放假當然就要去玩啦─復活節篇(上)

難得放長假，當然要去玩吓啦！由於同宿朋友星期日要番工嘅關係，所以星期五、六只可以選擇比較近d 嘅地方去玩，最後我哋選擇咗去Akaroa，一個我好早就去過嘅法國小鎮。同行嘅人入面只有我partner 係未去過，但今次都再去其實都係想做吓d 唔同嘅嘢。

今次唔似上次係即日來回而係係果邊住一晚。我哋住嘅地方係有d 遠離小鎮，但風景就真係一流，對住個海不凸止，仲要有個超靚嘅花園。唔怪得之幾年之前曾經係紐西蘭bbh 第一嘅宿舍。

之後我哋就借咗幾架單車，踩咗去附近睇風景和玩。其實我真係超耐冇踩過單車，架單車仲要鬼咁高，踩埋d 鬼咁多沙石嘅路，有兩次都差d 趴街。去到海邊，先先就行咗上個山仔到，但因為太大風同沙太多就好快落番嚟。之後又去到個碼頭仔到睇景，果日天氣比較暖，朋友們仲話落水唔錯，點知真係有個鬼仔係到跳海，仲要佢屋企人幫佢拍片。洋鬼子真係唔同d，比著d 香港父母唔好話幫佢拍片，比都唔比佢咁跳。夜晚去咗食泰國嘢，除咗貴同唔好食真係唔想特別記得餐飯。

第二朝我哋又去多次果個小山丘到，由於之前因為潮漲嘅關係，所以唔可以行到尾，今次潮退咗，所以終於可以去到篤篤。去到小山丘嘅尾，可以係最高點睇哂全海景，超一流，攪到我超想係到山頂瞓番覺。之後落番山，又番番去akaroa 行吓吃吓嘢睇吓景咁，咁就過咗半個復活節假。值得一講，係呢個鎮食嘢真係超貴！網上評價第一嘅西餐廳lunch time 居然要收差不多40nzd 一餐，旅遊鎮果然係識收錢d。

剝青口工人第十三~十六日、工作趣聞有感

經過上星期俾人警告同恐嚇之後，今個星期認真狂開，努力加速越開越快。佢要求六千隻啊嘛，星期一我就已經開夠六千五俾佢，不過薩摩亞佬果日最後一round 係到攪攪震，佢本身想幫我做數，掟咗一堆落我到，但俾人捉到，攪到俾人扣咗幾百隻，但都唔重要已經夠哂數。

星期二我第一round 開完，supervisor 仲同我講"much better"，當時其實我係有d 嬲多過開心，因為我越開越快，隻手就比之前更痛，我當時真係諗：「妖，真係要我開到手痛先開心，正人渣。」之前hea 住開左右手交替咁開，隻手舒服好多，但宜家要我長期高速咁開其實真係辛苦好多。

星期三，唔知做乜做咗半日就收咗工，應該係放假前唔夠貨所以早d 收工。都好，果日個人唔太舒服，早d 番屋企瞓覺都係好事。辛辛苦苦捱埋星期四，終於可以放假。上星期仲諗今個星期會唔會俾人炒鬼咗，最後都係順利捱到放大假。

話說之前同薩摩亞佬傾計，俾佢知道咗我原本係做software，佢就做咗個打字嘅動作，好奇咁我"typing in office?"。我答係，佢又繼續問"Why are you here?"。我答佢係working holiday，所以想體驗d 其他嘢，所以先做，佢有d 驚訝又有d 唔明。對佢哋d 島民嚟講，做呢d 辛苦工係為咗糊口養家，但我明明可以唔洗但又走嚟做。我同佢解釋咗一輪，佢先明白我哋嚟working holiday 到底為咗乜，先開始理解。

