瀑布，正正就係呢條fall 嘅招牌，仲要有人係果到玩jetboat 㖭。

之後我哋就去咗睇人地跳bungy。同行朋友已經坐過，所以冇人想去跳多次。跳bungy 嘅地方其實景色幾靚，未跳過都幾值得跳㗎。講真我自己真係對bungy冇乜興趣，反而skydive 就幾有興趣。本身都諗住係呢個湖跳，但發覺旅費唔太夠洗都係唔跳住，但我覺得未來好快都會再嚟澳紐，所以大把機會跳啦。



頭先路過條街見到戲院，終於有Avengers 2上映啦。係呢邊咁耐都冇去過戲院睇戲，特別係呢套大片點可以唔入戲院睇呢。雖然都唔係咁聽得明，但唔入戲院邊有3D 睇，所以唯有遲d 睇番中文版dvd 啦。

北島環島遊 (day 7) 艱難的登山之路─Tongariro

好啦，今日終於挑戰咗Tongariro，一個係北島算幾出名難又長嘅National park track。今日沿路係到行，都起碼有過百人挑戰，所以呢邊都算係一個幾熱門嘅地方。嚟咗紐西蘭咁耐，呢條都算係我行過最難嘅track啦。

七點半鐘上旅遊巴，到達山腳果陣差不多七點九個字開始行。啱啱起步果陣已經都幾辛苦，因為天氣凍嘅關係，大約只有四、五度左右，加上個人未熱身，所以個人一開始超辛苦。大約行咗大半個鐘之後，太陽開始越嚟越暖，加上個人又熱咗身，所以開始冇咁辛苦。

上山沿途嘅景主要都係旁邊嘅火山，同埋鄰近嘅山。由於呢邊又係火山地帶，所以d 岩石外形都一忽忽咁，應該係來自火山噴出嚟嘅岩漿形成。另外呢邊都唔會有咩植物生長，所以d 山都係冇乜綠色，雖然唔係話咁靚，但都感受果種山脈嘅氣勢。

到上山頂前嘅個零鐘嘅路係最辛苦，d 路係勁斜，就算有樓梯都唔係易行，加上好多碎石，令呢段路難上加難。捱完呢段路後，上到山頂，見到幾個山頂嘅湖，三個鐘上到海拔一千九百米嘅地方，果吓真係從心叫咗句：「哇我得咗啦！」

從山頂開始落番山果一段短短地嘅路，先係呢條track 最恐怖最危險嘅一段路。因為呢段路斜得嚟地下仲要係d 好鬆散嘅沙土同碎石，你真係一步一驚心，碌落去都唔知點算。聽講每年都有唔少人係呢到跌斷手腳，真係唔係講笑。

離開山頂之後嘅好大段路，沿路嘅景都冇乜得別好睇，先先係一段係山邊走嘅路，全部都係雲霧，所以你連對面山都見到。之後走到最後果後係入咗樹林，所以更加冇乜好睇。雖然落山比上心輕鬆，但景就冇上山咁好。

完成果吓去到停車場，心情真係好爽。雖然身體好累，但七個鐘行二十公里又上又落山咁，好慶幸自己完成到都冇乜意外。

北島環島遊 (day 6) 洞穴之地─Waitomo

話說今日去到Waitomo，一個係北島出名好多洞穴嘅地方。聽導遊講，呢個地區大大小小有差唔多300幾個洞穴，而每個嘅形成都會有d 出入，所以都有自己獨有嘅形態。而其中今日我哋去嘅洞穴係呢到最重要嘅洞穴，因為每個人都會冒名而來睇洞穴螢火蟲。

先先入到個洞穴，第一感覺真係好似睇緊盜墓迷城咁，入到個唔知乜嘅窿探險，幾有feel吓。之後導遊帶我哋入去個洞睇，同我哋講呢個洞形成原來主要周圍都係石灰岩所形成，同埋周圍都會有d 裂縫會有雨水滲出嚟。如果講充滿石灰岩同水嘅窿你會諗起咩？就係鐘乳石啦。係個洞嘅邊都會見到鐘乳石嘅石柱，而其中我都見到仲係「生緊」嘅鐘乳石，簡單d 講就係仲會繼續變長嘅鐘乳石。導引話呢d 鐘乳石100年先會生長到1cm 咁多，所以以前d 人唔知整斷佢其實係好愚蠢嘅行為，因為你每破壞少少其實已經需要好耐好耐嘅時間先會生長到。

