車已買，可以周圍去啦！

攪咗一大輪，最後都係買左上星期四睇中果架七人honda wagon。不過老老柒柒，呢次買車我都覺得有少少唔服氣，唔係買得話100%滿意。

點解要買咁大架？一係因為二月頭會有幾個朋友係香港飛過黎玩，要我做柴可夫導遊，你知計埋我自己鬼咁多嘢，幾條友仔d 嘢加埋，正常車鬼夠裝咩；二係因為我黎緊都會有長途車轉城市，好大可能都會有3-4個backpackers(即係working holiday嘅人，嚟得working holiday就當然比正常人多行李量)，所以經呢個考慮，之前一直都target七人車。

之後我上星期睇中左架捷克人揸嘅車，個價錢其實話貴唔貴話平唔平，有唔少都開得高過佢，比佢平嘅同款差不多model車我見過有2-3架比佢更平，但一係就俾人買左，一係就太遠冇得試。但佢呢架車有幾樣嘢好，一就係keep得幾新淨冇乜明顯問題，二係佢上手捷克佬手車幾勁下，三就係佢mileage低(即係由出廠到而家行得比較少，代表佢比較少耗損)。所以我都一直幾掙扎吓，你知㗎啦，香港人就係要買嘢買到最抵先得，有人平過佢，總覺得佢其實抬左少少錢。

其實上星期本身我壓咗佢100nzd，佢話ok嘅。之後到左尋日佢拎左去做checking，check完之後佢話整車整左150nzd，所以覺得架車宜家變番perfect condition，堅持要去番原價，仲話如果我唔買，車行果邊都會買，因為架車個condition太好，車行自己都有人想要左佢。我俾佢大咗嘢，講真條氣真係幾唔服，但我又咁想要佢架車，所以我都係死死氣俾多100nzd俾佢。

呢件事之後我發現左捷克人一樣野：佢哋真係好斤斤計較。我收到架車，我發覺個油缸可以真係用到一滴油都冇先俾我，佢唔係正常地冇油，係用到一滴都冇，真係啱啱好夠我踩1-2km去到油站果隻。仲有佢果150nzd，仲有個"另一買家"，老實講佢都冇俾証據我睇，我都係得個信字，我有諗過佢只係借口想抬番去佢自己想要果個價。

其實有朋友提左我：其實我唔洗咁白癡買咁大架車，仲要為左架車俾條友過我幾棟。其實可以二月先租車車佢班友，宜家買番低cc 五人平車，不過算啦，唔睇中都睇中左，頂多遲d 用唔著咪再換過，呢架其實我覺得放番出去都keep到個價唔會太差嘅。

今日收到架車，搵左上次話果個朋友帶我去揸吓，一來當練車，二來當係出去買吓嘢。老老柒柒我宜家手車仲係屎嚟，暫時仲未敢一個人行動住。希望練多排我熟左，就可以做番一個獨立driver啦。

今日渣左去一個叫church corner嘅地方，呢到有d 亞洲人嘢買，終於買到幾包公仔面，仲有見到賣葉菜心啊、街市豬肉，終於搵番少少家鄉感覺。