另外又有個島民女人，上星期先入職開青口，但宜家先比我快。早兩日同佢傾咗幾句計，講笑咁話你新嚟過我已經比我快，佢先同我講話佢係做咗好多年青口。我好奇問佢，好多年即係幾耐？佢答我話前前後後斷斷續續都十年，雖然崗位唔同但都係同青口有關。我當時o 咗嘴，十年？我連做十日都覺得辛苦同悶，點解佢可以做十年？

直到早兩日係9gag 見到呢張圖：http://9gag.com/gag/aB3ZAxA?ref=fbp

我唔係呢種人就唔係呢種人。都係果句，做幾日當玩吓我ok，但要真係日日狂做同一個動作做八粒鐘唔用腦，我其實真係覺得辛苦都極。

其實我都有打算四月中就會離開基督城向北行，搵朋友再上北島玩，所以都係可能做多個零星期呢份工。努力捱埋佢，就可以有錢去玩啦。

剝青口工人第九~十二日

之前已經俾人叫過我開青口唔夠快，呢個星期我都唯有努力叫自己開快d，由星期初得一個鐘大約六百幾隻，去到星期尾已經去到接近最低標準嘅八百尾隻，老實講我已經覺得我已經安全啦，唔會再收口頭warning啦啩？

先解釋吓先，我哋每日要係運輸帶上面嘅位置都要換，因為企前d 後d，其實會影響開嘅速度，你諗吓你企前面都會選d 最靚最好開嘅嚟開先，所以換位係為咗公平。

星期四因為我企咗係條line 嘅隊頭，做隊頭其實最著數，一來d 青口啱啱出閘，有d 易開嘅青口可以選擇，二來有d 青口啱啱蒸完出嚟，基本上刀都唔洗，就咁拗開已經得啦，所以會更舒服同快。果日最快果兩個鐘，我差唔多開咗一千隻一個鐘。

星期五，本來又係另一日超輕鬆嘅一日，因為做完隊頭就輪到隊尾，隊尾最正係因為佢個counter 係壞嘅，所以冇人會知你做咗幾多。人就係懶㗎啦，明知唔count，咪龜速咁開，諗住輕輕鬆鬆就可以過個happy friday。

好景不常，開到第二round 果陣，個manager 入嚟唔知望乜。初初我冇諗過條友會望我，正常佢一日都唔會入嚟一次，就算佢望都應該係望其他嘢啦，所以我都冇理過佢，繼續hea 做。做做吓，supervisor 突然行過嚟，叫我同隔嚟啊姨換位，個心已經諗，「shit，無啦啦換乜春啊，又要我衝數？」

好啦，換完位，仲要俾個仆街肥佬manager 叫我出去講嘢。對話內容大約係：「你條友太慢，我要你之後每日開六千隻俾我，如果唔係就要你走。」六千隻即係幾多？大約係一個鐘八百隻以上。咦乜我唔係已經夠數啦咩？佢話我企係d 隊頭開夠數，但宜家要我隊尾都夠數。

當時我真係嬲到唔識講，好彩我把刀係放低咗先同佢傾計，如果唔係我應該嬲到當場插咗佢一刀。大我？乜料？同事之中有個女仔同我嘅進步情況差唔多，但佢從來都冇俾人警告過，我就前後俾人warn 過三次，今次仲要warn 要炒我，真心覺得超唔公平。

其實我唔係話好鐘意份工，我本身都係想打多三個星期就會走，但宜家你突然話炒我，我之後d 計劃就會亂哂，同埋本來應該會儲到嘅旅費就冇咗，其實真係幾煩。特別係下星期，因為呢邊公眾假期係需要出holiday pay俾我哋，唔知佢係咪想唔出俾我，所以就想係假期前就炒咗我，如果佢賤到咁我都無話可說。

之後我同個華人supervisor 傾，佢叫我繼續俾心機努力啦，唔好真係咁放係心到，盡自己力就ok。其實真係好矛盾，我唔知係個死肥佬係認真定係純粹想俾壓力我要我開快d。