離開洞穴之前當然要睇最重要嘅螢火蟲啦。呢一種螢火蟲曾經我都係南島Hokitika 見過介紹過，但果陣睇嘅量就唔係好多。初初未上船果陣，望去遠遠本應該黑暗嘅地方已經見到有唔少光，仲以為係人造光嚟。之後係黑暗嘅洞穴入面坐上船仔，望上去洞穴頂度，一點點綠綠地色嘅，真係好似滿天嘅繁星。老實講果吓真係幾浪漫㗎，只可惜我就冇機會搵人陪我好浪漫咁睇啦。

睇完螢火蟲，我哋就出發去宿舍，預備聽日要行呢邊出名難行嘅山Tongariro。聽日需要行成八個鐘，仲要聽講唔易行，所以聽日嘅下篇再繼續啦。

北島環島遊 (day 5) Rotorua的第三天

今日一朝早就出咗去玩咗個好特別嘅活動，英文叫Zorb ball，上網查中文翻譯叫悠波球。係咩嚟㗎呢？其實就係你瞓咗係個好大嘅波裏面，同埋入面會有d 水，等你係裏面自己浪。之後個大波波就會係個山上面碌落嚟，你就會係個波入面自己滾嚟滾去。

初初仲以為會成個人俾佢卷到成個人反嚟反去，仲以為會好刺激，玩之前仲有d 驚驚哋；但玩完之後，發覺完全都唔刺激，個感覺就好似坐緊一條水滑梯咁，但你只係係個波入面滑緊咁解，我覺得只可以叫做普通。不過因為半價後唔貴，玩吓都無妨嘅。

之後我哋就去咗Lake Rotorua 去睇吓。雖然個湖唔係話特別靚，都唔係話對岸有咩特別山景，但最吸引我係佢海邊有d 呢邊我一直都冇見到嘅鳥類─一種係普通嘅鵝，另一種係黑天鵝。我哋初初一去到果陣，見到一大堆類似鴨嘅雀係草地上面食草。初初仲話，咦點解d 鴨咁大隻嘅，行近d 睇，唔似喎，鴨邊有咁大隻仲要有牙仔，仲要係食草！上網睇清楚先知呢隻係鵝嚟㗎。

望住d 鵝，之後朋友問我：「鵝定係天鵝啊？」我就指向另一邊話，果隻咪係天鵝囉。咦唔係喎，隻天鵝黑色嘅？！係啊係黑天鵝啊！我第一次見實物啊！話說黑天鵝係澳洲一帶嘅鳥類，正常係北半球係見唔到。最得意係d 黑天鵝係完全唔驚人，我企咗係到，佢仲要衰到走過嚟想我餵佢，真係吹漲咗。

今晚去終於去咗毛利村，去睇同感受吓毛利文化係點嘅樣。條村其實都已經唔係真正土著嘅村落，只係為咗俾遊客見識吓所以先重新整條村出嚟俾大家睇吓。最先先到步果陣，佢就表演咗佢哋獨有嘅歡迎儀式，個儀式主要都係係你面前跳吓舞同唱吓歌，但因為係好莊嚴嘅所以叫我哋在場嘅人都唔好笑。儀式過後，我哋就入去佢哋條村到參觀。村入面有幾間唔同嘅屋，每人間門口都有毛利人講d 唔同嘅東西講俾我哋聽，好似話俾我哋聽點做衫、跳舞、用武器等等。

之後就睇show 啦，佢哋表演番d 毛利獨嘅歌舞表演，雖然唔知佢哋唱乜同跳緊乜，但我都覺得比相像中好睇。之後就係晚餐buffet 時間，本身仲聽講餐飯唔多好食，會好毛利style，但其實都唔係，當中除咗幾味係用毛利方法煮之外其他都係好普通嘅煮法，所以成餐飯都唔係話特別口味。

