努力尋找服務業工作，加d 近期有感

今日開始我又變番做無業遊民啦。之前好努力咁搵waiter 工，但全無音訊，因為一來我冇經驗，二來d 洋鬼子餐廳同cafe 都係想請番洋鬼子做，我呢d 短期仲要亞洲人佢哋諗都唔會諗。

之後係朋友嘅告知下，原來除咗呢d 洋人cafe，仲有一個論壇係俾d 華人登廣告尋人開工，所以咁樣變咗機會大好多。前日同尋日放工都試咗去見一見工，一份就仲未有消息，另一份就因為工時太唔穩定所以放棄了。

今日去咗見幾份餐廳工，第一間係一間好正式嘅中餐廳，老闆娘超斯文超有禮貌，感覺真係超nice。傾完之後，佢叫佢下星期一夜晚去做個短嘅trainning，之後星期二、三會試試俾我開工，如果ok 就正式請我，唔ok 就會話我知唔需要我。第二間都係一間中餐廳，經理係一個後生嘅男性化女仔嚟，本身想話搵parttime 男仔，但突然又話聽日叫我去試試工，所以聽日會去睇睇咩情況。第三間係一間比較food court 式嘅細餃子店，感覺上會最輕鬆同易做，但有d 衰就係要求我試工兩次仲有唔會磅水，但佢俾我嘅工時係最長，所以點都要去試試。

三月五日，用平時寫日期嘅format(5/3/2015)，睇錯咗就會變成五月三。不經不覺仲有兩個月就再大一歲，開始回想呢一、兩年自己真係唔係特別如意。廿四歲就係活係胃病嘅一年，放棄工作用半年時間去休息，廿五歲嘅前半年都係為咗呢次紐西蘭之旅庸庸碌碌，最後過到嚟都係唔係好知自己呢幾個月做過d 乜。

回顧自己呢幾個月，真係做咗好多樣咁大個仔都唔覺得自己會做嘅嘢。係個果園入面去摘生果、拉網，曬到自己又黑又累；係個工廠入面係到卒d 死人生果、搬箱、俾人冷藏；仲有嚟緊會去搵服務業，作為一個臭脾氣嘅少爺仔，我都唔知可以忍到幾多上司同客嘅屁。仲有會係一個需要成日揸車嘅地方生活，仲要撞過、死過車，呢d 真係唔係我係香港正常會有嘅經歷。

雖然好嘅比唔好嘅經歷多(好似係)，但倒番轉去睇，呢d 都係叫人成長嘅事嚟嘅。唔錯過、唔輸過，邊得嚟叫我對呢d 教訓咁深刻？學我大佬話，錢解決到就唔係問題啦，條命係到，輸哂咪番香港再搵。

祝願自己兩個月後，廿六歲後，會係另一個精彩開心嘅一年啦。