辛苦五日過後，真係身心都好累，仲要happy friday先俾壓力我嘆。星期六日我都係食同瞓。本身今日星期日天氣好好，partner 約咗兩個朋友可以一齊行山，但我都係有d 唔舒服所以唔去。冇得去玩，唯有屋企食吓飯仔啦。

利申: 親手炒，好味㗎。

四個月的旅程，有感而發

其實你問我鐘唔鐘意紐西蘭，我會答你：鐘意。呢到風景靚，空氣好又乾淨，kiwi 人普遍都親切有禮，作為一個居住嘅地方，呢到絕對比香港好好多。起碼，你唔需要做一生屋勞去供樓，唔洗成皮港紙一個月先養得起架車，更加唔需要俾一個濕鳩到冇得再濕鳩嘅政府日日係玩殘。每日嘅生活就係簡簡單單，自給自足，得閒放假就揸車出去玩吓，其實真係幾寫意。

但點解我宜家又會係呢邊咁唔開心？之前架車壞，當時個人真係接近崩潰，因為之前一個月辛辛苦苦做cherry 儲果少少錢，架車一炮過就輸凸哂不突止，仲要係我想用佢接朋友環島之前先出事，我真係灰到頂唔順想逃走番屋企。

果件事其實都係導火線，令我發現自己一直係紐西蘭其實都係唔開心，直到今日我可以話其實真正令我唔開心唔係呢邊嘅生活，係呢邊嘅工作。呢樣真係期望與失望嘅問題，初初嚟之前，我仲諗住體驗吓唔同嘅工作，摘吓車厘子，搬吓箱啫，應該幾過癮啩？好多嘢你做兩日就過癮，但當佢變成你嘅職業，就唔係咁講。

摘車厘子，第一日真係幾好玩，第二日都仲過癮，第三日我就開始覺得悶到爆廠；sort 車厘子都係，頭兩日做都仲覺得輕鬆，第三日開始已經覺得企成日真係幾辛苦；開青口，開兩日隻手都仲係叫痺痺地但唔悶，但我宜家已經手又痛，日日開到想企係到瞓覺。令我更擔心其實係驚做得耐會有後遺症，驚整親扭親真係醫都有排醫。

辛苦都算啦，大佬我咁想落去，唔止係悶咁簡單，我真係覺得腦唔知係到諗緊乜。有時都想話放空個腦乜都唔諗，但真係唔得，咁樣你反而仲會諗埋d 九唔搭八嘢。呢吓其實係比勞動身體更辛苦，再落去個人真係會變蠢。

仲記得出發前，屋企人聽到我話嚟，一句就質埋嚟：喂，大學生去做咕喱？當日我真係好理想化咗，其實說穿了呢邊俾人嚟做working holiday 其實都係想你哋嚟做勞工，呢個係不爭嘅現實。雖然好辛苦，但經過呢幾個月我又有冇得到d 咩？其實絕對有。經過呢幾個月，我知道自己喜歡嘅工作始終係developer，同埋比起之前更有決心去攪創業嘅嘢。

每個人都有自己嘅睇法，同埋自己嘅感受，有d 人真係好享受backpacker 呢種嘅生活，但我就應該唔係呢類人啦。留得唔開心，我都唔想迫自己留太耐，總之自己想做嘅想玩嘅，完成咗就夠啦。

咁我到底幾時番？暫時我都係唔同大家講住，但如果我係呢邊始終搵唔到份正正常常嘅工，可能我就好快就會番。倒番轉講，如果俾我好好彩搵到份office 工，我可能就會留耐d，但機會真係唔大。

剝青口工人第六~八日，週末當然係要輕鬆㗎啦

每日神咁早起身，又凍又累個身又痛，為咗錢都係要出去做嘢，所以更辛苦都要死番工。當我已經做到隻狗咁果陣，最唔想見到嘅情況終於出現啦─上星期五朝早，我俾supervisor 話我開得太慢，佢話連新嚟嘅都比我快。其實講真要達到佢要求嘅minimum pay 嘅數量係需要九百隻一粒鐘，我之前因為成日左右手交換開，所以得大約五百幾六百隻。俾人warn完，迫於無奈咪爆seed 開番兩round 囉，結果我發現自己最快都係得大約七百幾隻，始終都唔達佢要求。