雖然毛利村之遊價錢唔平，但個人覺得真係好值得去。比起去睇museum同睇片，親身見到毛利人、毛利村同佢哋嘅歌舞，真係對佢哋嘅文化有更深嘅認識。

北島環島遊 (day 4) Rotorua的第二天

其實本身係諗住今日就會離開呢到去第二個城市，但因為d 行程同天氣問題，加埋尋晚冇去到毛利村，最後決定會係呢到玩多兩日先走。

今日朝早去咗睇一個地熱噴泉，其實就係係地底d 水煲到滾咗，之後每到一定嘅時間d 水就會噴出嚟。聽介紹講，d 水可以噴到廿米咁高㗎！本身仲覺得好神奇，點解會每日準時十點十五分就會噴一次，之後個介紹嘅人行出嚟，講一堆嘢之後就放d 嘢落個噴泉到，就開始噴水啦。唓！原來係落藥嘅，唔怪得咁準時啦！

其實如果佢唔落嘢，佢話其實大約兩三日左右就會自然咁噴一次，但可能因為要做遊客生意，點都要令佢噴嘅時間係控制到啩。落咗嘢之後，佢就開始嘔白泡，之後就開始噴水。根據目測其實佢真係吹大咗，頂多都係得十四、五米高，一定冇廿米咁多。噴之前，在場觀眾超期待咁等，到佢噴咗啦去到最高點之後，大家就已經冇興趣再睇同嗱嗱聲散水。

之後睇完我哋又去咗搵地方行吓track 睇吓景咁。最先睇嘅景係兩個湖，一個叫Blue Lake，一個叫Green Lake。我哋就係企咗係兩個湖之間，一次過哂兩個湖。最得意嘅係藍嘅就會有track 圍住個湖行一圈，綠嘅就冇，點解？因為個Green Lake 係一個毛利人私有嘅，所以政府唔可以攪個湖附近d 地。成個湖都可以私有化，真有霸氣。

之後揸車轉個地方再行，行上山睇唔同嘅lookout point。第一個係望到Rotorua 嘅全景，第二個就係望番我哋尋日去嘅地熱公園。雖然中間嘅景唔算特別，沿途中間經過一個樹林，d 樹係排得超整齊咁一行一行咁沿山上面生，果吓真係覺得超有電景場景feel。

行完之後我哋就去咗睇紅樹林。d 紅樹好多都生得好密同好高，聽講最粗嘅係需要六個人以上都抱得到成條樹幹。由於d 紅榭咁粗，所以好多人都會走嚟抱住碌粗樹嚟影相。當然我都唔例外，但算啦我唔貼出嚟啦。

北島環島遊 (day 3) 達陣地熱之境─Rotorua

今日朝早就出發離開Napier 再向北出發。離開之前，都係要上山頂望吓Napier 個景先走。上到山頂望出海先知，原來Napier 係呢邊有一個出入口碼頭，雖然比較起香港仲差好遠，但都見到唔少出口嘅貨櫃，當中仲有唔少物流公司嘅名都係我哋識嘅㖭。

之後我哋就向北走，目的地係一個叫Rotorua 嘅旅遊重鎮。雖然呢個鎮地方唔大，但由於呢邊係一個好重要嘅地熱公園，同時又係以前土著毛利人嘅居住地方，所以就變成咗發展旅遊嘅地方。

未到達目的地果陣，已經遠遠見到好多好高嘅煙柱係地下標出嚟，再近d 望就會見到d 煙其實係係d 岩石嘅罅隙走出嚟，攪到唔講你以為果邊有山火。

一去到地熱公園Wai-O-Tapu，一落車第一反應就係：「Shit！好臭！」係啊，真係好臭，因為地熱公園都有好大量嘅硫磺味。仲記唔記得你讀Chem 果陣有做過實驗聞過果陣臭蛋味？就係果陣味啦，只係呢邊因為量多濃度高，行得個公園耐真係臭到你會想作嘔同埋鼻都有d 刺痛。

咁個公園係咩嚟？其實就係因為呢邊係個溶岩接近地面嘅地方，所以會有大量地熱係呢到滲出嚟，同事呢到都有大量嘅礦物質，令到呢到有好多地方都會有煮熱水同泥漿嘅現象。

雖然好多地方都主要係黃黃綠綠色，主要係因為硫磺同硫化物，但都有d 唔同嘅色。其中最大最重要嘅池如果睇到嘅話，係可以搵到超過五種顏色㗎。雖然個國家公園唔可以用靚去形容，但都算一個好特別嘅體驗，起碼你係世界上都唔會搵到咁多地方有呢d 地熱嘢睇啦。

本身夜晚係book 去咗去毛利村參觀，但由於果到唔知做乜放咗我哋飛機，所以行程就取消咗，所以唯有再打算吓幾時再去啦。