第一次：一個人揸車！

尋日本身約個個frd 見下食吓嘢，本來都諗住捉埋陪我&教我揸車嘅朋友出去，但佢又有其他地方想去，所以分道揚鑣。講真，我真係冇諗過咁快就要靠自己，果一吓真係有d 壓力。

一開波揸去我個frd 開始已經俾人咇我幾鑊，仲要對住個電話gps 都行錯路，攪到我仲要停埋一邊再搵過條路行先得。其實我俾人咇嘅原因主要都係因為我仲未太熟d 路，成日係最後一秒先cut人條線，或者係唔熟d 呢邊d rule，停左係d 唔應該停嘅位所以俾人咇。

之後平平安安接左我個frd 出去食嘢啦，揸左好短條路，唔知做乜去到目的地一路都搵唔到位泊車，咪一路都係到兜嚟兜去啦。兜兜吓去左個有蓋停車，d 車一樣打哂蛇餅，係個停車場卡到死哂，所以咪搵位走啦，前車後車咁諗住搵位番出啦，之後去到有個位我睇唔到夠唔夠位出，我咪問問我個frd，係助手位果邊望望夠唔夠位啦，佢話夠，我信佢，頂，我就中伏啦。我一嘢high咗另一架泊好咗嘅車到，當時果架車係司機唔係到嘅。果時即刻淆到開花，咪快快手手離開現場去個遠d 嘅地方泊車再落車睇下情況如何。

萬幸就係，個"意外"真係好輕微，我自己車都係得一條非常非常輕嘅刮裂，冇凹到，之後我哋仲專登行番去睇番人架車情況，好好彩對面架車都同我差不多情況，唔係專登行近睇基本上都睇唔到。講真諗番都真係幾衰幾唔負責任，自問都覺得幾pk，但講真當時我第一次咁真係慌到乜咁，已經唔知自己當時做緊乜諗緊乜，我真係好驚之後要俾人追究。

之後我揸番原路番番去，可能因為揸咗一次，感覺都好咗d，都好似冇俾人咇得咁甘啦。唉我真係要努力d 練多d。