今日星期一，我又俾另一個supervisor 講話佢知道我上個星期唔達標，所以今個星期要加速，我問佢係咪要我開九百先得？佢冇答我，只係叫我盡量開快d。我話我宜家最快都係七百幾，佢都冇特別講乜，叫我努力啦咁話。

又去番以前摘車厘子果陣咁，大佬啊我真係盡哂力啦，唔知我做多一年半載會唔會加速到，但最少宜家我真係去到limit 都唔到你要求，我可以點？我唯有盡自己力做自己最快啦，如果仲係投訴我做唔夠數，一係我自己走，一係等俾人炒或者轉pack house㗎啫。到時再諗啦。

好啦我weekend 做咗乜？星期五晚去咗casino，其實我真係冇乜錢可以賭，但我同d 朋友都係去等抽獎：星期五晚每個鐘都會抽兩個number，如果你條手帶係果個number你就可以得到1000蚊獎金。雖然同抽六合彩差唔多，但入場抽吓獎又唔洗俾錢，何樂而不為？

當然唔係啦！入得賭場，邊忍到？結果我都係忍唔到，係俄羅斯輪盤落手賭咗廿蚊咁大把。明明我都已經贏咗一個double，結果都係繼續玩輸番哂俾佢。是但啦，都係玩吓啫。

星期六，兩個傻仔朋友無啦啦話去海邊落水，真心睬佢哋都傻，呢邊卅度大陽曬住，d 水都可以凍到抽筋，呢排仲要越嚟越凍，落水仲唔變雪條？結果，佢兩條傻仔真係落咗水，d 風吹埋嚟真係凍，佢哋都仲可以話d 水好暖，真係服咗佢哋。

星期日本身想去行山，結果因為天氣太差，被迫番屋企又開檯。比起係香港，係紐西蘭d 麻雀運仲要差多兩皮，完全唔明點解下一隻就可以自模九番，偏偏就係俾對家早我一隻食先，或者我下家明明兩選一打一隻，偏偏係打咗食俾我上家食係唔俾我食。都係果句，雖然唔係打錢，不過面對自己d 黑氣，真係無奈到極點。

剝青口工人第三~五日

呢幾日都冇哂時間寫blog，因為呢幾日都神咁早起身，仲要做到隻狗咁，番到屋企都已經快快手手食飯瞓教。

啱啱果個星期日，有兩個朋友嚟咗我屋企探我，計埋我partner 四條友，有咩好做？哈哈就係開檯啦！真心好耐冇打，真係手痕到爆，雖然冇打錢，但起碼過吓手癮。不過唔打錢都好，因為我d 手氣真係超級臭，應該我紐西蘭d 黑氣都係唔散。

又開咗三日青口，隻手開始真係開到痛，日日重複同一個動作，隻手真係開到痛，特別係d 手指手掌。好彩我應該唔係最嚴重果d，有個女同事早我幾日開始開，佢有兩隻手指我見佢已經腫咗。所以為咗等隻手冇咁辛苦，宜家努力練緊左右開弓，兩邊手交替揸刀。當然啦，用左手真係會慢d，但我發覺佢其實唔係真係咁介意我速度，佢見到我有努力開，慢d 佢都唔會理我。

話說我有個同事，係薩摩亞人嚟，同時都係在場開得最快嘅人嚟。有次佢lunch time同人吹水，佢問個中國啊叔識唔識詠春，個啊叔唔明佢問乜，我咪當佢翻譯，之後我仲up 話我其實識，薩摩亞同事就超有興趣問我超多詠春d 嘢。話說原來佢超鐘意睇葉問，所以覺得詠春好正，仲有佢自己係打boxing，所以對中國功夫超有興趣。佢仲好想我教佢詠春，仲叫我教佢點盤手，先唔講我得半桶水識少少，我學咗成年幾，詠春有咁多理論同基本嘢，邊有得速成教佢咁多嘢㗎！

俾佢講講吓，真係想搵人陪我黐手啊！@siusai 快d 過嚟同我黐手，哈哈！

剝青口工人第一~二日，求人不如求己，自己架車自己整

真係唔知中文叫咩，總之英文叫Mussel Shucker。Mussel即係青口，Shucker即係剝殼，簡單d 講即係開青口。

話說我之前放棄葡萄園份工，開住貧窮mode咁去搵餐廳類工作，點解宜家又番番去做工廠類工呢？其實當然係一來因為錢啦，做餐廳類工作最大問題係唔穩定，搵咗咁耐，基本上全部都係請part time，就算係full time，好似之前餃子鋪咁，都係大約得三十個鐘。本身我有得打兩份part time令到自己有四十幾個鐘，但可惜因為間餃子鋪咁賤，攪到我個如意算盤打唔響就放棄咗啦。唔緊要啦，體驗過玩過就算啦，起碼我都做過，短就短d 咁解。

講番開青口，暫時我做咗兩日。比起以前做車厘子，其實係更加辛苦，同埋需要更高技巧。辛苦，因為一來要超早開工，朝早最遲五點到就要起身，仲有做呢d 肉廠海鮮廠真係會好大陣味，索得耐真係會有d 作嘔。本身我唔抗拒陣味，因為我不嬲都唔怕腥味，但你唔夠瞓仲要索住咁大陣味，就唔同講法啦，我尋日真係做到有d 頭暈暈同埋作嘔。另外，由於要揸刀仔，所以全日手掌都要用力，所以做完成日隻手掌真係會酸痛，有d 朋友話初頭d 手頭做到腫哂，好彩我暫時都冇乜特別，係酸痛d 啫。

做呢d 開青口係有技巧，因為你落刀要快狠準，先可以好靚咁開到，如果唔係就會整爛隻青口。成功你就可以留番半邊殼，失敗你就會成隻起肉，所以你要快就一定要起得靚。我開到第一日都整爛咗幾十隻先成功開第一隻靚嘅，直到宜家先叫做有咁上下成功率。

雖然有d 唔同，但大約就係好似似呢段片咁樣開青口。
https://www.youtube.com/watch?v=e13gM-CqTpM

今日星期六，趁放假得閒，就去咗劏車場拆車搵咪錶，試吓自己換咗佢自己整。老老實實，我呢d 老爺車，真係幾難有人會幫你整呢d 咪錶嘢，一來d 廠都唔會再有呢d 車嘅新零件，有都會貴到喊，二來就算有人整，收費都唔會平。

所以呢邊有d 呢d 劏車場就會回收d 車番嚟，俾你哋自己帶工具入去拆你要嘅零件出嚟自己修理。係呢邊車零件跟本就唔值咩錢，好似話上次我架舊車壞engine，成個引擎換真係好貴？唔係，其實佢話一手engine就可能二、三千紐紙，二手engine只係值650紐幣，但佢人工費足足收我1300紐幣，真心痴孖根，同搶係冇分別，所以我先最後放棄整番架車。要人工費低，最好就係搵華人師傅。

煩咗好耐，d 華人師傅一係就唔肯幫我攪，一係就唔得閒，一係就人間蒸法。之後把幾火，咪上網search 吓點換個錶點換，咦原來唔係咁難㗎喳？就把心一橫自己去拆自己去換。本身最煩就係個里數問題，因為如果換咗個咪錶同本身架車個里數差太遠都係一個問題，但好彩搵到啱嘅咪錶仲要連里數都match。幾十蚊紐紙，解決咗個煩咗超耐嘅問題，真係爽。